ဇူလိုင်-၈၊၂၀၂၅။မေရီ/People’s Spring
မန္တလေးမြို့မှာငလျင်ကြောင့် ပျက်စီးသွားတဲ့တာရိုးကို သုံး လကျော်အကြာရေတက်လာချိန်မှာ ပြင်ဆင်ဖို့ စစ်ကောင်စီရဲ့မန္ဆလေးစည်ပင်က တင်ဒါခေါ်ယူနေတယ်လို့ သတင်းရရှိပါတယ်။
မန္တလေးမြို့၊ ဧရာဝတီမြစ်ကမ်းနားလမ်းက တာရိုးဟာ မတ်လ ၂၈ ရက်နေ့က လှုပ်ခတ်ခဲ့တဲ့ငလျင်ကြီးကြောင့် ရှမ်းကလေးကျွန်းရွာနဲ့ ရွှေဂဲရေထိန်းတံခါးနားအထိ ဆိုးရွားစွာ ပျက်စီးခဲ့ပါတယ်။ အဲဒီလမ်းကို ရေတက်ချိန်ကျမှ ပြုပြင်ဖို့ မန္တလေးစည်ပင် လမ်းတံတားဌာနကနေ တင်ဒါစတင်ခေါ်ယူနေတယ်လို့ မြို့ခံတွေက ပြောပါတယ်။
“ရေကလာတော့မှာ။အဲဒီတာရိုးကကျိုးလိုက်ရင် စစ်ကိုင်း-မန္တလေးလမ်း အနောက်ဘက်ခြမ်းက ရပ်ကွက်တွေ အကုန်ရေမြုပ်ကုန်မှာ”လို့ အမရပူရမြို့နယ်က ဒေသခံတဦးက ပြောပါတယ်။
Public Service Announcement
စစ်ကောင်စီလက်အောက်က မန္တလေးစည်ပင်ကတော့ အဲဒီလမ်းကို ၂၀၂၅-၂၀၂၆ ဧပြီလမှ မတ်လအထိ ဘဏ္ဍာရေးနှစ်အတွင်းမှာလမ်းခင်းခြင်းလုပ်ငန်း၊ လမ်းတာဘောင်တည်ဆောက်တာ၊ အခြေခံလွှာတည်ဆောက်တာနဲ့ လမ်းလယ်ကျွန်းတည်ဆောက်တာတွေအတွက် တင်ဒါခေါ်ယူနေတာဖြစ်ပြီး ဒီကနေ့ ဇူလိုင် ၈ ရက် တင်ဒါစရောင်းမယ်လို့ ကြေညာထားပါတယ်။
ရွှေဂဲရေထိန်းတံခါးဟာ NLD အစိုးရလက်ထက် ၂၀၂ဝ ပြည့်နှစ် ဇူလိုင်လတုန်းက ကျိုးပြတ်ခဲ့ဖူးပြီး အဲဒီအချိန်က မြို့တော်ဝန် ဦးရဲလွင်နဲ့အဖွဲ့ရဲ့ အချိန်မီ ပြင်ဆင်နိုင်မှုကြောင့် ထိခိုက်ပျက်စီးမှု နည်းပါးခဲ့ပါတယ်။
ဒါ့အပြင် ဧရာဝတီမြစ်ကမ်းနားမှာ တည်ဆောက်နေတဲ့ အမရပူရမြို့ပြဖွံ့ဖြိုးရေး စီမံကိန်းကြောင့်လည်း မနှစ်ကတည်းက ရေလမ်းကြောင်းတွေပြောင်းပြီး ရေကြီးရေလျှံမှုတွေ ဖြစ်ပွားနေတယ်လို့ မြို့ခံတွေက ပြောပါတယ်။
