စစ်အာဏာရှင်စနစ်အပါအဝင် အာဏာရှင်စနစ်အမျိုးမျိုးတို့ ချုပ်ငြိမ်းစေရေးအတွက် ဒေသပေါင်းစုံ၊ အလွှာပေါင်းစုံမှ ပအိုဝ်းအမျိုးသားထုတစ်ရပ်လုံးက လူမျိုးပေါင်းစုံပြည်သူလူထုနှင့်လက်တွဲဖော်ဆောင်ရန် ပအိုဝ်းလက်နက်ကိုင်အဖွဲ့ PNLO ပန်ကြားခဲ့သည်။
ယနေ့(ဒီဇင်ဘာ ၁၁ရက်)တွင်ကျရောက်သည့် PNLO၏ (၇၂)နှစ်မြောက် ပဒေသရာဇ်စနစ်ဆိုးဆန့်ကျင်တော် လှန်ရေးနေ့ ထုတ်ပြန်ကြေညာချက်တွင် ယင်းသို့ ဖော်ပြထားခြင်းဖြစ်သည်။
ယနေ့ ကာလတွင် စစ်အာဏာရှင် စနစ်အပါအဝင် အာဏာရှင် စနစ် အမျိုးမျိုးတို့ ကို ချုပ်ငြိမ်းစေပြီး ဖက်ဒရယ်ပြည်ထောင်စု ပေါ်ထွန်းတည်ဆောက်နိုင်ရေးကို အမျိုးသားတာဝန်တစ်ရပ်အဖြစ် သတ်မှတ်ခံယူ၍ ပအိုဝ်းအမျိုးသားလက်နက်ကိုင်အဖွဲ့အစည်းများ ပအိုဝ်းအမျိုးသား နိုင်ငံရေးပါတီများ စာပေယဉ်ကျေးမှုနှင့် လူငယ်အမျိုးသမီးစသည့် ပအိုဝ်းအရပ်ဘက် လူ့အဖွဲ့ အစည်းများ အပါအဝင်ဒေသပေါင်းစုံ အလွှာပေါင်းစုံမှ ပအိုဝ်းအမျိုးသားထု တစ်ရပ်လုံးက ပြည်ထောင်စုဖွားညီနောင်တိုင်းရင်းသားလူမျိုးပေါင်းစုံ ပြည်သူလူထုနှင့်အတူ လက်တွဲဖော်ဆောင်ပေးရန် အလေးအနက် ပန်ကြားသည် ဟု PNLO၏ ကြေညာ ချက်၌ ဖော်ပြထားသည်။
PNLOသည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) လက်မှတ်ထိုးထားသည့် တိုင်းရင်းသားလက်နက်ကိုင်အဖွဲ့ ဖြစ်သည်။