နိုဝင်ဘာ – ၁၇ ၊၂၀၂၅ ၊ ဆိုင်းမင်း/People’s Spring
နိုင်ငံအလယ်ပိုင်း ရှိ မကွေးအကျဉ်းထောင်မှာ နိုင်ငံရေးအကျဉ်းသားတွေကို ထောင်တွင်း အလုပ်ကြမ်းတွေ ခိုင်းစေနေတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM) က ထုတ်ပြန်အသိပေးပါတယ်။
အလုပ်ကြမ်းနဲ့ထောင်ဒဏ်ကျတဲ့ နိုင်ငံရေးအကျဉ်းသားတွေကို မြေတူးခိုင်းတာ၊ မိလ္လာသန့်ရှင်းရေးလုပ်ခိုင်းပြီး ဖိနှိပ်မှုတွေ လုပ်ဆောင်နေတာလို့ PPNM က ဆိုပါတယ်။
အခုနှစ်အတွင်း အလုပ်ကြမ်း စေခိုင်းခံရသူ နိုင်ငံရေးအကျဉ်းသား ၄၀ ဦးရှိခဲ့ပြီး ပြီးခဲ့တဲ့ ဧပြီ ၊မေ ၊ ဇွန်လတွေမှာ အများဆုံး ဖြစ်ခဲ့တာလို့ PPNM ထံကသိရပါတယ်။
Public Service Announcement
“နိုင်ငံရေးအကျဉ်းသားတွေကို နိုင်ငံရေးအကျဉ်းသားလို့ မသတ်မှတ်ထားဘူး ၊ အလုပ်ကြမ်းနဲ့ထောင်ဒဏ်ပါတဲ့အတွက် ဒီအလုပ်တွေ လုပ်ရမယ်ဆိုပြီး ခိုင်းတာ” လို့ PPNM ရဲ့ ဦးဆောင်ကော်မတီဝင် ကိုသိုက်ထွန်းဦးကပြောပါတယ်။
ထောင်ဒဏ်မှာ အလုပ်ကြမ်း ပါ တဲ့အတွက် အလုပ်မလုပ်ချင်ရင် ငွေကြေးတောင်းခံတာကလည်း ထောင်တွင်းစီးပွားရေး လို ဖြစ်နေတယ်လို့ နိုင်ငံရေးအကျဉ်းသားဟောင်းအချို့က ဆိုပါတယ်။
မကွေးထောင် ဟာ နိုင်ငံရေးအကျဉ်းသားတွေကို ဖိနှိပ်တဲ့ ထောင်စာရင်းထဲပါဝင်ပြီး ထောင်ပြောင်းလာသူတွေကို ဗူးဝမှာတင် ရိုက်နှက်တာမျိုးလုပ်ဆောင်လေ့ရှိတယ်လို့ သိရပါတယ်။
