ဧပြီ-၂၁၊၂၀၂၅။ဟန်နွေ/People’s Spring
အမေရိကန်နိုင်ငံက ဘင်္ဂလားဒေ့ရှ်မှတဆင့် ချင်းအမျိုးသားတပ်ဦး(CNF) အပါအဝင် မြန်မာနိုင်ငံရှိ တော်လှန်ရေးတပ်ဖွဲ့အချို့အား စစ်ဘက်ဆိုင်ရာ အကူအညီများပေးအပ်ရန်စီစဥ်နေသည်ဆိုသည့် သတင်းကို ပြည်ပသတင်းဌာနချို့ကဖော်ပြခဲ့ပြီးနောက်အိန္ဒိယအစိုးရကပါ မေးမြန်းစုံစမ်းလာကြောင်း ချင်းအမျိုးသားတပ်ဦး(CNF) ပြောရေးဆိုခွင့်ရှိသူ ဆလိုင်းထက်နီက ပြောကြားသည်။
ဆလိုင်းထက်နီက ဧပြီ ၂၁ တွင်ကျင်းပသည့် CNF/CNA ၊ CDF-KKG တို့၏ ကလေးဒေသမှစစ်ဆင်ရေးနှင့် ပတ်သက်၍ ပူးတွဲသတင်းစာရှင်းလင်းပွဲ၌ ပြောကြားခဲ့ခြင်းဖြစ်သည်။
“အိန္ဒိယ အစိုးရက တောင် မေးလာတဲ့အနေအထားတွေရှိတယ်။ဒါပေမဲ့အဲဒီကိစ္စက ကျနော်တို့ CNF အနေနဲ့ တိုက်ရိုက်မပတ်သက်တော့ အဓိကတော့ သတင်းမှန်သည်ဖြစ်စေ၊ မှားသည်ဖြစ်စေ အမေရိကနဲ့ဘင်္ဂလားဒေ့ရှ် နှစ်နိုင်ငံရဲ့ကိစ္စဖြစ်တယ်။ အဲဒါသည် ဖြစ်နိုင်ပါတယ်လို့ပြောလို့မရသလို၊ မဖြစ်နိုင်ဘူးလို့ အတက်ပြောလို့လည်း မရပြန်ဘူး။ ဒီကိစ္စက ထဲထဲဝင်ဝင် သူတို့ နှစ်နိုင်ငံကိစ္စဖြစ်တဲ့အတွက်ကျနော့်အနေနဲ့ တရားဝင် ပြောဆိုလို့ မရသလို အဲဒါတွေကို ကျနော်အထက်လူကြီးတွေက အဲဒီကိစ္စနဲ့ ပတ်သက်ပြီးတော့ ဆွေးနွေးတာတွေ ကျနော်ကို အကြောင်းကြားတာတွေ အဲဒီလိုမျိုးမရှိသေးတော့ တရားဝင်ပြောဖို့ ခက်နေတဲ့ အနေအထားမှာ ရှိတယ် အဲဒီလောက်ပဲ ဖြေချင်ပါတယ်။” ဟု ဆလိုင်းထက်နီကပြောကြားသည်။
Public Service Announcement
အိန္ဒိယအခြေစိုက်သတင်းဌာနအငယ်တစ်ခုဖြစ်သော Northeast News သတင်းဌာနက ဧပြီ
၁၅ ရက်နေ့တွင် အမေရိကန်အစိုးရက ဘင်္ဂလားဒေ့ရှ် စစ်တပ်၏အကူအညီကိုယူပြီးဘင်္ဂလားဒေ့ရှ်စစ်တပ်မှတပ်ရင်းသုံးရင်းမှတဆင့် ရခိုင်နှင့်ချင်းပြည်နယ်ထဲက တော်လှန်ရေးတပ်များကစစ်ကောင်စီကိုအနိုင်ယူ ဖြိုခွင်းနိုင်သည်အထိ စစ်ရေး အထောက်အပံ့ဇုန်တစ်ခု ထူထောင်ရန်ဆွေးနွေးခဲ့ကြောင်းစတင်ဖော်ပြခဲ့ခြင်းဖြစ်သည်။ ပြီးခဲ့သည့်လက ဘင်္ဂလားဒေ့ရှ်နိုင်ငံ၊ဒါကာမြို့သို့အမေရိကန်အစိုးရ၏ ပစိဖိတ် စစ်ဦးစီးဌာန ဒုတိယ အကြီးအကဲဒုတိယဗိုလ်ချုပ်ကြီးဂျိုဝယ်လ်ဗောင်ဝဲလ် ရောက်ရှိခဲ့စဥ် ထိုကိစ္စကို ဘင်္ဂလားဒေ့ရှ် စစ်တပ်နှင့် ဆွေးနွေးခဲ့ကြောင်း Northeast News သတင်းဌာရေးသားခဲ့ခြင်းဖြစ်သည်။
