■လူသားချင်းစာနာထောက်ထားမှု အကူအညီများအပေါ် အလွဲသုံးစားပြုလုပ်မှုမှန်သမျှကို လက်ခံနိုင်ဖွယ်မရှိကြောင်း WFP ဆို
ထားအိ/People’s Spring
ရက္ခိုင်ပြည်နယ် မြောက်ပိုင်း မောင်တောမြို့၊စစ်ကောင်စီ၏ အမှတ် (၅) နယ်ခြားစောင့်ရဲတပ်ဖွဲ့ခွဲ( နခခ-၅) ၏ အဆောက်အအုံတစ်ခုတွင် WFP (ကုလသမဂ္ဂ ကမ္ဘာ့စားနပ်ရိက္ခာအစီအစဉ်) အမှတ်အသားပါ ဆန်အိတ်များအား တွေ့ရှိခဲ့ရသည်။
ထိခိုက်အလွယ်ဆုံးသော ရပ်ရွာလူထုအတွက် ရည်ရွယ်သည့် လူသားချင်းစာနာထောက်ထားမှု အကူအညီများအပေါ် အလွဲသုံးစားပြုလုပ်မှုမှန်သမျှကို လက်ခံနိုင်ဖွယ်မရှိကြောင်း WFPက ထုတ်ပြန်သည်။ အမှန်တွင် WFP က ထိုစားနပ်ရိက္ခာများကို ထိခိုက်အလွယ်ဆုံး ပြည်သူများကိုလူသားချင်းစာနာမှု အကူအညီပေးရန် ဆန်အိတ်များဖြစ်သည်။
ရက္ခိုင်ပြည်နယ်မြောက်ပိုင်းရှိ နယ်ခြားစောင့်တပ်များ အသုံးပြုခဲ့သည့် အဆောက်အဦတစ်ခုတွင် WFP အမှတ်အသားပါရှိသော ရိက္ခာအိတ်များ တွေ့ရှိရကြောင်းကို သတင်းဖော်ပြချက်များအရ WFP က သိရှိရကြောင်း ဖော်ပြသည်။
Public Service Announcement
စစ်ကောင်စီ၏ မောင်တော နခခ (၅ ) တွင် WFP ဆန်အိတ်များတွေ့ရှိခဲ့ရခြင်းဖြစ်ကြောင်းဒေသတွင်းသတင်းဌာန ဖြစ်သော Arakan Bay News (ABA)က ဒီဇင်ဘာ ၁၃ ရက်တွင် ရုပ်သံမှတ်တမ်းနှင့်တကွဖော်ပြခြင်းဖြစ်သည်။ နခခ(၅) ကို အာရက္ခတပ်တော်(AA)က ဒီဇင်ဘာ ၈ ရက်တွင်အပြီးသတ် သိမ်းပိုက်ခဲ့ပြီးနောက် နခခ (၅)အတွင်း မြင်ကွင်းများကိုABA က ကွင်းဆင်းသတင်းရယူဖော်ပြသောရုပ်သံတွင် အဆောက်အအုံတစ်ခုအတွင်း၌WFP ဆန်အိတ်များသိုလှောင်ထားသည်ကိုတွေ့ရှိခဲ့ရခြင်းဖြစ်သည်။
လက်ရှိတွင် ထိုအရပ်ဒေသသို့ သွားရောက်ရန်ခက်ခဲမှုကြောင့် ဖြစ်စဥ်အသေးစိတ်ကို အတည်မပြုနိုင်သေးကြောင်းလည်း WFPကဆိုသည်။
ပြီးခဲ့သည့် ဇွန်လတွင် ရက္ခိုင်ပြည်နယ်မြောက်ပိုင်း မောင်တောမြို့နယ်ရှိ WFP သိုလှောင်ရုံကို ဖောက်ထွင်းလုယက်ခြင်းနှင့် မီးရှို့ဖျက်ဆီးခြင်းများဖြစ်ပွားခဲ့သည်။
ထိုလုပ်ရပ်များသည် ကယ်ဆယ်ရေးအထောက်အပံ့များအား အရေးပေါ်လိုအပ်နေသူများကို ထိခိုက်နစ်နာစေကြောင်း WFP က ဆိုသည်။
ပဋိပက္ခတွင် ပါဝင်ပတ်သက်နေသူအဖွဲ့များအားလုံးအနေဖြင့် အပြည်ပြည်ဆိုင်ရာ လူသားချင်းစာနာမှုဆိုင်ရာ ဥပဒေပါ တာဝန်ဝတ္တရားများကို လိုက်နာကြရန် WFP က ထပ်လောင်း တောင်းဆိုလိုက်သည်။ ၎င်းတို့အနေဖြင့် လူသားချင်းစာနာမှုဆိုင်ရာဝန်ထမ်းများနှင့် အထောက်အပံ့ပစ္စည်းများကို လေးစားပြီး ကာကွယ်စောင့်ရှောက်ရမည်ဟု တိုက်တွန်းသည်။
