ဇူလိုင် ၂၆၊ ၂၀၂၆။ ထားမြတ်/People’s Spring
စစ်တပ်ကို တော်လှန်တိုက်ခိုက်နေတဲ့ အင်အားစုတွေနဲ့ ဆက်တိုက်တွေ့ဆုံဆွေးနွေးနေတဲ့ ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ (SCEF)ဟာ ဇူလိုင် ၂၁ရက်မှာ မွန်လက်နက်ကိုင်တပ်တွေအပါအဝင် မွန်အဖွဲ့အစည်းတွေနဲ့ တွေ့ဆုံဆွေးနွေးခဲ့ကြောင်း SCEFက ဒီကနေ့ ဇူလိုင် ၂၆ရက်မှာ ထုတ်ပြန်အသိပေးပါတယ်။
ဇူလိုင် ၁၇ရက်က စစ်ကိုင်း၊ မကွေး၊ မန္တလေး ဒေသ ဖက်ဒရယ်ယူနစ် လွှတ်တော်၊ အစိုးရတွေနဲ့ တွေ့ဆုံခဲ့တဲ့ SCEFဟာ ဇူလိုင် ၂၀ရက်မှာ လက်နက်ကိုင်တပ်ဖွဲ့ ၁၉ခု ပေါင်းစည်းထားတဲ့ နွေဦးတော်လှန်ရေး မဟာမိတ် တပ်ပေါင်းစု(SRA)နဲ့ တွေ့ဆုံဆွေးနွေးခဲ့ပါတယ်။
ဇူလိုင် ၂၁ရက်မှာတော့ မွန်အဖွဲ့အစည်းတွေဖြစ်တဲ့ မွန်ပြည်သစ်ပါတီ(စစ်အာဏာရှင်တိုက်ဖျက်ရေး)-NMSP-AD ၊မွန်ပြည်ဖက်ဒရယ်ကောင်စီ(MSFC)၊ မွန်ပြည်အတိုင်ပင်ခံကောင်စီ (MSCC)၊ မွန်ပြည်နယ်လွှတ်တော်ကိုယ်စားပြုကော်မတီ(CRMH)တို့ နဲ့ တွေ့ဆုံဆွေးနွေးခဲ့ကြောင်း SCEFက ထုတ်ပြန်ပါတယ်။
Public Service Announcement
အဲဒီတွေ့ဆုံမှုမှာ လက်ရှိနိုင်ငံရေးအခင်းအကျင်းနဲ့ ရှေ့နိုင်ငံရေးလုပ်ငန်းစဉ်လိုအပ်မှုတွေကို ညှိနှိုင်းတိုင်ပင်ခဲ့ကြောင်း အသိပေးထားပြီး အသေးစိတ် အခြေအနေများ ဖော်ပြမထားပါဘူး။
တွေ့ဆုံဆွေးနွေးပွဲကို SCEF အလှည့်ကျသဘာပတိ ခူဦးရယ်လ်၊ NMSP-AD ဥက္ကဋ္ဌ နိုင်ဇေယျ၊ SCEF မဟာဗျူဟာနဲ့ မူဝါဒရေးရာဦးဆောင်အဖွဲ့ဝင် ပြည်ထောင်စုဝန်ကြီးချုပ် မန်းဝင်းခိုင်သန်း ၊ မွန်ပြည်ဖက်ဒရယ်ကောင်စီ အုပ်ချုပ်ရေးကော်မတီ ဥက္ကဋ္ဌ နိုင်မွန်စိုင်း တို့ အပါအဝင် တာဝန်ရှိသူတွေ တက်ရောက်ခဲ့တယ်လို့ ထုတ်ပြန်ပါတယ်။
တွေ့ဆုံပွဲမှာ ပါဝင်ခဲ့တဲ့ မွန်အဖွဲ့အစည်းတွေအနက် NMSP-AD၊ MSFC လက်အောက်ခံ မွန်ပြည်တော်လှန်ရေးတပ်တွေဟာ ဒေသတွင်းက ကရင်အမျိုးသားလွတ်မြောက်ရေးတပ်မတော် (KNLA)၊ ပြည်သူ့ကာကွယ်ရေးတပ်မတော်(PDF) တွေနဲ့ ပူးပေါင်းပြီး စစ်ကောင်စီကို တိုက်ခိုက်နေတာဖြစ်ပါတယ်။
SCEF က လတ်တလောမှာ တော်လှန်ရေးအင်အားစုအသီးသီးနဲ့ တွေ့ဆုံဆွေးနွေးနေတာတွေနဲ့ ပတ်သက်ပြီးမေးမြန်းဖို့ SCEF အတွင်းရေးမှူးအဖွဲ့ တာဝန်ရှိသူ အချို့ထံ ဆက်သွယ်ထားဆဲဖြစ်ပြီး အဆက်အသွယ်မရသေးပါဘူး။
SCEF ကို အမျိုးသားညီညွတ်ရေးအစိုး၊ ပြည်ထောင်စုလွှတ်တော်ကိုယ်စားပြုကော်မတီ၊ ကချင် KIO၊ ကရင် KNU၊ ကရင်နီ KNPPနဲ့ ချင်း CNF စတဲ့ တော်လှန်ရေးအဖွဲတွေနဲ့ အခုနှစ်မတ်လမှာ စတင်စုဖွဲခဲ့တာဖြစ်ပါတယ်။ ဒါ့အပြင် ပြည်နယ်၊ဖက်ဒရယ်ယူနစ်၊ ERO ကိုယ်စားပြုမဏ္ဍိုင်၊ ပြည်သူ့ကိုယ်စားပြုမဏ္ဍိုင်နဲ့ အမျိုးသမီးကိုယ်စားပြု မဏ္ဍိုင် စတဲ့ မဏ္ဍိုင်သုံးရပ်ပါဝင်ကာ စုဖွဲ့မှုပိုအားကောင်းအောင် လုပ်ဆောင်မယ်လို့ အသိပေးထားပါတယ်။
