မန္တလေးလူထုကြောက်လန့်အောင် ရပ်ကွက်အလိုက် ပိတ်ဆို့ပြီး စစ်ကောင်စီ ဆက်တိုက်စစ်ဆေးလာ

မန္တလေးမှာ စစ်ကောင်စီဟာ ရပ်ကွက်အလိုက်တစ်အိမ်တက်ဆင်း ပိတ်ဆို့စစ်ဆေးတာတွေကို ဒီရက်ပိုင်းတွေမှာ ခပ်စိတ်စိတ်လုပ်ဆောင်လာပါတယ်။

ပြီးခဲ့တဲ့ ရက်ပိုင်းတွေမှာ စိန်ပန်းရပ် ၊ အောင်သာရပ်နဲ့ သင်ပန်းကုန်းရပ်တွေကို အဝင်အထွက်ပိတ်လိုက်ကာ နာရီနဲ့ချီပြီး ရှာဖွေစစ်ဆေးခဲ့ပါတယ်။

ဒီလို စစ်ဆေးရာမှာ ဒေသခံတွေရဲ့ ပြောပြချက်အရ ဧည့်စာရင်းတိုင်တာရှိမရှိ ၊ နေအိမ်တွေမှာ တရားဝင်ပါတီအဖြစ်တည်ရှိနေတဲ့ NLD ရဲ့ အမှတ်တံဆိပ်ပစ္စည်းတွေရှိ မရှိကို မေးမြန်းစစ်ဆေးတာတွေလုပ်တယ်လို့သိရပါတယ်။

ဒါအပြင် ဖုန်းတွေမှာ VPN ထည့်သုံးရင် အရေးယူမယ်လို့ ခြိမ်းခြောက်တာတောင်ရှိခဲ့ပါတယ်။

Public Service Announcement

ဒေသခံတွေကတော့ ရပ်ကွက်တွေကို ပိတ်ဆို့စစ်ဆေးတာဟာ စစ်ကောင်စီ အလိုရှိနေတဲ့သူတွေ ရှိနေလို့ ရှာဖွေတဲ့ပုံစံမဟုတ်ဘဲ လူထုကို အကြောက်တရားစိုးမိုးအောင် ရည်ရွယ်ချက်ရှိရှိ လုပ်ဆောင်တာလို့ ပြောကြပါတယ်။

ရပ်ကွက်အလိုက် ပိတ်ဆို့စစ်ဆေးတာကိုလည်း မန္တလေးသပိတ်အင်အားစုက လူငယ်တွေ ဖမ်းဆီးခံရပြီးနောက် လုပ်ဆောင်လာတာလည်းဖြစ်ပါတယ်။

ပြီးခဲ့တဲ့ ရက်ပိုင်းက မန္တလေးသပိတ်အင်အားစု လူငယ် လေးဦး ဖမ်းဆီးခံလိုက်ရတာပါ။

ဒီလို ဖိနှိပ်ခြိမ်းခြောက် ဖမ်းဆီးမှုတွေရှိနေပေမယ့် လည်း ဒီနေ့မနက်ပိုင်းမှာတင် မန္တလေးမှာ လူငယ်တွေစုရုံးပြီး လမ်းပေါ်ထွက်ကာ စစ်အာဏာရှင် ဆန့်ကျင် ရေး ဆန္ဒပြခဲ့ပါသေးတယ်။