ကရင်အမျိုးသားအစည်းအရုံး(KNU) တပ်မဟာ(၅) ရှေ့တန်းနယ်မြေ၌ ကျဆုံးထိခိုက် ဖမ်းဆီးခံရမှုများခဲ့သည့် ကော့ကရိတ်အခြေစိုက် ခလရ(၉၇)တပ်မှ စစ်သည်များ၏ ဇနီးများအား ပေးထားသည့် လက်နက်များကို တပ်ကပြန်လည်သိမ်းယူလိုက်ကြောင်း သိရသည်ဟု ကော့ကရိတ်ဒေသခံတစ်ဦးက ပြောသည်။
ဖာပွန်ခရိုင်တွင် မတ်လ ၁၁ရက်က ဖြစ်ပွားခဲ့သည့် တိုက်ပွဲတွင် ခလရ (၉၇)တပ်မှ ၁၆ဦးကို အရှမ်ဖမ်းမိခဲ့ပြီး တိုက်ပွဲ၌ စစ်ကောင်စီတပ်မှ သေဆုံးထိခိုက်ဒဏ်ရာရသူများပြားခဲ့ကြောင်း၊ လက်နက်မျိုးစုံ ၂၉လက်နှင့် ခဲယမ်းအများအပြားသိမ်းဆည်းရမိခဲ့ကြောင်း KNUက ဓာတ်ပုံ၊ ရုပ်သံတို့ဖြင့် ထုတ်ပြန်ခဲ့သည်။
ထိုသို့ ထုတ်ပြန်ခဲ့ပြီးနောက် ခလရ(၉၇)တပ်တွင်း၌ စစ်သည်များ၏ အမျိုးသမီးများ ဆောက်တည်ရာမရဖြစ်ကာ မကျေနပ်မှုများဖြစ်ခဲ့၍ အမှတ်(၁၂) စစ်ဆင် ရေးကွပ်ကဲမှုဌာနချုပ် (စကခ-၁၂)မှ ဗျူဟာမှူးကိုယ်တိုင် လာရောက် ထိန်းသိမ်းခဲ့ရသည်ဟု အဆိုပါ တပ်နှင့် နီးစပ်သူကို ကိုးကားပြီး ကော့ကရိတ်ဒေသခံက People’s Spring ပြောသည်။
“အဲဒီမှာ ဗျူဟာမှူးလက်နက်တွေ လာသိမ်းလိုက်ကုန်ပြီ။ အဲဒီလိုရှိတယ်လို့ပဲပြောရမှာပဲ။ ဆန္ဒပြတယ်ဆိုတာတော့ ထွက်အော်တာ ထွက်ပြတာတော့ ဘယ်ဟုတ်မလဲ။ အဲဒီအထဲမှာပဲ သူတို့အထဲမှာပဲ ပြောကြဆိုကြ ပုံစံမျိုးဖြစ်မှာပေါ့။ လက်နက်သိမ်းတာက စကခ ၁၂က ဗျူဟာမှူးလား မသိဘူး သူတို့ဆီက မိန်းကလေးတွေ ကိုင်တဲ့ သေနတ်တွေ အကုန်လုံး သိမ်းယူလိုက်တယ်လေ။ သူတို့ အချင်းချင်းပေါ့ကွာ” ဟု ဒေသခံက ပြောသည်။
Public Service Announcement
စစ်အုပ်စုကအာဏာသိမ်းပြီးနောက်ပိုင်း နိုင်ငံတစ်ဝန်း ပြည်သူ့ကာကွယ်ရေးတပ်များနှင့် တိုင်းရင်းသားလက်နက်ကိုင်အဖွဲ့များက ခုခံကာကွယ်စစ်များဖြင့် တုံ့ပြန်နေသဖြင့်
အကြမ်းဖက်စစ်ကောင်စီတပ်များတွင်အင်အားနည်းလာသဖြင့် ယောက်ကျားသား စစ်သည်များ ရှေ့တန်းထွက်နေစဉ် စစ်သည်၏ ဇနီးများအား လက်နက်ကိုင်ဆောင်စေကာ
တပ်လုံခြုံရေးကိုပါ တာဝန်ပေးလာခြင်းဖြစ်သည်။
“အခုဒီလို ဖြစ်တော့ သူ့တို့ ယောက်ျားတွေဆုံးရှုံးရတယ် သူတို့ ယောက်ျားတွေ သူများဖမ်းမိတယ်။ နောက်ပိုင်းမှာနေတဲ့ သူတွေကျတော့ တစ်ယောက်နဲ့ တစ်ယောက် မကျေမနပ်တွေဖြစ် တပ်တွင်း ဆူပူမှုတွေပေါ့ကွာ”ဟု ဒေသခံက ပြောသည်။
ကော့ကရိတ်အခြေစိုက် သတင်းဌာန ကော့ကရိတ်ပွင့်လင်း သတင်းစဉ် တွင် ခလရ(၉၇) တွင် တပ်တွင်း ဆန္ဒပြမှု ဖြစ်ပွား၍ ဆန္ဒပြသည့် စစ်သည် မိသားစုဝင်အချို့ ဖမ်းဆီးခံထားရသည်ဟု ဖော်ပြထားရာ ယင်းနှင့်ပတ်သက်၍ လိုက်လံစုံစမ်းသော်လည်း သီးခြားအတည် ပြုချက်မရသေးပေ။
