အမေရီကန်နှင့်နိုင်ငံတကာက စစ်ကောင်စီ၏MOGE အားဒဏ်ခပ်အရေးယူရန်တောင်းဆိုနေကြချိန်တွင်ကိုရီးယားကုမ္ပဏီက ဆက်လက်လုပ်ကိုင်ရန်စီစဥ်နေ
ကိုရီးယား POSCO ကုမ္ပဏီက စစ်ကောင်စီနှင့် ပူးပေါင်း၍ ရခိုင်ကမ်းလွန်တွင် သဘာဝဓာတ်ငွေ့တူးဖော်ရန်အတွက် သဘာဝပတ်ဝန်းထိခိုက်မှုလေ့လာမှုဆန်းစစ်ချက်(EIA)ကို အောက်တိုဘာ ၁၇ ရက်တွင် စတင်ဆောင်ရွက်မည်ကြောင်း ထုတ်ပြန်သည်။
ရခိုင်ကမ်းလွန်ရှိ ကမ်းလွန်လုပ်ကွက်အမှတ် A-1 ဧရိယာတွင် သဘာဝပတ်ဝန်းကျင်ထိခိုက်မှုဆန်းစစ်ချက်များကို အောက်တိုဘာ ၁၇ ရက်မှ အောက်တိုဘာ ၃၀ ရက်အထိဆောင်ရွက်မည်ဖြစ်ကြောင်း၊ ကမ်းလွန်လုပ်ကွက်အမှတ် A-1စီမံကိန်း၏ ၄ ကီလိုမီတာ (နှစ်မိုင်ခွဲ)အတွင်း သင်္ဘောကြီးငယ်များ သွားလာခြင်းမပြုရန် စစ်ကောင်စီက တားမြစ်ကြောင်းထုတ်ပြန်သည်။
ဥရောပသမဂ္ဂက စစ်ကောင်စီလက်အောက်ခံ MOGE(မြန်မာ့ရေနံနှင့်သဘာဝဓာတ်ငွေ့လုပ်ငန်း)ကို ပိတ်ဆို့အရေးယူများချမှတ်ထား ပြီး ၊ အမေရီကန်နိုင်ငံကပါ MOGE ကို ပိတ်ဆို့အရေးယူဒဏ်ခပ်ရန်တောင်းဆိုနေကြချိန်တွင် ကိုရီးယား POSCOကုမ္ပဏီက စစ်ကောင်စီနှင့် ဆက်လက်လက်တွဲလုပ်ကိုင်နေခြင်းဖြစ်သည်။
ရခိုင်မြောက်ပိုင်းရှိ A-1 နှင့်A-3 ကမ်းလွန်လုပ်ကွက်များကို ကိုရီးယားကုမ္ပဏီက လုပ်ခွင့်ရထားသည်။ ထိုလုပ်ကွက်များတွင် ဒေါ် လာ သန်း ၅၀၀ ခန့် ထပ်မံရင်းနှီးမြှုပ်နှံပြီး သဘာဝဓာတ်ငွေ့ရှာဖွေရေးလုပ်ငန်းများလုပ်ကိုင်မည်ဟုကိုရီးယားPosco Daewooကုမ္ပဏီက ၂၀၁၈ တွင်ထုတ်ပြန်ထားသည်။
Public Service Announcement
ထိုကုမ္ပဏီသည် A-1 ကမ်းလွန်လုပ်ကွက်ကို ရှယ်ယာ ၅၁ ရာခိုင်နှုန်းဖြင့်အများဆုံးရင်းနှီးမြှုပ်နှံထားသည်။အိန္ဒိယ အစိုးရပိုင် ရေနံနှင့် သဘာဝဓာတ်ငွေ့ကော်ပိုရေးရှင်း (ONGC)၊ မြန်မာ့ရေနံနှင့် သဘာဝဓာတ်ငွေ့လုပ်ငန်း (MOGE)၊ Gail(India)ကုမ္ပဏီနှင့် ကိုရီးယား ဂတ်စ် ကော်ပိုရေးရှင်းတို့ကလည်း ယင်းစီမံကိန်း၌အချိုးကျပါဝင် နေသည်။
