မိထက်/People’s Spring
စစ်ကောင်စီတပ်က ဧရာဝတီတိုင်းအတွင်း ရွှေသောင်ယံမြို့နယ်အတွင်းစစ်ရေးပြင်ဆင်မှုအများဆုံးပြုလုပ်နေစဥ်မှာပင် အာရက္ခတပ်တော်(AA)နှင့် PDF များက မကျီးဇင်ရွာနယ်မြေရဲစခန်းကိုသိမ်းပိုက်လိုက်ကြောင်းဒေသခံ နှင့်စစ်ရေးရင်းမြစ်အချို့ကပြောသည်။
၂၀၁၈ ခုနှစ် ဖေ ဖော်ဝါရီလက ကြည်းရေလေစစ်ဆင်ရေးလုပ်ဖူးသည့် ရွှေသောင်ယံကို ယနေ့မှစ၍ ရေတပ်နှင့် တင့်ကားများပို့ပြီးစစ်ကောင်စီ ခံစစ်ပြင်နေသည်။
ယနေ့ည ၇နာရီခန့်တွင် စစ်သားအင်အား ၁၀၀ ထက်မနည်းပါဝင်သော စစ်ကောင်စီတပ်ဖွဲ့ဝင်များသည် ရွှေသောင်ယံ-ဂွမြို့နယ်စပ်ရှိ တိုက်ပွဲဖြစ်ရာနေရာသို့ စစ်သဘ်ောဖြင့်ထွက်ခွာသွားသည်။
Public Service Announcement
အဆိုပါ စစ်ကောင်စီတပ်ဖွဲ့ဝင်များသည် ပုသိမ်မြို့မှ ရောက်ရှိလာခြင်းဖြစ်ပြီး ရွှေသောင်ယံမြို့နယ်၊ ဝက်သေကျေးရွာသို့ ကားများဖြင့် ရောက်လာပြီး ဝက်သေကျေးရွာကမ်းခြေမှတစ်ဆင့် စစ်သင်္ဘောဖြင့် ဆက်ထွက်ခြင်းဖြစ်သည်။
AAဦးဆောင်သည့် ပူးပေါင်းတပ်များနှင့် စစ်ကောင်စီသည် ရွှေသောင်ယံမြို့ပေါ် နှင့် မိုင် ၂၀ခန့်သာ ဝေးသည့် မကျီးဇင်ရွာ၌ ဇန်နဝါရီလ ၇ရက်မှ စ၍ တိုက်ပွဲအပြင်းအထန်ဖြစ်ခဲ့ပြီး ယမန်နေ့
(ဇန်နဝါရီ ၉ ရက်နေ့)ကတိုက်ပွဲတွင် မကျီးဇင်ရွာနယ်မြေရဲစခန်းကို AAနှင့် PDF များက သိမ်းယူလိုက်ကြောင်းဒေသခံအချို့ကပြောသည်။
စစ်ကောင်စီက ရေကြောင်း နှင့် လေကြောင်းမှပါ ပစ်ခတ်တိုက်ခိုက်ခဲ့၍ အရပ်သားအချို့သေဆုံးခဲ့သည်ဟု ဒေသခံများကပြောသည်။
” အသိတစ်ယောက်ရဲ့မကျီးဇင်ရွာကအိမ် လေကြောင်းကနေပစ်လို့ ပျက်စီးသွားပြီ။ အိမ်စောင့် ဦးလေးဆုံးသွားတယ်။ အခုရက်တိုက်ပွဲတွေကြားမှာအရပ်သားသေဆုံးမှုတွေရှိတယ်။ ပြေးလွှားနေရလို့ စာရင်းမရတာ” ဟု ချောင်းသာဒေသခံတဦးက ပြောသည်။
စစ်ကောင်စီက ရွှေသောင်ယံတွင် ကြည်းရေလေ အင်အားသုံး၍ခံစစ်ပြင်နေသောကြောင့် မြို့ခံများသည် အခြားနေရာများသို့ စတင် ရွေ့ပြောင်းတိမ်းရှောင်နေကြပြီဖြစ်ကြောင်းဒေသခံအချို့ကပြောသည်။
လက်ရှိတွင် ဂွမြို့နယ်နှင့် ရွှေ သောင်ယံနယ်စပ်အနီးရှိ ကုလားချောင်း၊ ကျောက်ချွန်၊ ပေါက်တူးကွင်းအပြင် မကျီးဇင်ကျေးရွာအနီး၌ တိုက်ပွဲများဖြစ်ပွားနေပြီး စစ်ကောင်စီက လက်နက်ကြီးဖြင့်ပစ်ခတ်သလို ဇန်နဝါရီလ ၈ရက်က ကုလားချောင်းရွာအနီးတိုက်ပွဲ၌ လေကြောင်းမှ တိုက်ခိုက်သွားကြောင်း ဒေသခံများကပြောသည်။
တိုက်ပွဲနှင့်ပတ်သက်၍ AAအပြင် တော်လှန်ရေးတပ်များကလည်း သတင်းမထုတ်ပြန်သေးပေ။
ဧရာဝတီတိုင်းနှင့်ဆက်စပ်နေသော ဂွမြို့နယ်ကို AAက သိမ်းယူပြီးနောက် စစ်ကောင်စီက ရွှေသောင်ယံအပြင် သာပေါင်း၊ ရေကြည်၊ ငါးသိုင်းချောင်း၊ ကျုံပျော်၊ ပုသိမ်၊ဟင်္သာတမြို့မြို့နယ်တို့ဘက်တွင် အင်အားတိုးချဲ့ပြီး ခံစစ်ပြင်နေသည်။
