ဇွန်-၁၊၂၀၂၅။ကဖေး၊ထားမြတ်/People’s Spring
လားရှိုးမြို့နယ်အတွင်း MNDAA နှင့် SSPPတိုက်ပွဲဖြစ်ခဲ့ပြီးကျေးရွာ ၄ရွာမှဒေသခံများစစ်ဘေးရှောင်နေရကြောင်း SSPP က သတင်းထုတ်ပြန်သည်။
ဇွန်လ ၁ ရက်မွန်းလွဲပိုင်း ၁ နာရီချိန်မှ ၂ နာရီခွဲဝန်းကျင်တွင် လားရှိုးမြို့နယ်၊ နားလိုင်ကျေးရွာအနောက်ဘက် ရွာအထွက်လမ်းကို SSPP/SSA စစ်ကြောင်းထွက်နေချိန် MNDAA တပ်မ အမှတ် (၆၁၁) လက်အောက်ခံတပ်ကခြုံခိုတိုက်ခိုက်၍နှစ်ဖက်တိုက်ပွဲဖြစ်ခဲ့ခြင်းဟုဆိုသည်။
တိုက်ပွဲတွင် MNDAAတပ်ဖွဲ့ဝင် ၈ ဦးကျဆုံးပြီး ဒဏ်ရာရသူများလည်းရှိကာညနေ ၄ နာရီချိန်တွင် ဟန်နားကျေးရွာ၌တိုက်ပွဲဆက်ဖြစ်ခဲ့သည်ဟု ဆိုSSPPကဖော်ပြထားသည်။
Public Service Announcement
MNDAAတပ်ဖွဲ့ဝင် ၈ဦး ကျဆုံးကြောင်း SSPP ၏ထုတ်ပြန်ချက်နှင့်ပတ်သက်၍ People’s Spring ကသီးခြားအတည်မပြုနိုင်ပေ။သို့သော် MNDAAတပ်ဖွဲ့ဝင်အချိုကျဆုံးခဲ့ကြောင်းဒေသခံသုံးဦးက ပြောသည်။
တိုက်ပွဲနှင့်ပတ်သက်၍SSPPထံ ဆက်သွယ်မေးမြန်းရာ ပြန်လည်ဖြေကြားခြင်းမရှိသေးပေ။အဆိုပါတိုက်ပွဲနှင့်ပတ်သက်၍ MNDAAက သတင်းမထုတ်ပြန်သေးပေ။။
SSPP ထောက်ခံသည့် ဒေသခံတစ်ဦးက”ကိုးကန့်(MNDAA)ကကျူးကျော်ဝင်လာတာဖြစ်ပါတယ်။SSPP က သူ့အလုပ်သူ လုပ်တာပါ”ဟုပြောသည်။
အခြားဒေသခံတဦးကမူ ယနေ့ဖြစ်ပွားသောတိုက်ပွဲသည် ပြင်းထန်ခဲ့ပြီး စိတ်ပျက်စရာအခြေအနေဖြစ်ကြောင်း ပြောသည်။
“တိုင်းရင်းသားတော်လှန်ရေးလက်နက်ကိုင်အဖွဲ့ဖြစ်ပြီး မအလကိုမတိုက်ပဲ အချင်းချင်းတိုက်နေတယ်။ စိတ်ပျက်စရာကောင်းပါတယ်ဗျာ။ကျနော်တို့တွေထွက်ပြေးနေရပြန်တယ် “ဟု ပြောသည်။
ည နေ ၅နာရီခန့်၌ MNDAA တပ်ပြန်လည်ဆုတ်ခွာသွားပြီး တိုက်ပွဲငြိမ်သက်နေသော်လည်း နှစ်ဖွဲ့စလုံးကအင်အားဖြည့်တင်းနေ၍ တိုက်ပွဲဆက်လက်ဖြစ်ပွားကို ဒေသခံများကစိုးရိမ်နေသည်ဟု SSPPဖော်ပြထားသည်။
