ဇွန်-၃၊၂၀၂၅။ထားမြတ်/People’s Spring
စစ်ကောင်စီနှင့်လက်အောက်ခံ PNOပြည်သူ့စစ်မှ လက်နက်ကြီးများ ရမ်းသန်း ပစ်ခတ်တိုက်ခိုက်နေကြောင်း ပအိုဝ်းအမျိုးသားလွတ်မြောက်ရေးတပ်မတော်(PNLA)က သတင်းထုတ်ပြန်သည်။
စစ်ကောင်စီကဇွန်လကုန်အထိအပစ်ရပ်ကာလတစ်လသက် တမ်းတိုးကြောင်း ကြေညာခဲ့သော်လည်း ဇွန်လ ၁ရက်နှင့် ၂ရက်နေ့များ၌ ဆီဆိုင်မြို့နယ်နှင့် မောက်မယ်မြို့နယ်တို့တွင် လက်နက်ကြီး ၁၀ကြိမ်ထက်မနည်းတိုက်ခိုက်ခဲ့ဟု ဖော်ပြသည်။
ဇွန်လ (၁) ရက်နေ့တွင် ဆီဆိုင်မြိုနယ်၊နောင်ထော် ဒေသတွင်းသို့လည်းကောင်း၊ဇွန်လ(၂) ရက်နေ့တွင် မောက်မယ်မြိုနယ်၊ ကဒူးကြီးဒေသ PNLO ဌာနချုပ်ကို ဦးတည်၍ ဗန်းမတ်ဒေသတွင်းသို့ လည်းကောင်း လက်နက်ကြီး ရမ်းသန်း ပစ်ခတ်ခဲ့သည်ဟု ဆိုသည်။
Public Service Announcement
“သူတို့ အပစ်ရပ်ထားတယ်ဆိုတဲ့ကြေညာချက်လည်းတွေ့တယ်။မြေပြင်မှာလည်းဘာမှ တိုက်ပွဲဖြစ်ပွားတာ မရှိဘူး။ စစ်ရေးဆိုင်ရာ လှုပ်ရှားမှုလည်းမရှိဘဲနဲ့ သူတို့က ကျနော်တို့ဌာနချပ်ကို တည်ပြီးတော့မှ လက်နက်ကြီးတွေ ပစ်လာတယ်။ အပြောတမျိုး အလုပ်တမျိုး ဖြစ်နေတယ်လို့ပဲ ပြောရမှာပေါ့” ဟု PNLA ပြောရေးဆိုခွင့်ရှိသူခွန်ရိန်းယံက ပြောကြားသည်။
စစ်ကောင်စီသည် အပစ်ရပ်ကြေညာထားသော်လည်း နိုင်ငံတဝန်း လေကြောင်း လက်နက်ကြီး တိုက်ခိုက်မှုများ ပြုလုပ်ခဲ့သည်။
အပစ်ရပ် သက်တမ်းတိုးကြောင်း ကြေညာပြီးနောက် ဇွန်လ ၁ရက်နေ့က မန္တလေးတိုင်း ပြင်ဦးလွင်ခရိုင် သပိတ်ကျင်းမြို့နယ်နှင့် စဉ့်ကူးမြို့နယ်များသို့လည်း စစ်ကောင်စီကလေကြောင်း မှဗုံးကြဲခဲ့ရာစာသင် ကျောင်း ၊လူနေအိမ်များ ပျက်စီးကာ အမျိုးသမီး ၃ဦး ဒဏ်ရာရခဲ့သည်။
စစ်ကောင်စီ၏ ဟန်ပြအပစ်ရပ်ကြေညာမှု၊ ဝါဒဖြန့်မှုများကို ပြည်သူများ မယုံကြဘဲ လေကြောင်းရန် သတိပြုကြရန်၊ ဗုံးခိုကျင်းများ ခိုင်မာစွာ ပြုလုပ်ထားရန် ပြင်ဦးလွင်ခရိုင်ပကဖသတင်းပြန်ကြားရေး တာဝန်ရှိသူက ပြောကြားထားသည်။
