မြင်းခြံ-တောင်သာလမ်းပိုင်းမှာ ကားတွေ မကြာခဏဓားပြတိုက်ခံနေရ

မတ်၁၇၊၂၀၂၆။ရှိန်း/ People Spring’s

မန္တလေးတိုင်း၊မြင်းခြံ- တောင်သာလမ်းပိုင်း၊စစ်တပ်ထိန်းချုပ်ထားတဲ့နန်းမြင့်တောင်အနီးမှာ ဖြတ်သန်းသွားတဲ့ ခရီးသည်တင်ကားတွေ နဲ့ ကားတချို့ မကြာခဏ ဓားပြတိုက်ခံ နေရတာ​ကြောင့် စုံစမ်းနေတယ်လို့ မြင်းခြံမြို့နယ်ပကဖမှတာဝန်ရှိသူကပြောပါတယ်။

မြင်းခြံ-တောင်သာလမ်းပိုင်းမှာမတ်လ၁၅ရက်နေ့မနက်ပိုင်းကမြင်းခြံ-ရန်ကုန်သွား‌တဲ့ ခရီးသည်တင်ကားတစ်စီးကို မျက်နှာဖုံးတပ်ထားတဲ့လူ၆ဦးခန့်က သေနတ်နဲ့ဓားတွေကိုင်ကာ ခရီးသည် တွေရဲ့ ရွှေ၊ဖုန်းနဲ့ ငွေတွေကိုဓါးပြတိုက်သွားတယ်လို့ စုံစမ်းသိရပါတယ်။

ဒါ့အပြင် မတ် ၁၅ ရက်မနက်ပိုင်းမှာပဲကုန်တင်ကားတစီးနဲ့ အခြားအိမ်စီးကားတစီးကိုလည်း ဓားပြတိုက်ခံရပါတယ်။

Public Service Announcement

“နန်းမြင့်တောင်နားမှာဖြစ်နေတာ။ခဏခဏရှိပြီ။အဲဒီဘက်ကတော့စကစစိုးမိုးနယ်မြေပါ။ဒါပေမယ့် ဓားပြတိုက်တဲ့အဖွဲ့ကမျက်နှာဖုံးတွေတပ်ထားတော့ဘယ်သူတွေလဲသေချာမပြောနိုင်သေးဘူး။ကျွန်တော်တို့လည်းစုံစမ်း နေပါတယ်”လို့ မြင်းခြံ မြို့နယ်ပကဖသတင်းထောက်လှမ်းရေးနဲ့ ပြန်ကြား ရေးတာဝန်ရှိသူက ပြောပါတယ်။

ဓါးပြတိုက်တာ မကြာခဏဖြစ်​နေတဲ့နေရာဟာမြင်းခြံ-တောင်သာလမ်းပိုင်းကနန်းမြင့်တောင်အနီးမှာဖြစ်ပြီး အရင်က တော်လှန်ရေး တပ်တွေစိုးမိုးထားတဲ့ နယ်မြေဖြစ်ပါတယ်။ဒါ​ပေမယ့်၂၀၂၅ခုနှစ် နှစ်ဆန်းပိုင်းမှာဒီနေရာကိုစစ်တပ်ကပြန်လည်ထိန်းချုပ်ခဲ့ပြီး ဒီနေ့အထိ ပျူ​စေထီးနဲ့ စစ်တပ်ကစိုးမိုးထားတယ်လို့ ​ဒေသခံ​တွေက​ပြောပါတယ်။

“ဒီကိစ္စ ‌‌‌‌‌‌‌‌‌‌‌‌‌‌‌‌‌‌‌‌‌‌တွေဖြစ်တာကဒီနေရာကို စစ်တပ်ပြန်သိမ်းသွားကတည်းက မကြာခဏဖြစ် နေတာပါ။ဒါပေမယ့်မြင်းခြံမှာက Local တပ် ၊တပ်ရင်းတပ်ဖွဲ့တွေလည်းပေါတယ်။ပျူတွေလည်းပေါတော့ကျွန်တော်တို့သေချာစုံစမ်း နေပါတယ်”လို့ ပြန်ကြား ရေးတာဝန်ရှိသူကပြောပါတယ်။

အထူးသဖြင့်မြင်းခြံမြို့နယ်မှာသီတာယုမွန်ဦး​ဆောင်တဲ့ စစ်တပ်လက်​အောက်ခံပျူ​စောထီး​တွေက ဖမ်းဆီးလူသတ်တာ ၊ရွာမီးရှို့တာ ၊လုယက်တာ၊​ဒေသခံ​တွေကို အဓမ္မမှုကျူးလွန်တာစတဲ့ ရာဇဝတ်မှုမျိုးစုံကို မကြာခဏကျူးလွန်​နေပါတယ်။

အဲဒီနေရာမှာ ဓားပြတိုက်မှုဟာ မတ်လအတွင်းမှာ ပဲ ၄ကြိမ်အထိဖြစ်ထားတယ်လို့​ဒေသခံအချို့က​ပြောပါတယ်။ မြင်းခြံမြို့နယ်ရဲ့ ၇၀ ရာခိုင်နှုန်းခန့်ကို စစ်တပ်က စစ်ကြောင်းထိုး ပြန်လည်ထိန်းချုပ်ထားပြီး စစ်တပ်ထိန်းချုပ်နယ်မြေမှာ ယခုလို ဓားပြတိုက်မှုတွေဖြစ်နေတာလို့ ​ဒေသခံအချို့က​ပြောပါတယ်။