ချင်းအမျိုးသားကာကွယ်ရေးတပ်ဖွဲ့(CNDF) ၏ အထူး ကွန်မန်ဒိုသင်တန်း အမှတ်စဉ်(၂) သင်တန်းဆင်းပွဲကို မတ်လ ၄ရက်က အောင်မြင်စွာ ကျင်းပခဲ့ကြောင်း ချင်းအမျိုးသားအဖွဲ့ချုပ်(CNO)က ယနေ့ ထုတ်ပြန်လိုက်သည်။
CNO၏ လက်အောက်ခံတပ်ဖြစ်သည့် CNDF တပ်ဖွဲ့သည် ချင်းပြည်နယ် ဖလမ်းနှင့် စစ်ကိုင်းတိုင်း ကလေးမြို့နယ်များ၌ အကြမ်းဖက်စစ်ကောင်စီတပ်တွေကို ခုခံတိုက်ခိုက်လျက်ရှိပြီး ယခုနှစ်ဆန်းပိုင်း၌ တိုက်ပွဲများ မကြာခဏ ဖြစ်ခဲ့သည်။
CNDFနှင့် ဒေသတွင်း မဟာမိတ်တပ်ဖွဲ့ဝင်များ ပူးပေါင်း ခုခံတိုက်ခိုက်ခဲ့၍ ဖေဖော်ဝါရီလအတွင်း CNDF ပါဝင်သည့် တိုက်ပွဲ ၅ကြိမ်ဖြစ်ခဲ့ပြီး စစ်ကောင်စီတပ်ဖွဲ့ဝင် ၄၁ဦးသေဆုံးကာ ၅၀ခန့် ဒဏ်ရာရခဲ့ကြောင်း CNOက ထုတ်ပြန်ထားသည်။ ယခု မတ်လအတွင်း၌လည်း ဖလမ်း -ဟားခါးလမ်း၊ ဖလမ်းမြို့နယ် ရိဒ်ခေါဒါရ် မြို့နယ်ခွဲ၌ CNDF နှင့်မဟာမိတ်တပ်များ ပူးပေါင်းပြီး စစ်ကောင်စီတပ်ကို ခုခံတိုက်ခိုက်နေသည်။
