▪️ပျူအဖြစ်မှ နှုတ်ထွက်ရန် ဆန်၁၀အိတ်နှင့် ကျပ်တစ်သိန်းပေးရဟုဆို
မကွေးတိုင်း ဂန့်ဂေါမြို့နယ် ဟံသာဝတီရွာမှ ပျူစောထီး ၁၀ဦး လက်နက်များနှင့်အတူ ထွက်ပြေးခဲ့ပြီး ကျန်ရှိ ရွာခံအမျိုးသားများသည် ပျူစောထီးအဖွဲ့ဝင်ဖြစ် နှုတ်ထွက်ခွင့်ရရန် ဆန်အိတ် ၁၀အိတ်နှင့် ကျပ်တစ်သိန်းပေးနေရသည်ဟု ဒေသခံသတင်းရင်းမြစ်များနှင့် ပြည်သူ့ကာ ကွယ်ရေးတပ်ဖွဲ့ဝင်အချို့က People’s Springသို့ ပြောသည်။
အကြမ်းဖက်စစ်ကောင်စီတပ်က ချပေးထားသည့် ကာဘိုင်သေနတ်များနှင့်အတူ ဟံသာဝတီကျေးရွာမှ ပျူစောထီး၁၀ဦးမှာ ယမန်နေ့(မတ်လ ၂၀ရက်) ညနေပိုင်းက ထွက်ပြေးသွားခဲ့သည်ဟု ဆိုသည်။
“ထွက်ပြေးတာမှာ လက်နက် တွေလည်းပါတယ်။ မနေ့က ဖြစ်တာ။အခုထိတော့ ထွက်ပြေးတဲ့သူတွေနဲ့မြေပြင်အဖွဲ့တွေ ချိတ်ဆက်နေတုန်းပဲ”ဟု ယောဒေသနယ်မှ Phoenix Defence Battalionတပ်ဖွဲ့ တာဝန်ရှိသူတစ်ဦးက ပြောသည်။
Public Service Announcement
မြေပြင်အဖွဲ့ များအနေဖြင့် ထွက်ပြေးလာသည့် ဟံသာဝတီရွာသား ၁၀ဦးတွင် လက်နက်များပါလာသည့်အတွက် ဂရုပြုကိုင်တွယ်ဖြေရှင်းကြရန် အကြံပြုသည်။
အလားတူ ယနေ့(မတ်လ ၂၁ ရက်) နံနက်ပိုင်းကစ၍ ဟံသာဝတီရွာ၌ ပျူစောထီးအဖွဲ့ဝင်အဖြစ်မှ နှုတ်ထွက်ခွင့်ရရှိရေး ရုန်းရင်းဆန်ခတ် အငြင်းပွားမှုများရှိနေသည်ဟုလည်း Yaw Media က ဆိုသည်။
ပျူစောထီးအဖွဲ့ဝင်အဖြစ် မလုပ်ချင်လျှင် သော် လည်းကောင်း ပျူစောထီး သင်တန်းမတက်ချင်လျှင်သော်လည်းကောင်း နှုတ်ထွက်နိုင်သော်လည်း နှုတ်ထွက်ပါက ဆန် ၁၀အိတ်နှင့် ကျပ်တစ်သိန်းပေးဆောင်ရမည်ဟု ဆုံးဖြတ်ချက် စစ်ကောင်စီတပ်နှင့် ဟံသာဝတီရွာ ပျူခေါင်းဆောင်များက ဆုံးဖြတ်ကြောင်း သိရသည်။
“အစည်းဝေးတွင် ပျူ ၃၁၅ ဦး နှုတ်ထွက်သွား ။ ထို့ကြောင့် ဟံသာဝတီ ဦးဇင်းမှ ရွာသားများအား ပြန်ခေါ်ယူပြီး ၁၀တန်း စာမေးပွဲဖြေနေသည့်အတွက် တစ်လ တာဝန်ထမ်းဆောင်ပေးရန် ပြန်လည်တောင်းဆိုခဲ့ပြီး ဆယ်တန်းစာမေးပွဲ ပြီးပါက နှုတ်ထွက် ခွင့်ပြုပေးသွားမည်လို့ ပြောဆိုခဲ့တယ်လို့ သိရပါတယ်”ဟု Yaw Media ကဖော်ပြသည်။
သို့သော် လက်ရှိတွင် ပျူစောထီး ၃၁၅ ဦးအနက်မှ ၈၀ ခန့်မှာ ဆန် ၁၀အိတ်နှင့် ကျပ်တစ်သိန်းကို ချက်ချင်းပေးချေခဲ့ပြီးနောက် ကျန်ရှိသူများက မပေးဆောင်နိုင်သည့်အတွက် အငြင်းပွားမှုများ တိုးလာကြောင်းလည်း အသိပေးသည်။
ဂန့်ဂေါမြို့နယ်သည် အကြမ်းဖက်စစ်တပ်၏ အမာခံနယ်မြေများရှိပြီး ဟံသာဝတီ၊ကုက္ကာရွာ၊ မြောက်ခရန်ရွာတို့သည့် ပျူစောထီး အဖွဲ့အားကောင်းရာ ဒေသဖြစ် သည်။
