ကချင်ပြည်နယ် ဖားကန့်မြို့နယ် အနန့်ပါဒေသ၌ စစ်ကောင်စီ၏ လေကြောင်းတိုက်ခိုက်မှု ကြောင့် သေဆုံးဒဏ်ရာရသူများအားလုံးအတွက် လွန်စွာဝမ်းနည်းကြောင်း ရှမ်းပြည်ပြန်လည်ထူထောင်ရေးကောင်စီ(RCSS)က ယနေ့ ထုတ်ပြန်ကြေညာသည်။
အောက်တိုဘာ ၂၃ရက် ညပိုင်းက အနန့်ပါဒေသ၌ ကချင်လွတ်လပ်ရေးအဖွဲ့(KIO) တည်ထောင်ခြင်း အထိမ်းအမှတ် အကြို ဂီတပွဲကျင်းပနေစဉ် စစ်ကောင်စီတပ်က လေကြောင်းမှ ပစ်ခတ်တိုက်ခိုက်ခဲ့၍ ပြည်သူများ အနုပညာရှင်များ၊ စီးပွားရေးလုပ်ငန်းရှင်များနှင့်KIO/KIA ဝန်ထမ်းများ အသက်ဆုံးရှုံးဒဏ်ရာရခဲ့သည်။
အဆိုပါ ဖြစ်ရပ်ဖြစ်ပွားပြီး ၅ရက်အကြာတွင် RCSSက ဝမ်းနည်းကြောင်း ထုတ်ပြန်ခဲ့ခြင်းဖြစ်သည်။
စစ်ကောင်စီ၏ အနန့်ပါ လေကြောင်း တိုက်ခိုက်မှုလုပ်ရပ်အပေါ် ကရင်အမျိုးသားအစည်းအရုံး(KNU)၊ ကရင်နီအမျိုးသားတိုးတက်ရေးပါတီ(KNPP)၊ ချင်းအမျိုးသားတပ်ဦး(CNF)၊ ကျောင်းသားတပ်မတော်(ABSDF)၊ ရက္ခိုင့်တပ်တော်(AA)၊ တအာင်းတပ်မတော်(TNLA)၊ ကိုးကန့်တပ်မတော်(MNDAA) တို့ကလည်း ဝမ်းနည်းကြောင်း ထုတ်ပြန်ခဲ့ပြီး စစ်ကောင်စီတပ်၏ စစ်ရာဇဝတ်မှု ကျူးလွန်သည့် လုပ်ရပ်အပေါ် မီးမောင်းထိုး ဖော်ပြခဲ့သည်။
Public Service Announcement
RCSS၊ ၀တပ်ဖွဲ့(UWSA)၊ မိုင်းလားတပ်ဖွဲ့(NDAA) စသည့် စစ်ကောင်စီနှင့် ဆွေးနွေးနေသည့် လက်နက်ကိုင်တပ်များကလည်း အနန့်ပါ လေကြောင်းတိုက်ခိုက်ခံရမှု ဖြစ်ရပ်အပေါ် ဝမ်းနည်းကြောင်း ထုတ်ပြန်ခဲ့သည်။ သို့ရာတွင် စစ်ကောင်စီတပ်၏ လုပ်ရပ်အပေါ် ရှုတ်ချထားခြင်းမျိုးမတွေ့ရပေ။
မွန်တပ်ဖွဲ့(NMSP)၊ ပအိုဝ်းအဖွဲ့(PNLO)၊ ရခိုင် (ALP)၊ ရှမ်းတပ်(SSPP)၊ ကရင် DKBAနှင့်ကရင်ငြိမ်းချမ်းရေးကောင်စီ စသည့် လက်နက်ကိုင်အဖွဲ့များကမူ အနန့်ပါ ဖြစ်ရပ်နှင့်ပတ်သက်၍ တစုံတရာ ထုတ်ပြန်ထားခြင်းမတွေ့ရပေ။ အဆိုပါ အဖွဲ့များအားလုံးသည်စစ်ကောင်စီနှင့် ဆွေးနွေးနေသည့် တပ်ဖွဲ့များလည်းဖြစ်သည်။
