ဟန်နွေ/People’s Spring
ကိုးကန့်တပ်မတော်(MNDAA)သိမ်းပိုက်ထိန်းချုပ်ထားသည့် လားရှိုးမြို့တွင် မြို့ခံပြည်သူများအား နေထိုင်ခွင့်ကတ်ထုတ်ပေးနေသည်မှာ သတင်းအမှားသာဖြစ်ကြောင်း လားရှိုးမြို့ ပြန်လည်ထူထောင်ရေး ဖေ့စ်ဘွတ်ခ်စာမျက်နှာက ယနေ့(နိုဝင်ဘာ ၇ရက်)တွင် ရှင်းလင်း အသိပေးထားသည်။
လားရှိုးမြို့ပြည်သူများအား နေထိုင်ခွင့်ကတ်ထုတ်ပေးခြင်းမျိုးမရှိဘဲ လူဦးရေစစ်တမ်း ကောက်ယူမှုသာရှိသည်ဟု အသိပေးသည်။
နေထိုင်ခွင့်ကတ်ထုတ်ပေးနေသည်ဆိုသည့် ကောလာဟလသတင်းကြောင့် ဒေသခံပြည်သူများနှင့် အဝေးရောက်မိသားစုများစိုးရိမ်ပူပန်နေကြသည့် အခြေအနေကြောင့် လားရှိုးမြို့တွင်းအခြေအနေများကို မြို့ပြန်လည်ထူထောင်ရေး ဖေ့စ်ဘွတ်ခ် စာမျက်နှာက သက်ဆိုင်ရာတာဝန်ရှိသူကို မေးမြန်းဖော်ပြခဲ့ခြင်းဖြစ်သည်။
Public Service Announcement
” လက်ရှိနေထိုင်သူ လူဦးရေကိုဘဲ စစ်တမ်းကောက်တဲ့သဘောပါ။ လူဦးရေစာရင်းက အရင်ထဲကကောက်နေတာပါ၊စစ်ရှောင်ပြီး အိမ်ပြန်လာတဲ့ လူဘယ်လောက်ရှိလဲ။ အိမ်ရှင်ဘယ်သူ မိသားစုဘယ်နှစ်ယောက်ရှိလဲ။ အဲ့ဒါမျိုးကိုပဲ စစ်တာပါ”ဟု တာဝန်ရှိသူက ပြောသည်။
သို့သော် လားရှိုးမြို့မှ အခြားနေရာများသို့ သွားရောက်စစ်ရှောင်ပြီး မြို့သို့ ပြန်လာပါက သက်ဆိုင်ရာ ရပ်ကွက်ရုံးကို ပြန်လည်နေထိုင်ကြောင်း အကြောင်းကြားရကြောင်း တာဝန်ရှိသူကပြောသည်။
” လူဦးရေစာရင်းအတိအကျကိုတော့ တစ်ချို့ရပ်ကွက်တွေမှာကောက်နေပါပြီ။ မကြာခင်တော့တစ်မြို့လုံးမှာရှိတဲ့ လူဦးရေစာရင်းကို ကောက်သွားမှာပါ။ တစ်ခြား ဘာအကြောင်းအရာမှ မရှိပါဘူး။ ကဒ်ထုတ်ပေးတာတွေလဲမရှိပါဘူး။ လူဦးရေစာရင်းပဲ ကောက်တာပါ”ဟု တာဝန်ရှိသူက ပြောသည်။
လားရှိုးမြို့ကို MNDAAက ဩဂုတ် ၃ရက်တွင် သိမ်းပိုက်ပြီး အုပ်ချုပ်ရေးဖော်ဆောင်နေခြင်းဖြစ်သည်။ MNDAAက ပြန်လည်ထူထောင်ရေးလုပ်ငန်းများ ဆောင်ရွက်နေချိန် ဩဂုတ်လကုန်ပိုင်းမှစ၍ စစ်ကောင်စီက လားရှိုးမြို့ကို လေကြောင်း ဗုံးကြဲတိုက်ခိုက်မှုများ ဆက်တိုက်ပြုလုပ်လျက်ရှိသည်။
စစ်ကောင်စီက MNDAAက မြေပြင်မှ ထိုးစစ်ဆင်တိုက်ခိုက်နိုင်သည့် အခြေအနေ မရှိဘဲ လေကြောင်း စစ်ဆင်ရေးဖြင့် သာ ဖိအားပေးလျက်ရှိသည်။ စစ်ကောင်စီ၏ လေကြောင်း တိုက်ခိုက်မှု အများစုသည် အရပ်သား နေထိုင်ရာများကို ပစ်မှတ်ထားတိုက်ခိုက်ခြင်းဖြစ်ကြောင်း လားရှိုးမြို့ခံ မနော်ဖောက ပြောထားသည်။
လေကြောင်းတိုက်ခိုက်မှုများကြောင့် နှစ်လကျော်အတွင်း လားရှိုးဒေသခံ အရပ်သား ၇ဦးထက်မနည်း သေဆုံးကာ ၅၇ ဦးကျော် ဒဏ်ရာရရှိထားသည်ဟု MNDAAက အသိပေးထားပြီး နေအိမ် အဆောက်အဦးများစွာ ပျက်စီးခဲ့ရသည်ဟု ဆိုသည်။ စစ်ကောင်စီ လေကြောင်းတိုက်ခိုက်ရာတွင် ဘာသာရေးအဆောက်အဦး၊ စေတီ၊ ဘုရားကျောင်းများကိုလည်း ပစ်မှတ်ထားတိုက်ခိုက်ခဲ့သည်ဟု ဒေသခံက ပြောသည်။
