ဒီဇင်ဘာ-၂၅၊ ၂၀၂၅။ ရှိန်း/People’s Spring
မန္တလေးတိုင်း၊ သပိတ်ကျင်းမြို့နယ် သီးကုန်းရွာနဲ့ ပေါက်တပင်ကြားကို စစ်တပ်က လေကြောင်းတိုက်ခိုက်မှုပြုလုပ်ခဲ့တာမို့ စစ်ဘေးရှောင်ပြည်သူနှစ်ဦး သေဆုံးခဲ့ပြီး အမျိုးသမီးတစ်ဦး ပြင်းထန်စွာဒဏ်ရာရခဲ့တယ်လို့ ဒေသခံတွေက ပြောပါတယ်။
ဒီဇင်ဘာ ၂၄ရက် မနေ့ ည ၇နာရီ၁၅မိနစ်မှာ သီးကုန်းရွာနဲ့ ပေါက်တပင်ရွာကြားကို စစ်တပ်က လေကြောင်းတိုက်ခိုက်ခဲ့တာဖြစ်ပြီး စစ်ဘေးရှောင်နေတဲ့ အမျိုးသား ၁ဦး၊ အမျိုးသမီး ၁ဦးတို့ ထိမှန်သေဆုံးခဲ့ပြီး နောက်ထပ် အမျိုးသမီး ၁ဦး ပြင်းထန်ဒဏ်ရာရခဲ့တယ်လို့ သိရပါတယ်။
အဲဒီကျေးရွာတွေဟာ ဧရာဝတီမြစ်ကမ်းအနီးက ကျေးရွာတွေဖြစ်ပြီး စစ်တပ်က ဒီရက်ပိုင်းအတွင်းမှာ မြစ်ကမ်းဘေး ကျေးရွာတွေကို ပစ်မှတ်ထားဗုံးကြဲနေတာပါ။
Public Service Announcement
ဒီကျေးရွာဟာ လက်ရှိ စစ်တပ်ထိန်းချုပ်ထားတဲ့ သပိတ်ကျင်းမြို့နဲ့ တော်လှန်ရေးတပ်တွေ ထိန်းချုပ်ထားတဲ့ ကြာညှပ်ရွာ ကြားမှာရှိတာလို့ ဒေသခံတွေက ပြောပါတယ်။
စစ်ကောင်စီက သပိတ်ကျင်းမြို့နယ်က ရွှေတွင်းတွေရှိတဲ့ ကျေးရွာတွေကိုလည်း တရစပ်ထိုးစစ်ဆင်နေပြီး လေကြောင်းတိုက်ခိုက်မှုတွေပါ ဆက်တိုက်ပြုလုပ်နေတယ်လို့ သိရပါတယ်။
