မန္တလေးတက္ကသိုလ်ကျောင်းသားသမဂ္ဂ ဥက္ကဌဟောင်း ကိုကျော်ဝင်းစိန်အား ဟုမ္မလင်းမြို့ လူထုသပိတ်တွင်ပါဝင်ခဲ့သည်ဟုဆိုကာ အကြမ်းဖက် စစ်ကောင်စီက ဖမ်းဆီးသွားပြီးနောက် မိသားစုဝင်များနှင့် အဆက်အသွယ်ပြတ် တောက်နေသည်။
ဟုမ္မလင်းမြို့ခံ ကိုကျော်ဝင်းစိန်ကို အကြမ်းဖက်စစ်ကောင်စီက သြဂုတ် ၁ရက် တွင် မန္တလေးမြို့၌ ဖမ်းဆီးသွားခြင်းဟု ကိုကျော်ဝင်းစိန်၏ သူငယ်ချင်းများနှင့် ဆွေမျိုးများက ပြောသည်။
” ဖမ်းဆီးခံရပြီးကတည်းက ဘာသတင်းမှ မကြားလို့ စိတ်ပူနေကြရတယ်။ သူနဲ့အတူ သူ့မိတ်ဆွေမိန်းကလေးလည်း အဖမ်းခံလိုက်ရတယ်။ သူတို့ ဘယ်မှာရှိနေတယ်ဆိုတာလည်း မကြားရဘူးဖြစ်နေတယ်”ဟု ကိုကျော်ဝင်းစိန် ၏ ဆွေမျိုးတစ်ဦးက ပြောသည်။
အသက်(၂၄)နှစ်အရွယ် ကိုကျော်ဝင်းစိန်သည် မန္တလေးတက္ကသိုလ်ကျောင်းသား သမဂ္ဂ ဥက္ကဌဟောင်းလည်းဖြစ်သည်။ ၎င်းအား စစ်ကောင်စီတပ်က ဟုမ္မလင်းမြို့စစ်တပ်အတွင်း စစ်ဆေးနေကြောင်းသတင်းကြားရသလို မန္တလေးမြို့စစ်ကြောရေးတွင် ရှိနေဆဲဟုလည်း သတင်းများထွက်ပေါ်နေသည်။
ကိုကျော်ဝင်းစိန်တို့နှစ်ဦး ဖမ်းဆီးခံရပြီးနောက် မိသားစုဝင်များနှင့် အဆက် အသွယ် ပြတ်တောက်နေသည်မှာ ယနေ့(သြဂုတ် ၄ရက်)ဆိုလျှင် လေးရက် မြောက်ပြီဖြစ်သည်။