ဖားကန့်မြို့နယ်အတွင်း ပြင်းထန်တိုက်ပွဲများက စိုးရိမ်ဖွယ်ဖြစ်ကြောင်း OCHA ထုတ်ပြန်

နိုင်ငံတဝန်း တိုက်ပွဲများဆက်လက်ဖြစ်ပွားနေပြီး ကချင်ပြည်နယ် ဖားကန့်မြို့နယ်အတွင်း ပြင်းထန်တိုက်ပွဲများက စိုးရိမ်ဖွယ်ဖြစ်ကြောင်း ကုလသမဂ္ဂလူသားချင်းစာနာမှုဆိုင်ရာညှိနှိုင်း‌ရေးရုံး (OCHA)က ယနေ့ထုတ်ပြန်သည်။

ပြည်နယ်နှင့် တိုင်းအများအပြားတွင် တိုက်ပွဲများ ဆက်လက်ဖြစ်ပွားနေသော ကြောင့် အရပ်သားထိခိုက်သေဆုံးမှုများနှင့် အိုးအိမ်စွန့်ခွာထွက်ပြေးနေရမှုများ ဖြစ်ပေါ်နေကြောင်း OCHA က ဖော် ပြသည်။

ဖားကန့်မြို့နယ် ဆယ်ဇင်းကျေးရွာတွင် စစ်တပ်၏ လေကြောင်းတိုက်ခိုက်မှုများ ကြောင့် အရပ် သားထိခိုက်သေဆုံးမှုများရှိသကဲ့သို့ အနည်းဆုံးအိမ်ခြေ ၃၀၀ ခန့်မီးသင့်ခဲ့၍ အိမ်ထောင်စု ၅၀၀ ခန့်ထိခိုက်ခဲ့သည်ဟု OCHA က ထုတ်ပြန်သည်။

ဆယ်ဇင်းကျေးရွာမှ ထွက်ပြေးကြရသည့် လူဦးရေမှာ လက်ရှိအချိန်အထိ ၂,၀၀၀ ကျော်ရှိပြီဖြစ်ပြီး တာမခံနှင့် ဟောင်ပါးကျေးရွာများရှိ တိုက်ပွဲရှောင်စခန်း ၆ ခုတွင် အများဆုံးရောက်ရှိ နေကြောင်း သိရသည်။

Public Service Announcement

“ဆယ်ဇင်းကျေးရွာ အတွင်းမှာ ပိတ်မိနေသူတွေလည်းရှိနေသေးတာကြောင့် အိုးအိမ်စွန့်ခွာရသူ အရေအတွက်ဟာ ဒီထက်ပိုများလာနိုင်တယ်လို့ ခန့်မှန်းရပါတယ်။ ဖားကန့်မြို့နယ်တွင်း အိုးအိမ်စွန့်ခွာထွက်ပြေးလာသူတွေကို ဒေသခံမိတ်ဖက်အဖွဲ့အစည်းတွေကနေတဆင့် လိုအပ်တဲ့အကူအညီတွေ စတင်ပေးနေပြီဖြစ်သလို ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးရုံးဟာလည်း လူသားချင်းစာနာမှုဆိုင်ရာအကူအညီတွေ သွားရောက်ပေးနိုင်ရေး သေချာစေဖို့ သက်ဆိုင်ရာအဖွဲ့အစည်းအမျိုးမျိုးနဲ့ ချိတ်ဆက်ဆောင်ရွက်လျက်ရှိပါတယ်”ဟု OCHA က ဆိုသည်။

၂၀၂၁ ဖေဖော်ဝါရီ အာဏာသိမ်းယူမှုအပြီး ဖြစ်ပေါ်လာတဲ့ ပဋိပက္ခနဲ့မလုံခြုံမှု တွေကြောင့် အိုးအိမ်စွန့်ခွာထွက်ပြေးရသူ ၉၀၃,၀၀၀ ဦးအပါအဝင် လူဦးရေ ၁ ဒသမ ၂ သန်းကျော် (၁,၂၄၉,၆၀၀) နေရပ်စွန့်ခွါထွက်ပြေးနေရဆဲဖြစ်ကြောင်း ဩဂုတ် ၈ ရက်ထုတ် ကုလသမဂ္ဂ၏နောက်ဆုံးစာရင်း များ၌ ဖော်ပြသည်။