မင်းအောင်လှိုင်နဲ့အပေါင်းအပါတွေကို စွဲဆိုထားတဲ့အမှုကို အာဂျင်တီးနားတရားရုံးလက်ခံ

ရိုဟင်ဂျာတွေအပေါ် ကျူးလွန်နေဆဲ လူမျိုးတုံးသတ်ဖြတ်မှု(ဂျီနိုဆိုက်)အတွက် မင်းအောင်လှိုင်နဲ့ စစ်တပ်အရာရှိကြီးတွေအပါအဝင် မြန်မာစစ်တပ်အား အမှုဖွင့်တာကို အာဂျင်တီးနားတရားရုံးက လက်ခံလိုက်ပြီလို့ ဗြိတိန်အခြေစိုက်မြန်မာရိုဟင်ဂျာအဖွဲ့အစည်း (BROUK)က ဒီနေ့(နိုဝင်ဘာ ၂၈ ရက်)ထုတ်ဖော်ပြောဆိုပါတယ်။

ရိုဟင်ဂျာတွေအပေါ် လူမျိုးတုံးသတ်ဖြတ်နေတဲ့ မြန်မာစစ်တပ်ကို အာဂျင်တီးနားတရားရုံးမှာ ၂၀၁၉ နိုဝင်ဘာကတည်းက အမှုဖွင့်ဖို့ကြိုးပမ်းခဲ့တာဖြစ်ပြီး အပြည်ပြည်ဆိုင်ရာတရားစီရင်ပိုင် ခွင့်အရ အကြမ်းဖက်စစ်တပ်ခေါင်းဆောင်အပေါ် စွဲဆိုထားတဲ့အမှုကို မြို့တော် Buenos Aires ရှိ အာဂျင်တီးနားဖက်ဒရယ်ရာဇဝတ်ခုံရုံးက နိုဝင်ဘာ ၂၆ ရက်မှာ လက်ခံခဲ့တာဖြစ်ပါတယ်။

“ဒီနေ့ဟာ ကျွန်တော်တို့ ရိုဟင်ဂျာတွေအတွက်သာမက နေရာအနှံ့အပြားက အဖိအနှိပ်ခံပြည်သူတွေအတွက် မျှော်လင့်ခြင်းနေ့ရက်ပါပဲ။ အာဂျင်တီးနား(တရားရုံး)က ဆုံးဖြတ်ချက်ဟာ ဂျီနိုဆိုက်ကျူးလွန်တဲ့သူတွေအတွက် ပုန်းကွယ်ဖို့ နေရာမရှိဘူးဆိုတာကို ပြသလိုက်တာဖြစ်ပါတယ်။ ကမ္ဘာကြီးဟာ ဒီရွံရှာဖွယ်ရာဇဝတ်မှုတွေကို ဆန့်ကျင်ဖို့ ညီညွတ်ခိုင်မာရပါမယ်” လို့ BROUK ဥက္ကဌ ဦးထွန်းခင်က ပြောပါတယ်။

၂၀၁၇ က ရခိုင်ပြည်နယ်မြောက်ပိုင်းမှာ ရိုဟင်ဂျာတွေအပေါ် ကျူးလွန်ခဲ့မှုတွေနဲ့ပတ်သက်လို့ အပြည်ပြည်ဆိုင်ရာတရားရုံး(ICJ)မှာ ဂမ်ဘီယာက စွဲဆိုထားတဲ့အမှုကို မြန်မာနိုင်ငံက ရင်ဆိုင် နေရဆဲဖြစ်ပြီး အကြမ်းဖက်စစ်တပ်ခေါင်းဆောင်တွေကို စွဲဆိုထားတဲ့အမှုကို အာဂျင်တီးနား တရားရုံးက လက်ခံလိုက်တာဖြစ်ပါတယ်။

Public Service Announcement

ဒါ့အပြင် နိုင်ငံတကာရာဇဝတ်ခုံရုံး(ICC)ကလည်း ရခိုင်ပြည်နယ်မှာ ရိုဟင်ဂျာတွေအပေါ် ကျူး လွန်ခဲ့မှုတွေနဲ့ပတ်သက်လို့ တာဝန်ရှိသူတွေ အထူးသဖြင့် မင်းအောင်လှိုင်နဲ့ စစ်တပ်ခေါင်း ဆောင်ပိုင်းကို အမှုဖွင့်အရေးယူဖို့ ကြိုးပမ်းနေရပါတယ်။