အမျိုးသားညီညွတ်ရေးအစိုးရ (NUG) အနေနဲ့ သဘာ၀ပတ်ဝန်းကျင်အရေး တက်ကြွလှုပ်ရှားတဲ့ အဖွဲ့အစည်းတွေကို အကူညီပေးဖို့ ကရင်မြစ်ချောင်းများစောင့်ကြည့်ရေးကွန်ယက်က ကြေညာချက်ထုတ်ပြန်လိုက်ပါတယ်။
သဘာ၀ပတ်ဝန်းကျင်အဖွဲ့တွေကို အသိအမှတ်ပြုပြီး လုပ်ငန်းတွေကောင်းမွန်စွာ အကောင်အထည်ဖော်လည်ပတ်နိုင်ဖို့ ငွေကြေး၊ နည်းပညာနဲ့ အကြံဉာဏ်ထောက်ပံ့မှုတွေကို ဒေသခံပြည်သူလူထုနဲ့အတူ ပူးပေါင်းပါဝင်ပံ့ပိုးကူညီပေးဖို့ ကရင်မြစ်ချောင်းများစောင့်ကြည့်ရေးကွန်ယက်က ကြေညာချက်ထုတ်ပြန်ခဲ့တာပါ။
ဒီကနေ့ မတ်လ ၁၄ ရက်မှာကျရောက်တဲ့ မြစ်ချောင်းများအခွင့်အရေးအတွက် နိုင်ငံတကာလှုပ်ရှားမှုနေ့မှာ ကော်သူးလေဒေသနဲ့ မြန်မာပြည်တစ်ဝှမ်းရှိ ဌာနေတိုင်းရင်းသားတွေရဲ့ အသက်သွေးကြောဖြစ်တဲ့ မြစ်ချောင်းတွေပေါ်မှာ သဘာ၀ပတ်ဝန်းကျင်နဲ့ ဌာနေတိုင်းရင်းသားတွေရဲ့ အသက်မွေးဝမ်းကျောင်းမှုကို ထိခိုက်ပျက်စီးစေမယ့် အကြီးစားရေကာတာစီမံကိန်း တည်ဆောက်မှုအစီအစဉ်ကို ဖျက်သိမ်းပေးဖို့ တောင်းဆိုချက်ကို ကရင်မြစ်ချောင်းများစောင့်ကြည့်ရေးအဖွဲ့၊ ကရင်အရပ်ဖက်အဖွဲ့အစည်းတွေနဲ့ အီးတုထစစ်ရှောင်စခန်းက ဌာနေပြည်သူလူထုတွေနဲ့ပူးပေါင်းပြီး သထောထားထုတ်ပြန်တာဖြစ်ပါတယ်။
NUG အနေနဲ့ လူထုကိုထိခိုက်စေတဲ့ အကြီးစားဆည်တွေတည်ဆောက်မှုအပေါ် ဆန့်ကျင်ကန့်ကွက်တဲ့ ညွှန်ကြားချက်တွေကို ထုတ်ပြန်ပေးဖို့ ကရင်မြစ်ချောင်းများစောင့်ကြည့်ရေးကွန်ယက်က တောင်းဆိုလိုက်တာဖြစ်ပါတယ်။
Public Service Announcement
ဒါ့အပြင် အမျိုးသားညီညွတ်ရေးအတိုင်ပင်ခံကောင်စီ (NUCC) အနေနဲ့ ဖက်ဒရယ်ဒီမိုကရေစီလမ်းကြောင်းတည်ဆောက်ဖို့ မူဝါဒရေးဆွဲရာမှာ ဌာနေတိုင်းရင်းသားတွေရဲ့နေထိုင်မှု အသက်မွေးဝမ်းကြောင်းနဲ့ကိုက်ညီတဲ့ သဘာ၀ပတ်ဝန်းကျင်ဆိုင်ရာမူဝါဒတွေကို အထူးအလေးထားထည့်သွင်းရေးဆွဲဖို့၊ မူဝါဒရေးဆွဲရာမှာလည်း သဘာ၀ပတ်ဝန်းကျင်ကို ထိခိုက်ပျက်စီးစေတဲ့ အကြီးစားရေကာတာစီမံကိန်းတွေ တည်ဆောက်တာကို လုံး၀တားမြစ်ပိတ်ပင်တဲ့ မူဝါဒချမှတ်ဖို့၊ ဒေသခံလူထု အရပ်ဖက်အဖွဲ့အစည်း ကေအဲန်ယူတို့နဲ့ အတူတကွပူးပေါင်းပါဝင်ရေးဆွဲဖို့ တောင်းဆိုထားပါသေးတယ်။
ကေအဲန်ယူအနေနဲ့ ကော်သူးလေကပြဌာန်းထားတဲ့ သဘာ၀ပတ်ဝန်းကျင်နဲ့ဆက်စပ်တဲ့ တည်ဆဲမူဝါဒတွေနဲ့အညီ မြစ်ချောင်း သစ်တောအရင်းအမြစ်တွေနဲ့ မျိုးတုန်းပျောက်ကွယ်လုတဲ့ တိရိစ္ဆာန်မျိုးစိတ်တွေ၊ ဒီရေတောစတဲ့ သဘာ၀အရင်းအမြစ်တွေကို ထိန်းသိမ်းကာကွယ်ပေးဖို့နဲ့ လက်တွေ့အကောင်အထည်ဖော်ဆောင်ရွက်ဖို့၊ ကော်သူးလေဒေသက သဘာ၀အရင်းအမြစ်တွေကို အကြီးစားစီးပွားရေးလုပ်ငန်းရှင်တွေနဲ့ ကိုယ်ကျိုးစီးပွာအတွက် အမြတ်ထုတ်သူတွေရဲ့ လက်ဝါးကြီးအုပ်စိုးမှုအောက်မှာ မကျရောက်စေဖို့အတွက် ထိထိရောက်ရောက် အရေးယူကာကွယ်တားဆီးပေးဖို့ကလည်း တောင်းဆိုသေးတာပါ။
ဒါ့အပြင် နိုင်ငံတကာအသင်းအဖွဲ့အနေနဲ့ကလည်း မတရားအာဏာသိမ်းယူထားတဲ့ မင်းအောင်လှိုင်ဦးဆောင်တဲ့ စစ်ကောင်စီအဖွဲ့ကို တရားဝင်အစိုးရပ်တစ်ရပ်အဖြစ် အသိအမှတ်မပြုကြောင်း ထုတ်ပြန်ကြေညာပေးဖို့၊ ပြည်ပရင်းနှီးမြုပ်နှံမှုလုပ်ငန်းတွေအနေနဲ့ စစ်ကောင်စီကို ငွေကြေးပံ့ပိုးမှုဖြစ်စေတဲ့ စီးပွားရေးလုပ်ငန်းတွေကို ချက်ချင်းရပ်တန့်ပေးဖို့နဲ့ စစ်ဘေးရှောင်တွေကို ပြည်သူတစ်ဦးချင်းစီကအစ တတ်နိုင်တဲ့ဘက်ကနေ အကူအညီပေးဖို့ ကရင်မြစ်ချောင်းများစောင့်ကြည့်ရေးကွန်ယက်က တောင်းဆိုကြေညာလိုက်တာဖြစ်ပါတယ်။
