ထားမြတ်/People’s Spring
ရှမ်းပြည်နယ်တောင်ပိုင်း၊ ဆီဆိုင်မြို့နယ်တွင် စစ်ကောင်စီတပ်နှင့် လက်အောက်ခံ PNO ပြည်သူ့စစ်က ဒရုန်းဖြင့် ဗုံးကြဲတိုက်ခိုက်၍ ပအိုဝ်းဒေသခံ ၂ဦး သေဆုံးခဲ့ကြောင်း ပအိုဝ်းအမျိုးသားလွတ်မြောက်ရေးတပ်မတော်(PNLA) ပြောရေးဆိုခွင့်ရှိသူ ခွန်ရိန်းယံက ပြောသည်။
ဖေဖော်ဝါရီလ ၆ ရက် နေ့လည် ၂နာရီအချိန်ခန့်တွင် ဆီဆိုင်မြို့နယ် ကောင်ထိုကျေးရွာနေ ခွန်ဖါလိန် ၊ နန်းဆွေ တို့လင်မယား ၂ဦးသည် တောင်ယာစပါးသယ်ပြန်လာစဥ် လွယ်ချယ် – တပူးထိုရွာလမ်းခွဲအနီး၌ စစ်ကောင်စီနှင့် PNO ပြည်သူ့စစ်က ဒရုန်းဗုံးကြဲတိုက်ခိုက်၍ သေဆုံးခဲ့ရသည်ဟု ဆိုသည်။
“ သူတို့ စိုက်ပျိုးရိတ်သိမ်းထားတဲ့ စပါးတွေသယ်လာတာ။ အဲဒီနေရာ ရောက်တော့ စစ်ကောင်စီက ဒရုန်းနဲ့ ဗုံးကြဲလို့ လင်မယား ၂ဦးစလုံး အဲဒီမှာပဲ သေဆုံးသွားတယ်။ မနေ့က တိုက်ပွဲဖြစ်ပွားတာမရှိဘူး။ တိုက်ပွဲဖြစ်ပွားတာ မရှိဘဲနဲ့ စစ်ကောင်စီက ဒရုန်းနဲ့ ဗုံးကြဲတယ်။ ပြီးတော့ ဟောင်ဝစ်ဇာအမြောက်နဲ့ လက်နက်ကြီးနဲ့လည်း ၄ကြိမ်ပစ်လာတယ်”ဟု PNLA ပြောရေးဆိုခွင့်ရှိသူ ခွန်ရိန်းယံက ပြောသည်။
Public Service Announcement
လက်နက်ကြီးပစ်ခတ်မှုကြောင့် ပြည်သူထိခိုက်သေဆုံးမှုမရှိခဲ့ဟုလည်း ၎င်းက ပြောသည်။
စစ်ကောင်စီတပ်နှင့် PNO ပြည်သူ့စစ်သည် ပအိုဝ်းပြည်သူကို ရန်သူသဖွယ်သတ်မှတ်ကာ တိုက်ခိုက်သတ်ဖြတ်နေခြင်းဖြစ်ကြောင်း PNLAက ထုတ်ပြန်သည်။ စစ်ကောင်စီနှင့် PNO ပြည်သူ့စစ်အနေဖြင့် ပြည်သူကို ပစ်မှတ်ထားသည့် စစ်ရာဇဝတ်မှုများကို ပြောင်ပြောင်တင်းတင်း ကျူးလွန်နေကြောင်း ခွန်ရိန်းယံက ပြောသည်။
“ ဒါက ပအိုဝ်းလူမျိုး၊ ပအိုဝ်းဒေသ ပအိုဝ်းကျေးရွာတွေကို တမင်သပ်သပ် တိုက်ခိုက်ဖျက်ဆီးနေတာဖြစ်ပါတယ်။ PNO ပြည်သူ့စစ်တွေက အများစုက ပအိုဝ်းပဲ ဆိုပေမယ့် သူတို့ ရဲ့ ခေါင်းဆောင် လူတစ်ဦးတယောက်ရဲ့ အကျိုးစီးပွား၊ ပအိုဝ်းလူမျိုးမဟုတ်တဲ့ သူတို့ရဲ့ ခေါင်းဆောင် ခရိုနီနေဝင်းထွန်းရဲ့ အကျိုးစီးပွားကို ကာကွယ်ရင်းနဲ့ ကိုယ့်လူမျိုးကို ကိုယ်ပြန်သတ်ဖြတ်နေရတဲ့အဆင့် ရောက်လာနေတာပဲဖြစ်ပါတယ်။ ဒါကြောင့် PNO ပြည်သူ့စစ်မှာရှိနေတဲ့ ပအိုဝ်းတွေအနေနဲ့ သေသေချာချာ စဉ်းစားကြပါ သုံးသပ်ကြပါ” ဟု ခွန်ရိန်းယံက ပြောသည်။
