ဗြိတိန်သည် မြန်မာနိုင်ငံအနောက်မြောက်ပိုင်းရှိ မိုခါဆိုင်ကလုန်းမုန်တိုင်းသင့်ပြည်သူများအတွက် အမေရိကန်ဒေါ်လာ နှစ်သန်းခွဲ ထောက်ပံ့ကူညီမည်ဟု မြန်မာနိုင်ငံဆိုင်ရာဗြိတိန်သံရုံးက ကြေညာသည်။
မြန်မာနိုင်ငံ အနောက်မြောက်ပိုင်းတွင် မိုခါဆိုင်ကလုန်းမုန်တိုင်းသင့် ပြည်သူ ၁၇၅,၀၀၀ အတွက် လူသားချင်းစာနာထောက်ထားမှုဆိုင်ရာ အထောက်အပံ့များကို ဗြိတိန်က ပေးအပ်သွားမည်ဖြစ်ပြီး တတိ ယမြောက် ချားလ်စ်ဘုရင်ကလည်း မိုခါဆိုင်ကလုန်းမုန်တိုင်းသင့်ပြည်သူများအတွက် ဝမ်းနည်းကြောင်း သဝဏ်လွှာ ထုတ်ပြန်ခဲ့သည်။
“အခုလိုအကူအညီများစွာလိုအပ်နေတဲ့အချိန်မှာ ကြောက်မက်ဖွယ်ကောင်းတဲ့ သဘာဝဘေးအန္တရာယ် ကြုံတွေ့ခဲ့ရသူတွေအားလုံးအတွက် ကျွန်တော်တို့ သတိရဆုတောင်းပေးနေပါတယ်။ အခုလို အဖြစ်ဆိုးမှာ မိမိတို့ရဲ့ ချစ်ရသူများ ဆုံးရှုံးခဲ့ရတဲ့အတွက်လည်း နက်ရှိုင်းစွာဝမ်းနည်းကြေကွဲရပါတယ်” ဟု ဗြိတိန်ဘုရင်က ထုတ်ပြန်သည်။
ဗြိတိန်သည် ရန်ပုံငွေအသစ်အဖြစ် အမေရိကန်ဒေါ်လာ နှစ်သန်းခွဲကို အကူအညီ အများဆုံးလိုအပ်နေသော လူစုအတွက် ရေသန့်နှင့် အမိုးအကာများအတွက် ထောက်ပံ့ပေးမည်ဖြစ်ပြီး နောက်ဆက်တွဲရောဂါအန္တရာယ်များလျော့ပါးစေရန် ကူညီပေးမည်ဟု ဖော်ပြသည်။ အဆိုပါ ရန်ပုံငွေကို မြန်မာနိုင်ငံ အနောက်မြောက်ဘက်ရှိ မြေပြင်မှ ပြည်တွင်းပြည်ပ အဖွဲ့အစည်းများထံသို့ တိုက်ရိုက် ပေးအပ်မည်ဖြစ်ပြီး အသက်ရှင်ကျန်ရစ်သူများ လိုအပ်နေသည့် အသက်ကယ်ထောက်ပံ့မှုကို အမြန်ဆုံးလုပ်ဆောင်မည်ဟု ဆိုသည်။
Public Service Announcement
မြန်မာနိုင်ငံဆိုင်ရာ အမေရိကန်သံရုံးကလည်း ဆိုင်ကလုန်းမိုခါ တုံ့ပြန်ရေးအဖြစ် ရခိုင်ပြည်နယ်နှင့် ချင်းပြည်နယ်တို့တွင် အပူတပြင်းလိုအပ်လျက်ရှိသည့် နားခိုစရာ၊ ရေရရှိရေး၊ ပတ်ဝန်းကျင်နှင့် တစ်ကိုယ်ရည်သန့်ရှင်းရေးအထောက်အကူပစ္စည်းများအတွက် USAID မှတဆင့် ကနဦး အမေရိကန်ဒေါ်လာ နှစ်သိန်းကို ပေးအပ်လှူဒါန်းသွားမည်ဟု ကြေညာထားသည်။
