ကျော်ဇော/People’s Spring
စစ်ကောင်စီတပ်က ကျွန်းစုမြို့နယ်နှင့် တနင်္သာရီမြို့နယ်အစပ်ရှိ ကျေးရွာများအား ပစ်ခတ်ဝင်ရောက်စစ်ကြောင်းထိုးနေပြီး စိတ်ကျန်းမာရေးမကောင်းသည့် အမျိုးသားတစ်ဦး ပစ်သတ်သွားကြောင်း မြိတ်ခရိုင် ပူး ပေါင်းစစ်ကြောင်း(၂)မှ တာဝန်ရှိသူတစ်ဦးက ပြောသည်။
ဇန်နဝါရီ ၂၇ ရက် နံနက် ၁၁နာရီခန့်က အင်အား ၃၀ခန့်ဖြင့် စစ်ကြောင်းထိုးလာသော စစ်ကောင်စီတပ်သည် ပြင်ဝန်းအနောက်ကျေးရွာသို့ ပစ်ခတ်ဝင်ရောက်ခဲ့၍ ဒေသခံပြည်သူအများအပြား ထွက်ပြေးကြရပြီး စိတ်ကျန်းမာရေးမကောင်းသည့် မောင်နိုင်ဆိုသူအား သေနတ်ဖြင့်ပစ်ခတ်သွားကြောင်း ၎င်းတာဝန်ရှိသူက ပြောသည်။
“ရွာမဝင်ခင် သေနတ်တွေအများကြီးပစ်ပြီးရွာသားတွေထွက်ပြေးမှ ရွာထဲဝင်ပြီး ထမင်းစားနေတဲ့မောင်နိုင်အိမ်တံခါးကိုကန်ဖွင့်ပြီးသေနတ်သုံးချက်ပစ်ခံရတာ”ဟု မြိတ်ခရိုင် ပူးပေါင်းစစ်ကြောင်း(၂)မှ တာဝန်ရှိသူက လူထုနွေဦးသို့ ပြောသည်။
Public Service Announcement
ဒေသခံများကျေးရွာအတွင်းပြန်လည်ဝင်ရောက်ခွင့်ရချိန် ယမန်နေ့ (ဇန်နဝါရီ ၂၇ ရက်)ညနေ ၄နာရီခန့်၌ အသုဘချခွင့်ရကြောင်း ၎င်းက ဆက်ပြောသည်။
လက်ရှိတွင် စစ်ကောင်စီတပ်က ကျွန်းစုနှင့် တနင်္သာရီမြို့နယ်အစပ်ရှိ ပြင်ဝန်းအနောက်ကျေးရွာတွင် အင်အား ၃၀ခန့်၊ ဝါရစ်ရွာတွင် အင်အား ၃၀ ခန့်၊ မွေးရှောင်ရွာတွင် ၃၀ခန့်နှင့် သက္ကယ်ကျင်းကျေးရွာတွင် အင်အား ၅၀ ခန့်ဖြင့် တပ်ဖြန့်ထားပြီး လယ်သစ်ကျေးရွာဘက်သို့ စစ်ကြောင်းထိုးရန် ပြင်ဆင်နေကြောင်း ဒေသအခြေစိုက် တော်လှန်ရေးတပ်ဖွဲ့များက ပြောသည်။
စစ်ကောင်စီတပ် ဝင်ရောက်တပ်စွဲထားသော ကျေးရွာများမှ ဒေသခံပြည်သူအများအပြားမှာ ဘေးလွတ်ရာ ရှောင်တိမ်းနေကြရပြီး ထိတွေ့တိုက်ပွဲများ ဖြစ်ပွားလာမည်ကို စိုးရိမ်လျှက်ရှိကြကြောင်း စုံစမ်းသိရသည်။