နားလိုင်ကျေးရွာ၊ ဟန်နားကျေးရွာ၊ဟိန်းလွမ့်ကျေးရွာ၊ ကောင်းကော်ကျေးရွာမှ ဒေသခံများ ထွက်ပြေးတိမ်းရှောင်နေကြရသည်ဟုသိရသည်။
ဒေသခံသတင်းရင်းမြစ်တဦးကလည်း “ကျောက်မီးသွေးအတွက်ပါပဲ။SSPPနဲ့ MNDAA ထိပ်တိုက်တွေ့နေတဲ့ နေရာအားလုံးက အရင်က ငွေရည်ပုလဲကုမ္ပဏီက ကျောက်မီးသွေးဝင်တူးနေတဲ့နယ်တွေပါ။မူလက SSPP တပ်ရှိတာ။ဟန်နားရွာနားက နမ့်မရွာဆိုတာ အရင်က SSPPဗျူဟာ(၁၀) ထိုင်တာ။အဲ့နယ်တစ်ဝိုက်က SSPPအခြေစိုက်ရွာတွေ။ ဘယ်အဖွဲ့မှလည်း ဝင်မလာဖူးဘူး”ဟုပြောသည်။
ရေရှည်တွင်နှစ်ဖက်တိုက်ပွဲကျယ်ပြန့်လာနိုင်ခြင်း ရှိ၊မရှိမှာ ပြောရခက်ဟု ၎င်းကဆိုသည်။
“မဟာမိတ်လည်း ဖြစ်တယ်။ရန်ငြိုးရန်စလည်း မရှိထားတော့ကျောက်မီးသွေးတစ်ခုတည်းအတွက်နဲ့ အဲ့လောက်ကြီး အဖြစ်ခံကြမလားပေါ့”ဟု အထက်ပါသတင်းရင်းမြစ်ကဆက်ပြောသည်။
ဧပြီလ၂၉ ရက်နေ့ကလည်းသီပေါမြို့နယ် နမ္မကျောက်မီးသွေးတွင်းရှိ SSPP တပ်စခန်းကို ဖယ်ရှားရန်MNDAAကလာရောက်တောင်းဆိုရာမှတိုက်ပွဲဖြစ်ပွားခဲ့သေးသည်။ရှမ်းပြည်နယ်မြောက်ပိုင်းတွင် MNDAAနှင့် စစ်ရေးတင်းမာမှုကို နှစ်ဖက်ခေါင်းဆောင်များ တွေ့ဆုံဖြေရှင်းမည်ဟု SSPPက မတ်လ ၃၀ ရက်ထုတ်ပြန်ခဲ့သည်။
MNDAAနှင့် SSPPသည် KIA ၊AA၊UWSA၊ NDAA၊ TNLA တို့နှင့်ဖွဲ့စည်းထားသောပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီ(FPNCC) တွင်ပါဝင်သည်။
တရုတ်နိုင်ငံ၏ စွက်ဖက်မှုဖြင့် MNDAA သည် ဧပြီလတွင် လားရှိုးမြို့ပေါ်မှ ပြန်ဆုတ်ပေးပြီး စစ်ကောင်စီက လားရှိုးမြို့ပေါ်တွင် ပြန်လည်တပ်စွဲထားကာ ၊MNDAA က လားရှိုးမြို့နယ်ရှိ ကျေးရွာများ၌ တပ်စွဲနေခြင်းဖြစ်သည်။ SSPP သည် စစ်တပ်အာဏာသိမ်းပြီးနောက်ပိုင်း စစ်တပ်နှင့် စစ်ရေးတင်းမာမှု အချို့ရှိခဲ့သော်လည်းစစ်တပ်နှင့် ကြီးမားသောတိုက်ပွဲဖြစ်ပွားခြင်းမရှိဘဲ RCSS ၊ MNDAA တို့နှင့်မူ တိုက်ပွဲဖြစ်ပွားခဲ့သည်။
