ဗြိတိန်က တိုင်းနှင့် ပြည်နယ် ၈ ခုသို့ ခရီးသွားခွင့် ဆက်လက်တားမြစ်

ဗြိတိန်နိုင်ငံခြားရေး၊ ဓနဿဟာရနှင့် ဖွံ့ဖြိုးရေးဌာန(FCDO)က မြန်မာနိုင်ငံ​ တိုင်းနှင့် ပြည်နယ် ၈ ခုသို့ ခရီးသွားရန် တားမြစ်ပိတ်ပင်ကြောင်း ယမန်နေ့တွင် ထုတ်ပြန်သည်။

မွန်၊ ကချင်၊ ချင်း၊ ကရင်နီ(ကယား)၊ ကရင်၊ စစ်ကိုင်း၊ မကွေးနှင့် ရခိုင်ပြည်နယ်မြောက်ပိုင်းသို့ လုံးဝခရီးသွားလာခြင်းမပြုရန် ဗြိတိန်နိုင်ငံခြားရေးက သတိပေးချက် ထုတ်ပြန်ထားခြင်းဖြစ်သည်။ ရှမ်းပြည်နယ်၊ မန္တလေးနှင့် တနင်္သာရီတိုင်း၊ ရခိုင်ပြည်နယ်အလယ်ပိုင်းတို့သို့ ခရီးသွားလာမှု တားမြစ်သော်လည်း မဖြစ်မနေသွားလာရန် ရှိပါက သွားလာနိုင်သည့် ဒေသများအဖြစ် ဗြိတိန်က သတ်မှတ်ထားသည်။

“မြန်မာနိုင်ငံရဲ့လုံခြုံရေးအခြေအနေက ကြိုတင်ခန့်မှန်းထားလို့မရကြောင်းနဲ့ ကြိုတင်ကြေညာခြင်းမရှိဘဲ အပြောင်းအလဲတွေ ဖြစ်တတ်ပါကြောင်း”ဟု ဗြိတိန်က ထုတ်ပြန်သည်။

၂၀၂၁ ဖေဖော်ဝါရီ စစ်တပ်အာဏာသိမ်းချိန်မှ စ၍ ပစ်ခတ်မှု၊ ဗုံးပေါက်ကွဲများအပါအဝင် အကြမ်းဖက်တိုက်ခိုက်မှုအများအပြား နိုင်ငံတဝန်း သိသာစွာဖြစ်ပွားနေသည်ဟု ဗြိတိန်က ဆိုသည်။

Public Service Announcement

ရန်ကုန်နှင့် နေပြည်တော်အပါအဝင် တိုက်ခိုက်မှုများမှာ စစ်တပ် သို့မဟုတ် စစ်တပ်နှင့်ဆက်စပ်နေသာ နေရာများဖြစ်သော အစိုးရရုံးအဆောက်အဦများ၊ စစ်ဆေးရေးဂိတ်များနှင့် စစ်တပ်ပိုင်စီးပွားရေးလုပ်ငန်းများကို အဓိက ပစ်မှတ်ထားသည်ဟု ဖော်ပြသည်။ သို့ရာတွင် နိုင်ငံခြားသားများ ပုံမှန်မကြာခဏ သွားရောက်လေ့ရှိသော ဟိုတယ်များ၊ စားသောက်ဆိုင်များ၊ စျေးဝယ်စင်တာများနှင့် နေထိုင်ရာဝန်းကဲ့သို့သော ဧရိယာများအပါအဝင် အရပ်သား ပြည်သူများအပေါ်တွင်လည်း တိုက်ခိုက်မှုများမှာ သက်ရောက်နိုင်ကြောင်း ဗြိတိန်က အသိပေးသည်။

စစ်တပ်၏ လေကြောင်းတိုက်ခိုက်မှု၊ လက်နက်ကြီးပစ်ခတ်မှု၊ မြေမြှုပ်မိုင်းနှင့် လက်နက်ကိုင်တိုက်ပွဲများအပါအဝင် နိုင်ငံတဝန်း သိသာထင်ရှားသည့် အကြမ်းဖက်မှုများနှင့် ပဋိပက္ခများ ဖြစ်ပွားနေကြောင်း ဗြိတိန်က ထုတ်ပြန်သည်။