သြဂုတ်-၁၊၂၀၂၆။ကိုဒီး/People’s Spring
ကရင်ပြည်နယ်၊ ဖလူးဒေသမှာ ရှေ့ဆုံးက စစ်ကြောင်းထိုးနေတဲ့ စစ်တပ်ရဲ့ စစ်ကြောင်း ၂ ခုဟာ အထိနာပြီး အကြိမ်ကြိမ် လန်ကျနေတယ်လို့ လူထုနွေဦးရဲ့ ကရင်စစ်ရေးသတင်းရင်းမြစ်က ပြောပါတယ်။
မြဝတီမြို့တောင်ဘက်က ဖလူးဒေသမှာ အာဏာသိမ်းစစ်တပ်နဲ့ ကရင်အမျိုးသားလွတ်မြောက်ရေးတပ်မတော်(KNLA) ဦးဆောင်တဲ့ တော်လှန်ရေးပူးပေါင်းတပ်တွေတိုက်ပွဲပြင်းထန်နေပြီး စစ်တပ်က အထိနာနေတယ်လို့ စစ်ရေးသတင်းရင်းမြစ်အချို့ကပြောပါတယ်။
ဖလူးဒေသကို စစ်တပ်ကအမှတ်(၁၃)စစ်ဆင်ရေးကွပ်ကဲမှုဌာနချုပ်(စကခ-၁၃)နဲ့ တပ်မ(၂၂) ထုတ်သုံးလာပြီး ထိုးစစ်ဆင်နေတာ ဖြစ်ပါတယ်။ဖလူးဒေသမှာရှေ့ဆုံးက စစ်ကြောင်းထိုးနေတဲ့ စစ်တပ်စစ်ကြောင်း ၂ခုဟာ လက်တလောမှာ ထိခိုက်မှုများနေပြီး အကြိမ်ကြိမ် လန်ကျနေတယ်လို့ ကရင်စစ်ရေးသတင်းရင်းမြစ်က ပြောပါတယ်။
Public Service Announcement
“တခွကြိုးတောင်ကုန်းနားမှာဝေ့လည်နေတယ်။တော်တော်လေးအထိနာ နေတယ် ကြားတယ်”လို့ ၎င်းက ပြောပါတယ်။
ဒါ့အပြင် စစ်တပ်စစ်ကြောင်းကစစ်သားတွေဟာ အခုရက်ပိုင်း ဆက်တိုက်ဆိုသလို တော်လှန်ရေးတပ်တွေထံ အလင်းဝင်လာနေပါတယ်။
စကခ(၁၃) လက်အောက်ခံ ခမရ(၅၅၇)တပ်ရင်းက တပ်သားတစ်ဦးဟာ တပ်ရင်းမှူးရဲ့ လက်နက်ယူလာပြီး အလင်းဝင်လာတယ်လို့ KNLAတပ်ရင်း(၂၇)ကတာဝန်ရှိသူကဩဂုတ် ၁ရက်နေ့မှာ အသိပေးထားပါတယ်။
ဒါ့အပြင် ပြီးခဲ့တဲ့ ရက်ပိုင်းကလည်း ခမရ(၅၅၇)တပ်ရင်းက တပ်သား ၂ဦးဟာ လက်နက် ၃လက်ယူဆောင်လာပြီး တော်လှန်ရေးတပ်ဖွဲ့တွေထံ အလင်းဝင်လာခဲ့ပါသေးတယ်။
ပြီးခဲ့တဲ့ ဇူလိုင်လအတွင်း လေးကေ့ကော်မြို့သစ်အနောက်ဘက်နားက ရဲကုန်းနေရာမှာ တိုက်ပွဲပြင်းထန်ခဲ့ပြီး အမှတ်(၁၃)စစ်ဆင်ရေးကွပ်ကဲမှုဌာနချုပ်(စကခ-၁၃) လက်အောက်ခံ ခမရ(၅၈၅)တပ်ရင်းက စစ်ကြောင်းမှူး ဗိုလ်မှူး အပါအဝင် သေဆုံးမှု များခဲ့တယ်လို့စစ်ရေးသတင်းရင်းမြစ်အချို့ကပြောပါတယ်။ဒါအပြင် အဲဒီစစ်ကြောင်းက စစ်သား ၆ဦးဟာ တော်လှန်ရေးတပ်ဖွဲ့တွေထံ ထွက်ပြေး အညံ့ခံခဲ့ပါတယ်။
စစ်တပ်က မြဝတီမြို့တောင်ဘက်ခြမ်းမှာရှိတဲ့ မင်းလက်ပံ၊ ဖလူးကြီး၊ ဖလူးလေး ကျေးရွာတွေကိုစစ်တပ်က ပြန်ထိန်းချုပ်နိူင်ဖို့ ၂၀၂၅ အောက်တိုဘာကတည်းက စစ်ကြောင်း ၃ ကြောင်းနဲ့ ထိုးစစ်ဆင်ပေမယ့် ကရင်အမျိုးသားလွတ်မြောက်ရေးတပ်မတော် (KNLA) ဦးဆောင်တဲ့ တော်လှန်ရေးပူးပေါင်းတပ်တွေ ဖြတ်တောက်တိုက်ခိုက်မှုကြောင့် ရှေ့မတိုးနိုင်ပဲဖြစ်နေတာပါ။
