ဧပြီ ၂၁၊ ၂၀၂၅။ ခွာညို/People’s Spring
တရုတ်အကူအညီဖြင့် လားရှိုးမြို့သို့ စစ်ကောင်စီတပ်ပြန်ဝင်လာပြီးနောက် လားရှိုးမြို့တော်ခန်းမရှေ့တွင် လွှင့်ထူထားသော MNDAAနှင့် ကိုးကန့်အထူးဒေသ(၁) အလံကို ပြန်လည်ဖြုတ်ချလိုက်ပြီဟု ဒေသခံများက ပြောသည်။
“ MNDAA အလံရော၊ အထူးဒေသ(၁)အလံရော ဒီမနက် မတွေ့တော့ဘူး” ဟု ဒေသခံတစ်ဦးကပြောသည်။
ထိုနေရာတွင် မူလက MNDAAတပ်ဖွဲ့ အလံ၊ အထူးဒေသ(၁)အလံနှင့် မြန်မာနိုင်ငံအလံကို လွှင့်ထူထားခြင်းဖြစ်သည်။
Public Service Announcement
ထိုအလံများကို စစ်ကောင်စီတပ်ဖွဲ့ဝင်အချို့က ယမန်နေ့ညက လိုက်ဖြုတ်ခဲ့ခြင်းဟု သတင်းရရှိသည်။ ထိုသို့ ဖြုတ်ချနေချိန်တွင် လားရှိုးမြို့အနီး ပေါက်ကွဲသံငါးချက်ထက်မနည်းထွက်ပေါ်ခဲ့သည်ဟု ဒေသခံများကပြောသည်။
မြန်မာနိုင်ငံဆိုင်ရာ တရုတ်အထူးသံတမန် တိန့်ရွှီကျွင်းသည် လားရှိုးမြို့သို့ ရောက်နေပြီး ယနေ့နံနက်ပိုင်းမှစ၍ MNDAA၊ တရုတ်နှင့် စစ်ကောင်စီ သုံးပွင့်ဆိုင်ဆွေးနွေးနေသည်။ ဆွေးနွေးပွဲတွင်တိန့်ရွှီကျွင်း၊ စစ်ကောင်စီ အမှတ် (၁) စစ်ဆင်ရေးအထူးအဖွဲ့မှူး ဒုတိယဗိုလ်ချုပ်ကြီး ကိုကိုဦးနှင့် MNDAAအထွေထွေအတွင်းရေးမှူးနှင့် စစ်ဦးစီးချုပ်တို့ပါဝင်ကြောင်း သတင်းရရှိသည်။
အရှေ့မြောက်တိုင်းစစ်ဌာနချုပ်(ရမခ)အပါအဝင် လားရှိုးမြို့ကို MNDAA က၂၀၂၄ သြဂုတ်တွင် သိမ်းပိုက်ထိန်းချုပ်ခဲ့ပြီး အထူးဒေသ(၁)အဖြစ် ထည့်သွင်းသတ်မှတ်ကာ အုပ်ချုပ်ရေးယန္တရားအသက်သွင်းနေစဉ် တရုတ်၏ ဖိအားကြောင့် MNDAA ပြန်ဆုတ်ခွာရပြီး စစ်ကောင်စီက ပြန်ဝင်လာခြင်းဖြစ်သည်။
