စစ်ကောင်စီ၏ လေကြောင်းတိုက်ခိုက်မှုများကို ကြိုတင်သတိပေး ကာကွယ်နိုင်ရေးအတွက် လေကြောင်းကင်းထောက်များအဖြစ် တာဝန်ထမ်းဆောင်နိုင်မည့် ပြည်သူများအား အလိုရှိကြောင်း အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက တရားဝင် ဖိတ်ခေါ်လိုက်သည်။
လေကြောင်းကင်းထောက်များအဖြစ် တာဝန်ထမ်းဆောင်နိုင်မည့် ပြည်သူများအား ဖိတ်ခေါ်ချက် ကို ယနေ့(ဖေဖော်ဝါရီ ၁၆ရက်)နံနက်တွင် တရားဝင် ထုတ်ပြန်ခြင်းဖြစ်သည်။
စစ်ကောင်စီတပ်၏ လေကြောင်းလှုပ်ရှားမှုများကို အချိန်နှင့်တပြေးညီ သိရှိနိုင်စေရန်အတွက် လေတပ်စခန်းများအပါအဝင် လေယာဉ်ကွင်း၊ ရဟတ်ယာဉ်ကွင်းများကို ပုံမှန်စောင့်ကြည့်သတင်းပေးပို့ခြင်း၊ လေကြောင်းသွားလာမှု လမ်းကြောင်းတလျှောက် သတင်းပေးပို့ခြင်းများလိုအပ်ကြောင်း ထုတ်ပြန်ချက်တွင် ဖော်ပြထားသည်။
လေကြောင်းကင်းထောက်အဖြစ် ဆောင်ရွက်လိုသည့် တာဝန်သိပြည်သူများအနေဖြင့် ကာကွယ် ရေးဝန်ကြီးဌာနက၏ telegram https://t.me/MASurveillance24 သို့ ဆက်သွယ် သတင်းပေးပို့ကြရန်လည်း တိုက်တွန်းထားသည်။
Public Service Announcement
ပြည်သူ့အသက်အိုးအိမ်ကို ပြည်သူ့အားဖြင့် ကာကွယ်နိုင်ရေးအတွက်ရည်ရွယ်ကြောင်းလည်း အမျိုးသားညီညွတ်ရေးအစိုးရ ကာကွယ်ရေးဝန်ကြီး ဌာနက ဖော်ပြထားသည်။
စစ်ကောင်စီတပ်သည် မြေပြင်တိုက်ပွဲများတွင် အထိနာနေပြီး ပြည်သူ့ကာကွယ်ရေးတပ်များနှင့် ပြည်သူများအား လေကြောင်းမှ တိုက်ခိုက်မှုများ ပြုလုပ်နေသည်။ စစ်ရေးအရှိန်မြှင့်မည်ဟု အမျိုးသားညီညွတ်ရေးအစိုးရက ကြေငြာပြီးနောက် လေကြောင်းကင်းထောက်များအဖြစ် တာဝန်ထမ်းဆောင်နိုင်မည့် ပြည်သူများအား အလိုရှိကြောင်း ယခုကဲ့သို့ ထုတ်ပြန်ခြင်းဖြစ်သည်။
“ကိုယ့်အစိုးရက ဖိတ်ခေါ်တာမို့ ကျွန်မတို့က ကင်းထောက်အဖြစ် လုပ်ကိုလုပ်မှာ။ ပုသိမ်လေတပ်ကနေ စစ်လေယာဉ်တွေ ပျံတက်သံကြားတိုင်း ဘယ်ကိုသတင်းပေးရမယ်မှန်းမသိခဲ့ဘူး။ ပျက်ကျပါစေ ပဲဆုတောင်းနေရတာ။ အခုကတော့ သတင်းပေးလို့ရပြီ”ဟု ဧရာဝတီတိုင်း၊ ပုသိမ်မြို့ခံတစ်ဦးက ပြောသည်။
