မြိုင်မှာ စစ်ရှောင်ဘုန်းကြီးကျောင်းနဲ့ တဲတွေကို စစ်တပ် မီးရှို့ဖျက်ဆီး

ဇန်နဝါရီ-၂၉၊ ၂၀၂၆ ဇေအောင်/People’s Spring

မကွေးတိုင်း၊ မြိုင်မြို့နယ်မှာ စစ်ဘေးရှောင်ဘုန်းကြီးကျောင်းနဲ့ စစ်ရှောင်ပြည်သူတွေရဲ့တဲတွေ၊ ရဲဘော်တွေရဲ့ ကျောက်တိုင်တွေကို စစ်တပ်က မီးရှို့ဖျက်ဆီးသွားကြောင်း အညာမြေ အရပ်ဖက်လူမှုအဖွဲ့အစည်း-မြိုင်ရဲ့ ပြောရေးဆိုခွင့်ရှိသူ ဆရာထွေးက ပြောပါတယ်။

ဇန်နဝါရီ ၂၈ ရက်က မြိုင်မြို့နယ်တောင်ပိုင်းမှာ စစ်ကြောင်းထိုးနေတဲ့ အင်အား ၂၀၀ခန့်ပါ စစ်ကောင်စီတပ်စစ်ကြောင်းဟာ သာစည်နဲ့ သစ်ပလွေကုန်းကျေးရွာကြားမှာရှိတဲ့ ဘိုမင်း ဘုရားကုန်းပေါ်ရှိ ယာယီစစ်ရှောင် ဘုန်းကြီးကျောင်းနဲ့ ဘုရားအနီးရှိ တောတိုက် စစ်ရှောင်တဲတွေကို မီးရှို့ဖျက်ဆီးသွားကြောင်း

အညာမြေ အရပ်ဖက်လူမှုအဖွဲ့အစည်း-မြိုင်ရဲ့ ပြောရေးဆိုခွင့်ရှိသူ ဆရာထွေးက ပြောပါတယ်။

Public Service Announcement

“တဲကတော့ ၃လုံးပါ။ ဘုန်းကြီးလည်း ရှောင်ရတာပဲ။ ပြည်သူတွေက ၂၀၂၂ ကတည်းရှောင်ရတာပါ။ ဘုန်းကြီးကတော့ ၂၀၂၅မှ ရှောင်လာတာပါ။ တွင်းမပျူရွာထဲမှာ မရှောင်ပဲကျန်တဲ့ဘုန်းကြီးတွေလည်းရှိနေသေးပါတယ်”လို့ ဆရာထွေးက ဆိုပါတယ်။

ဒါ့အပြင် ဘုရားအနီးက ရဲဘော်နှစ်ဦးရဲ့ ကျောက်တိုင်တွေကိုပါ မီးရှို့ဖျက်​ဆီးသွားခဲ့တယ်လို့ သိရပါတယ်။

ပြည်သူတွေဟာ စသ်တပ်စစ်ကြောင်းမလာခင် ကြိုတင်တိမ်းရှောင်ထားလို့ ဖမ်းဆီးသတ်ဖြတ်ခံရတာ မရှိဘူးလို့ ဒေသခံတွေက ပြောပါတယ်။

အဆိုပါ စစ်ကြောင်းဟာ ဒီကနေ့မှာတော့ နှမ်းဆီကန်ကျေးရွာ အနောက်ဘက် ရောက်နေပြီဖြစ်ပြီး သရက်ကန်ပျူစောထီးရွာနဲ့ နီးသွားပြီလို့ ဒေသခံတွေက ပြောပါတယ်။

မြိုင်နယ်တောင်ပိုင်းက ပြည်သူတွေအနေနဲ့ မြေပြင်စစ်ကြောင်းနဲ့ လေကြောင်းရန် အထူးဂရုစိုက်နေကြဖို့ အညာမြေ အရပ်ဖက်လူမှုအဖွဲ့အစည်း-မြိုင်က သတိပေးထားပါတယ်။