ရွေးကောက်ပွဲမှာ ကျောင်းသားလှုပ်ရှားမှုကို ဆာဘီးယား အစိုးရ ရှုံးနိမ့်

ဆာဘီးယားမှာ ကျင်းပခဲ့တဲ့ ရွေးကောက်ပွဲ ရလဒ်တွေအရ ကျောင်းသားတွေ ဦးဆောင်တဲ့ လှုပ်ရှားမှုကို အရေးနိမ့်သွားကြောင်း ဆာဘီးယား အစိုးရရဲ့ ခေါင်းဆောင် အလက်ဇန္ဒား ဗူချစ်က ဝန်ခံခဲ့ပါတယ်။

ဆာဘီးယားမှာ ကျောင်းသားထု ဦးဆောင်တဲ့ အစိုးရ ဆန့်ကျင်ရေး ဆန္ဒပြပွဲတွေ အားကောင်းလာတဲ့နောက် သမ္မတ ဗူချစ်က ရာထူးကနေ နုတ်ထွက်၊ လွှတ်တော်ကို ဖျက်သိမ်းပေးဖို့ သဘောတူခဲ့ရပြီး အောက်တိုဘာ ၂၅ ရက်နေ့မှာ ကြားဖြတ် ရွေးကောက်ပွဲ ကျင်းပပေးခဲ့ပါတယ်။ ပြီးတော့ ဝန်ကြီးချုပ် နေရာအတွက် သူကိုယ်တိုင် ပြန်လည် အရွေးခံခဲ့ပါတယ်။ ဗူချစ်ဟာ လွန်ခဲ့တဲ့ ၁၄ နှစ်အတွင်း အာဏာရ ပါတီခေါင်းဆောင်၊ ဝန်ကြီးချုပ်၊ သမ္မတ ရာထူးတွေကနေ ဆာဘီးယား နိုင်ငံရေး ဩဇာကို အဓိက ထိန်းချုပ်ထားခဲ့သူ ဖြစ်ပါတယ်။

ဒါပေမဲ့ မဲအားလုံးရဲ့ ၉၇ ရာခိုင်နှုန်းကို ရေတွက်ပြီးချိန်မှာ ကျောင်းသားလှုပ်ရှားမှုက ထောက်ခံတဲ့ အမတ်လောင်းတွေအတွက် မဲအရေအတွက် ၂.၂၅ သန်း ရရှိထားပြီး ဗူချစ်ရဲ့ ဆာဘီးယား တိုးတက်ရေးပါတီ (SNS)က ၁.၆၇ သန်းသာ ရရှိထားပါတယ်။ အောက်တိုဘာ ၂၆ ရက် မနက်အစောပိုင်းထိ မဲရေတွက်မှုတွေအရ ကျောင်းသားလှုပ်ရှားမှုက ထောက်ခံတဲ့ အမတ်တွေဟာ မဲစုစုပေါင်းရဲ့ ၅၂ ရာခိုင်နှုန်းထိ ရရှိထားပြီး SNSကတော့ ၃၉.၂ ရာခိုင်နှုန်းသာ ရခဲ့တာ ဖြစ်ပါတယ်။

အဲဒီနောက် ဗျူချစ်က အရေးပေါ် လွှတ်တော်ရွေးကောက်ပွဲမှာ သူနဲ့ သူ့ပါတီ ရှုံးနိမ့်ခဲ့ကြောင်း ဝန်ခံခဲ့ပါတယ်။ အောက်တိုဘာ ၂၆ ရက်နေ့က ဘဲလ်ဂရိတ်၊ နိုဗီဆတ်စတဲ့ မြို့ကြီးတွေမှာတော့ လူတွေက လမ်းမတွေပေါ် ထွက်လာပြီး တပျော်တပါး စုဝေး အောင်ပွဲခံခဲ့ကြပါတယ်။

Public Service Announcement

ဆာဘီးယား ကျောင်းသား လှုပ်ရှားမှုဟာ လွန်ခဲ့တဲ့ ၂ နှစ်လောက်က မီးရထားဘူတာရုံ အမိုးပြိုကျမှု တစ်ခုကြောင့် လူ ၁၆ ဦး သေဆုံးခဲ့တဲ့ ဖြစ်ရပ်ကို အကြောင်းပြုပြီး ပေါ်ပေါက်လာခဲ့တာပါ။ အဲဒီကိစ္စဟာ အစိုးရရဲ့ အဂတိမှုတွေ၊ ပေါ့ဆမှုတွေကြောင့် ကြုံခဲ့ရတာလို့ စွပ်စွဲပြီး ကျောင်းသား အများစု အပါအဝင် ပြည်သူတွေက ၂ နှစ်ကြာ ဆန္ဒပြခဲ့ကြတာ ဖြစ်ပါတယ်။

ဗူချစ်ဟာ သမ္မတသက်တမ်း နှစ်ကြိမ် တာဝန်ထမ်းဆောင်ခဲ့ပြီး ဖြစ်တာကြောင့် တတိယသက်တမ်းအတွက် ယှဉ်ပြိုင်ခွင့် မရှိတော့ပါဘူး။ ဒါကြောင့် ၂၀၁၇ ထိ သူတာဝန်ယူခဲ့ဖူးတဲ့ ဝန်ကြီးချုပ် နေရာကို ပြန်ယူဖို့ ရည်ရွယ်ပြီး ဗူချစ်က SNSနဲ့အတူ ရွေးကောက်ပွဲ ဝင်ခဲ့တာပါ။

ရွေးကောက်ပွဲမှာ အနိုင်ရခဲ့တာ သေချာတဲ့နောက် ကျောင်းသားထု လူထုနိုင်ငံရေး လှုပ်ရှားမှုက ရွေးချယ်တဲ့ ကိုယ်စားလှယ်လောင်း အီလီယာ ဆာဒန်နိုဗစ်က အခုအချိန်ကစပြီး ဆာဘီးယားဟာ လွတ်လပ်တဲ့ နိုင်ငံတစ်ခု ကျိန်းသေပေါက် ဖြစ်လာတော့မယ်လို့ ပြောကြားခဲ့ပါတယ်။

ကျောင်းသား လှုပ်ရှားမှုက ထောက်ခံတဲ့ ကိုယ်စားလှယ်လောင်းတွေမှာ ထင်ရှားတဲ့ နိုင်ငံရေး ခေါင်းဆောင်တွေ မပါအဝင်သလို အများစုက နိုင်ငံရေး အတွေ့အကြုံတွေ မရှိကြပါဘူး။ ဒါပေမဲ့ နိုင်ငံအနှံ့မှာရှိတဲ့ အစိုးရ ဆန့်ကျင်ရေး အင်အားစုတွေဆီကနေ အားကောင်းတဲ့ ထောက်ခံမှုတွေကို ရခဲ့ပါတယ်။

ကိုးကား: BBC