'/%3E%3C/svg%3E){kind=small}
စစ်ကိုင်းတိုင်း ကန့်ဘလူမြို့နယ် ပဇီကြီးကျေးရွာဘက်ကို စစ်ကြောင်းထိုးလာသည့် စစ်ကောင်စီတပ်က ယနေ့ နံနက်အစောပိုင်းတွင် စစ်ဘေးရှောင် သက်ကြီးရွယ်အို နှစ်ဦးအား သတ်ဖြတ်သွားကြောင်း ဒေသခံများက ပြောသည်။
” ပဇီကြီးနဲ့ မဲဇတော် ရွာကြားမှာ သတ်သွားတာ။ စစ်ကြောင်းက ရှိနေသေးလို့ ကျွန်တော်တို့ အလောင်းသွားမကောက်ရဲလို့ မကောက်ရသေးဘူး”ဟု စစ်ဘေးရှောင်အရပ်သားတစ်ဦးကပြောသည်။
အသတ်ခံရသူနှစ်ဦးမှာ အသက်(၇၀)ခန့်အရွယ် ဦးမောင်ကိုလေးနှင့် ဦးတင်မြင့်တို့ ဖြစ်ပြီး ပဇီကြီးရွာအနီး ထန်းတောရွာမှဖြစ်သည်ဟု သိရသည်။ စစ်ကောင်စီစစ်ကြောင်းမှ လွတ်အောင် ပြေးလွှားရင်း မပြေးနိုင်တော့ဘဲသတ်ဖြတ်ခံလိုက်ရခြင်းဟု ဒေသခံတစ်ဦးက ပြောသည်။
ပဇီကြီးရွာ ဝင်ရောက်လာသည့် စစ်ကောင်စီစစ်ကြောင်းတွင် အင်အား ၃၀၀ခန့်ပါရှိပြီး ဧပြီ ၁၉ရက်နံနက်တွင် မန္တလေးတိုင်း သပိတ်ကျင်းမြို့ဘက်မှ တက်လာခြင်းဟု ဆိုသည်။
Public Service Announcement
ပဇီကြီးရွာကို စစ်ကောင်စီစစ်ကြောင်း နှစ်ကြောင်းခွဲ မွှေနှောက်နေပြီး ပဇီကြီးရွာအပါအဝင် ကျေးရွာ ခုနစ်ရွာမှ စစ်ဘေးရှောင်အရပ်သားများ ထပ်မံထွက်ပြေးနေရကြောင်း သတင်းရရှ်ိသည်။
စစ်ကောင်စီတပ် စစ်ကြောင်းထိုးလာ၍ ပဇီကြီး၊ မဲဇတော်၊ ရွာသာယာ၊ထန်းတော၊ ချောင်းသာနှင့် ချောင်းမကြီးစသည့် ကျေးရွာဒေသခံများ ဘေးလွတ်ရာသို့ ထွက်ပြေးနေရကြောင်း သတင်းရရှိသည်။
” အခုစစ်ကြောင်းက ပစ်မှတ်တစ်ခုကို ဝင်တော့မယ်ဆို ပတ်ချာလည်က ဝိုက်ဝင်တာ။မနေ့ကဆိုရင် ကျွန်တော်တို့ကို သူတို့က ဝိုက်၊ ကျွန်တော်တို့က သူတို့နောက်က ပြန်ဝင်ပြီး သူတို့လာတဲ့လမ်းကနေ ပြန်ထွက်ပြေးရတာ”ဟု ပဇီကြီးရွာဒေသခံတစ်ဦးက ပြောသည်။
ထို့အပြင် ပဇီကြီးရွာကို စစ်ကောင်စီက ဧပြီ ၁၁ရက်တွင် လေကြောင်းမှ တိုက်ခိုက်ခဲ့ရာ ကလေးငယ်နှင့် အမျိုးသမီးများအပါအဝင် အရပ်သား ၁၆၈ဦးထက်မနည်း သေဆုံးသွားခဲ့သည်။ ယင်းတိုက်ခိုက်မှုကို ကုလသမဂ္ဂအပါအဝင် နိုင်ငံတကာက ပြစ်တင်ရှုတ်ချနေချိန်တွင် ပဇီကြီးရွာကို မြေပြင်မှပါ စစ်ကောင်စီက စစ်ကြောင်းထိုးနေခြင်းဖြစ်သည်။