သို့သော်အဆိုပါသတင်းကို အိန္ဒိယနိုင်ငံရှိယုံကြည်ရသော သတင်းဌာနကြီးများကမူ ဖော်ပြထားခြင်းမရှိသေးပေ။ ပြည်သသတင်းဌာနအနည်းငယ်ကသာ ကိုးကား၍ ပြန်လည်ဖော်ပြမှုရှိသည်။ ထို့အပြင်အထက်ပါသတင်းသည် တရုတ်၏ ကြားဝင်စွက်ဖက်မှုဖြင့် လားရှိုးမြို့ကို MNDAAက စစ်ကောင်စီထံပြန်ပေးရန် စီစဥ်နေချိန်တွင်အိန္ဒိယသတင်းဌာနက ဖော်ပြခဲ့ခြင်းဖြစ်သည်။
အဆိုပါ သတင်းနှင့်ပတ်သက်၍ ပြည်တွင်းမီဒီယာများ၏ မေးမြန်းမှုအချို့ရှိသကဲ့သို့ အိမ်နီးချင်းနိုင်ငံတခုဖြစ်သည့် အိန္ဒိယအစိုးရကလည်းမေးမြန်းလာခြင်းဖြစ်ကြောင်း ဆလိုင်းထက်နီကရှင်းပြသည်။
CNF အနေဖြင့် နွေဦးတော်လှန်ရေးကာလ၌ နိုင်ငံတကာ ၊ အိမ်နီးချင်းနိုင်ငံများနှင့် ထိတွေ့ဆက်ဆံမှုရှိကြောင်းလည်း၎င်းကဆက်ပြောသည်။
“နွေဦးတော်လှန်ရေးကာလမှာကျနော်တို့က နိုင်ငံတကာ ချိတ်ဆက်ရေးကို အတက်နိုင်ဆုံး အိမ်နီးချင်းနိုင်ငံတွေနဲ့ ဆက်ဆံရေးပြီးတော့အင်အားကြီး နိုင်ငံတွေနဲ့ ဆက်ဆံရေးအဲဒါတွေကတော့ အဲဒီလို တွေ့ဆုံမှုတွေတော့ လုပ်ပါတယ်။ အခုကိစ္စ မကလို့ ကျန်တဲ့ ကိစ္စ တွေကသော်လည်းကောင်း တွေ့ဆုံမှုတွေ ဘာတွေလုပ်နေတာတော့ရှိတာပေါ့။” ဟုဆလိုင်းထက်နီက ပြောကြားသည်။
ယခုသတင်းထွက်နေသည့် ဘင်္ဂလားဒေ့ရှ်မှတဆင့်စစ်ရေးအကူအညီများ ပေးမည်ဆိုသည့် သတင်းများနှင့်ပတ်သက်၍ အထက်ကညွှန်ကြားချက်မရ၍ တရားဝင် ပြောဆို၍ မရဟုလည်းသူက ရှင်းလင်းပြောကြားခဲ့သည်။
အဆိုပါ သတင်းများနှင့်ပတ်သက်ပြီး အာရက္ခတပ်တော်(AA)ပြောရေးဆိုခွင့်ရှိသူ ဦးခိုင်သုခထံသို့လည်း People’s Spring ကဆက်သွယ်မေးမြန်း
ထားဆဲဖြစ်သည်။
ချင်းပြည်နယ်တွင် CNF/CNA ဦးဆောင်သောချင်းကောင်စီ တပ်ဖွဲ့များ ၊ ချင်းညီနောင် ၊AA စ
သည့်တော်လှန်ရေးတပ်ဖွဲ့များက မြို့နယ် အများစုကို သိမ်းပိုက်ထိန်းချုပ်ထားပြီဖြစ်ပြီး ဟားခါး ၊ထန်တလန် ၊ တီးတိန် မြို့ပေါ်တွင်သာစစ်ကောင်စီတပ်ကျန်ရှိတော့သည်။ ရခိုင်ပြည်နယ်တွင်လည်း ၁၇ မြို့နယ်ရှိရာ AAက ၁၄ မြို့နယ်ကိုသိမ်းပိုက်ပြီးဖြစ်ကာ စစ်တွေ ၊ ကျောက်တော်၊ မာန်အောင် သုံးမြို့နယ်တွင်သာစစ်ကောင်စီတပ်ကျန်တော့သည်။ အဆိုပါမြို့များကို တော်လှန်ရေးအဖွဲ့များက ၎င်းတို့ဘာသာ ထိုးစစ်ဆင်သိမ်းယူခဲ့ခြင်းဖြစ်သည်။
