မတ်၁၅၊ ၂၀၂၆။ ထားမြတ်/People’s Spring
တနင်္သာရီတိုင်း၊ သရက်ချောင်းမြို့နယ် ဝင်း၀ စစ်ကောင်စီတပ်စခန်းက ထွက်ပြေးသွားတဲ့ စစ်သားတွေကို လိုက်လံရှင်းလင်းရာ သေဆုံးထိခိုက်မှုရှိပြီး လက်နက်တွေ ထပ်မံသိမ်းရခဲ့ကြောင်း ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က သတင်းထုတ်ပြန်ပါတယ်။
အင်အား ၁၀၀ကျော်ရှိတဲ့ ဝင်း၀တပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းတပ်က ဖေဖော်ဝါရီ ၇ရက်မှာ စတင်တိုက်ခိုက်ခဲ့ရာ တိုက်ပွဲတစ်လကျော်အကြာ မတ်လ ၁၄ရက်မှာ သိမ်းပိုက်နိုင်ခဲ့တာဖြစ်ပါတယ်။
တိုက်ပွဲအတွင်း စစ်ကောင်စီတပ်သား ၅၀ ကျော် သေဆုံးခဲ့သလို ၆၀ကျော်ထွက်ပြေးသွားရာ ထွက်ပြေးသူတွေကို ပူးပေါင်းတပ်က လိုက်လံရှင်းလင်းနေတာလို့ KNLA တပ်မဟာ(၄) သတင်းရင်းမြစ်က ပြောပါတယ်။
Public Service Announcement
” သူတို့က ခွဲပြီးပြေးတာထင်တယ်။ အဲဒါ ဝိုင်းပြီးတော့တိုက်ခိုက်တာ လက်နက် ၁၀လက် ရတယ်။ ၇ဦးသေဆုံးတယ်။ ပြီးတော့ ဒဏ်ရာရပြီး ထွက်ပြေးတာလည်းရှိမယ်”လို့ သတင်းရင်းမြစ်က ပြောပါတယ်။
KNU မြိတ်ထားဝယ်ခရိုင်ရဲ့ သတင်းထုတ်ပြန်ချက်မှာ ဝင်းဝတပ်စခန်းမှထွက်ပြေးသောအာဏာသိမ်းစစ်တပ်နဲ့ ကရင်အမျိုးသားလွတ်မြောက်ရေးတပ်မတော် K.N.LA တပ်မဟာ (၄) တပ်ရင်း(၁၂)၊ တပ်မဟာ (၆) တပ်ရင်း(၂၇)၊ တော်လှန်ရေးပူးပေါင်းတပ်ဖွဲ့များ မတ်လ ၁၄ရက် က တိုက်ပွဲဖြစ်ပွားခဲ့ဟု အသိပေးပါတယ်။
အဲဒီတိုက်ပွဲမှာ အာဏာသိမ်းစစ်တပ်က ၇ဦးသေဆုံးကာ MA-1 (၅)လက်၊ MA-3 (၃)လက်၊ MA-4 (၁)လက်၊ G-3 (၁)လက် နဲ့ ခဲယမ်းတွေ သိမ်းရခဲ့ဟု ဓာတ်ပုံမှတ်တမ်း ဖော်ပြပါတယ်။
ဝင်း၀တပ်စခန်းဟာ KNU မြိတ်ထားဝယ်ခရိုင်ကစယ်ဒိုမြို့နယ်(သရက်ချောင်းနယ်မြေ)၊ ထားဝယ်-မြိတ် အမှတ်(၈)လမ်းမှတ်ကြီး မင်းဒပ် ကျေးရွာမှာ စစ်တပ်က နှစ်ပေါင်း ၃၀ကျော်ကြာ အခြေချတပ်စွဲထားတဲ့ စခန်းဖြစ်ပါတယ်။
