စစ်ကောင်စီ လက်ပါးစေ ရဲ၊ စစ်သားများနေထိုင်ရာ နေအိမ်အဆောက်အအုံများအနီး သွားလာခြင်းအား ရှောင်ကျင်ရန်နှင့် ၎င်းတို့နှင့် နီးကပ်စွာရှိနေခြင်းမှာ မိမိအသက်အန္တရာယ်ရှိနေသည်ကို သိရှိထားရန် ဗန်းမော် ပြည်သူ့ကာကွယ်ရေးတပ်(PDF)က ပြည်သူလူထုအား သတိပေးသည်။
မတ်လ ၈ရက် ညပိုင်းက ဗန်းမော်သစ်ထုတ်ရေးရုံးရှေ့ရှိ စစ်ကောင်စီတပ်၏ စစ်ဆေးရေးနေရာအား မိုင်းဖောက်ခွဲမှု လုပ်ဆောင်ခဲ့ကြောင်း ဗန်းမော် PDFက ထုတ်ပြန်စဉ် ယင်းသို့ သတိပေးခဲ့ခြင်းဖြစ်သည်။
ပြည်သူလူထုကို စိတ်အနှောက်ယှက်ဖြစ်စေရန် နေ့စဉ်စစ်ဆေးနေသော ရဲခွေး ၊ စစ်ခွေးများကို သတိပေးလိုက်ခြင်းလည်းဖြစ်ကြောင်း၊ ဗန်းမော် PDF အနေဖြင့် ဗန်းမော်မြို့ကို နေ့စဉ် စောင့်ကြည့်နေပြီး ရဲခွေး ၊ စစ်ခွေးများ၏လုပ်ရှားမှုကို အမြဲစောင့်ကြည့်လေ့လာ၍၎င်းတို့အား နှိမ်နှင်းရန် အသေးစိတ်စီစစ်၍ သတင်းအချက်လက်များ စုဆောင်းပြီးဖြစ်ကြောင်း၊ မြို့ပြင်ဧရိယာများသည် ရဲခွေး ၊ စစ်ခွေးများ၏ သုသာန်ဖြစ်ကြောင်း ဖော်ပြသည်။
ထို့ကြောင့် ပြည်သူများအား အသိပေးလိုသည်မှာ အစစ်ဆေးရှိသောနေရာများကို ရှောင်ကွင်း သွားလာရန် ၊ ရဲခွေးစစ်ခွေးများကင်းပုန်း၀ပ်သော နေရာများရှောင်ကွင်းသွားလာရန်နှင့် မိမိနှင့်မသက်ဆိုင်သော အထုပ်များတွေ့ခဲ့သည်ရှိသော် ကိုင်တွယ်ခြင်း ၊ လေ့လာခြင်းမပြုရန် ထုတ်ပြန်ခဲ့သည်။
ရှေ့လာမယ့်ကာလများတွင် တော်လှန်ရေးစိတ်ဓါတ်ရှိသော ပြည်သူများ ဗန်းမော် PDFနှင့်ပူးပေါင်းပေးရန်လည်းဖော်ပြခဲ့ပြီး ဗန်းမော် PDF အနေဖြင့် ပြည်သူ လူထု၏ ထိခိုက်နှစ်နာမှုကိုမလိုလားသော ၊ ပြည်သူလူထုအားအမြဲစောင့်ရှောက်သွားမည်ဖြစ်သော ကာကွယ်ရေးတပ်ဖွဲ့ဖြစ်ကြောင်း ထုတ်ပြန်ခဲ့သည်။