ကရင်အမျိုးသားအစည်းအရုံး(KNU/KNLA) တပ်မဟာ (၁)နယ်မြေ ဘီးလင်းတိုးဂိတ်အဟောင်း၌ တပ်စွဲထားသော စစ်ကောင်စီတပ်အား ယမန်နေ့ညပိုင်းက သွား ရောက်တိုက်ခိုက်ခဲ့ကြောင်း သထုံပြည်သူ့ကာကွယ် ရေးတပ်(PDF)က သတင်းထုတ်ပြန်သည်။
ကရင်အမျိုးသားလွတ်မြောက်ရေးတပ်မတော်- KNLA တပ်မဟာ(၁)၊ တပ်ရင်း(၂) နှင့်သထုံ PDF ပူးပေါင်းအဖွဲ့က မတ်လ ၂၈ရက် ညနေ ၆နာရီခန့်တွင် စစ်ကောင်စီတပ်ကို ၄၀ မမ ဗုံးသီးများဖြင့်သွားရောက် ပစ်ခတ်ခဲ့ခြင်းဖြစ်ကြောင်း ဖော်ပြထားသည်။
အဆိုပါ တိုက်ခိုက်မှုတွင် စစ်ကောင်စီတပ်မှ သေဆုံးထိခိုက်မှုရှိ၊မရှိကို ဖော်ပြမထားပေ။
KNUနှင့် သထုံ PDFပူးပေါင်းအဖွဲ့သည် ယမန်နေ့ နံနက်ကလည်း ဘီးလင်းမြို့ရဲစခန်းနှင့် မြို့နယ်ထွေအုပ်ရုံးအားသွားရောက်ပစ်ခတ်တိုက်ခိုက်ခဲ့သည်ဟု ထုတ်ပြန်ထားသည်။
ထို့အပြင် မတ်လ ၂၆ရက်ကလည်း သထုံမြို့နယ် ပိန္နဲတော ကျေးရွာရှိ စစ်ကောင်စီတပ်စခန်း နှစ်နေရာနှင့် မတ်လ ၂၁ရက်က သထုံမြို့နယ် ဝင်းပကျေးရွာနှင့် ဝီယော်ကျေးရွာမှ စစ်ကောင်စီတပ်စခန်း နှစ်နေရာကို KNU/PDF ပူးပေါင်းတပ်က သွားရောက်တိုက်ခိုက်ခဲ့ကြောင်း၊ စစ်ကောင်စီတပ်မှ သေဆုံးထိခိုက်မှုများရှိကြောင်း ဖော်ပြထားသည်။