မြန်မာ-အိန္ဒိယနယ်စပ်အနီးတိုက်ပွဲ စစ်တပ်နဲ့ ပူးပေါင်းတပ်မှအရာရှိအပါအဝင်၈ဦးသေဆုံး

​အောက်တိုဘာ-၂၇၊၂၀၂၆။အိမ်သွင်/People’s Spring .

အိန္ဒိယ-မြန်မာနယ်စပ်ကနေဝင်လာပြီး မြန်မာရွာဘက်ကို စစ်ကြောင်းထိုးမီးရှို့လို့ ဖြစ်ပွားခဲ့တဲ့တိုက်ပွဲအတွင်းစစ်တပ်၊ ရှမ်းနီ၊ ကသည်းနဲ့နာဂပူးပေါင်းတပ်ဘက်က အရာရှိနှစ်ဦးအပါအဝင်ရှစ်ဦးသေဆုံးသွားတယ်လို့ သတင်းရရှိပါတယ်။

အာဏာသိမ်းစစ်တပ်ဦးဆောင်ပြီးရှမ်းနီတပ်(SNA)၊ နာဂတပ်(NSCN-IM)နဲ့ ကသည်းတပ်တွေ ပါဝင်တဲ့စစ်ကြောင်းက နှစ်နိုင်ငံနယ်စပ်အနီးက ဖိုင်ရန်ကျေးရွာကို အောက်တိုဘာ၂၀ ရက်နေ့ မ‌နက်အစောပိုင်းမှာ ဝင်ရောက်လာပြီး စစ်ကြောင်းထိုးမီးရှို့တဲ့အတွက်ကူကီးအမျိုးသားတပ်မတော်(KNA-B )နဲ့ ပူးပေါင်းတပ်တွေကတိုက်ခိုက်ခဲ့တာပါ။

“NSCN-IM ဘက်ကအရာရှိနှစ်ယောက်ပါတယ်။သူတို့ပူးပေါင်းတပ်ဘက်က စုစုပေါင်းရှစ်ယောက်သေတယ်။ ဒဏ်ရာရတွေလည်းများတယ်။ အခုကတော့သူတို့ထွက်ပြေးသွားပြီး အခြေအနေငြိမ်နေတယ်”လို့ဒေသခံသတင်းရင်းမြစ်တစ်ဦးကပြောပါတယ်။

Public Service Announcement

အဲဒီစစ်ကြောင်းဟာစစ်တပ်ထိန်းချုပ်ထားတဲ့ တမူးမြို့နယ်၊ မင်းသာရွာကနေ အိန္ဒိယနယ်ထဲကို ဝင်သွားပြီးမှ ဖိုင်ရန်ကျေးရွာကို ဝင်ရောက် မီးရှို့တာလို့ ဆိုပါတယ်။ နေအိမ်ရှစ်လုံးမီးလောင်ကျွမ်းခဲ့တယ်လို့ သိရပါတယ်။

ကူကီးအမျိုးသားတပ်မတော်(KNA-B )ဟာ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်ရင်းတပ်ဖွဲ့တွေ၊ တော်လှန်ရေးမဟာမိတ်တပ်တွေနဲ့နဲ့ပူးပေါင်းပြီး အာဏာသိမ်းစစ်တပ်ကိုတိုက်ခိုက်နေတဲ့အဖွဲ့ဖြစ်ပါတယ်။

စစ်ကောင်စီနဲ့ပူးပေါင်းပါဝင်လာတဲ့NSCN-IMဟာ နာဂအမျိုးသား ဆိုရှယ်လစ်ကောင်စီ NSCN (National Socialist Council of Nagaland)ကနေ ခွဲထွက်လာတဲ့ လက်နက်

ကိုင်တပ်ဖြစ်ပါတယ်။ အိန္ဒိယအစိုးရကိုတိုက်ခိုက်ပြီး နာဂလူမျိုးများ နေထိုင်ရာ ဒေသအားလုံးကို အချုပ်အခြာအာဏာပိုင်အဖြစ် သီးခြားနိုင်ငံ ထူထောင်ဖို့ ဖွဲ့စည်းခဲ့တာဖြစ်ပါတယ်။ အဖွဲ့တွင်းသဘောထားကွဲလွဲမှုတွေကြောင့်NSCN-IM နဲ့ NSCN-K/AM အပါအဝင် အဖွဲ့ခွဲတွေ ကွဲထွက်ခဲ့ပါတယ်။ ၎င်းတို့ဟာ စစ်ကောင်စီနဲ့ပူးပေါင်းနေတယ်လို့ ဒေသခံတွေကပြောပါတယ်။

တိုက်ပွဲဖြစ်ပွားနေစဉ်မှာလည်းNSCN-K/AMအဖွဲ့အဟာ စစ်ကောင်စီနဲ့နေပြည်တော်မှာတွေ့ဆုံဆွေးနွေးခဲ့တာတွေရှိခဲ့ပါတယ်။ အောက်တိုဘာ ၂၂ ရက်မှာ စစ်ကောင်စီလက်အောက်ခံအမျိုးသားစည်းလုံးညီညွတ်ရေးနှနဲ့ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) နဲ့ NSCN-K/AM တို့ နေပြည်တော်မှာ တွေ့ဆုံဆွေးနွေးခဲ့တာပါ။ ၂၀၀၈ ဖွဲ့စည်းပုံအခြေခံဥပဒေအရ ဖွဲ့စည်းထားတဲ့ နာဂကိုယ်ပိုင်အုပ်ချုပ်ခွင့်ရဒေသအတွင်း အခြားမြို့နယ်တွေ ထပ်မံထည့်သွင်းပေးဖို့ NSCN-K/AM က တောင်းဆိုခဲ့တယ်လို့ သိရပါတယ်။

မြန်မာနဲ့ အိန္ဒိယနိုင်ငံဟာ ကချင်ပြည်နယ်၊ ချင်းပြည်နယ်၊စစ်ကိုင်းတိုင်းတို့နဲ့ ၁၀၂၁ မိုင်ခန့် ထိနယ်စပ်ဆက်စပ်နေပါတယ်။နယ်စပ်‌တလျှောက်မှာ အိန္ဒိယအစိုးရကို တော်လှန်နေတဲ့ နာဂနဲ့ကသည်းလက်နက်ကိုင်အဖွဲ့တွေရှိနေပါတယ်။နာဂနဲ့ကသည်းလက်နက်ကိုင်အဖွဲ့အ

ချို့ဟာ စစ်ကောင်စီနဲ့ပူးပေါင်းပြီး ပြည်သူ့ကာကွယ်ရေးတပ်ဖွဲ့တွေကိုတိုက်ခိုက်တာတွေရှိနေတယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ထုတ်ပြန် အသိပေးထားပါတယ်။

တမူးခရိုင်မှာ မြို့သစ်မြို့နဲ့ ခမ်းပတ်မြို့ကို ပြည်သူ့ကာကွယ်ရေးပူးပေါင်းတပ်တွေက သိမ်းပိုက်ခဲ့ပြီး ဒေသတွင်းတိုက်ပွဲတွေမှာ ကသည်းတပ်ဖွဲ့ဝင်ရုပ်အလောင်းတွေ ရရှိခဲ့ဖူးလို့ အမျိုးသားညီညွတ်ရေးအစိုးရက အိန္ဒိယအစိုးရထံ တရားဝင်လွှဲပြောင်းပေးဖူးပါတယ်။