မေလ ၆ ရက်က ရီယိုဒီ ဂျနေးရိုး မြို့မှာရှိတဲ့ ကျူးကျော် ရပ်ကွက် တစ်ခုထဲကို လုံခြုံရေး တပ်ဖွဲ့ဝင်တွေက စစ်ဆင်ရေးတစ်ရပ် ဆင်နွှဲပြီး ဝင်ရောက် စီးနင်းခဲ့ပါတယ်။ ဘရာဇီးမှာ ကပ်ရောဂါ ကူးစက်မှုတွေ မြင့်မားနေတဲ့ ကာလအတွင်း အထူးတလည် အရေးကြီးတဲ့ ကိစ္စမဟုတ်ရင် ရဲတပ်ဖွဲ့က စစ်ဆင်ရေးတွေ မလုပ်ဖို့ ဘရာဇီး တရားရုံးချုပ်က ညွှန်ကြားထားပါတယ်။
ဂျကာရီဇင်ဟို ရပ်ကွက်ထဲမှာ ပြုလုပ်ခဲ့တဲ့ စစ်ဆင်ရေးဟာ ရီယိုမြို့ သမိုင်းမှာ သွေးမြေအကျဆုံး စစ်ဆင်ရေးတစ်ခု ဖြစ်ခဲ့ကြောင်း လူ့အခွင့်အရေး လှုပ်ရှားသူတွေက ပြောပါတယ်။ ရီယိုရဲတပ်ဖွဲ့နဲ့ မူးယစ်မှောင်ခို ဂိုဏ်းတွေကြား ပဋိပက္ခတွေဟာ ပြီးခဲ့တဲ့ နှစ်ပိုင်းတွေမှာ ပိုမိုမြင့်တက်လာပြီး ၂၀၂၀ ပြည့်နှစ် တစ်ခုတည်းမှာတင် ရီယိုမြို့ တည်ရှိရာ ရီယိုဒီဂျနေရိုး ပြည်နယ်မှာ ရဲတပ်ဖွဲ့ရဲ့ စစ်ဆင်ရေးတွေအတွင်း သေဆုံးသူ ၁၂၀၀ ကျော် ရှိခဲ့ပါတယ်။
မေလ ၆ ရက်က ဖြစ်စဉ်မှာတော့ ရဲတပ်ဖွဲ့ ၂၀၀ လောက်ကို အသုံးပြုခဲ့ပြီး ရပ်ကွက်ထဲမှာ ဘက်ပေါင်းစုံ ပိတ်ဆို့ ဖမ်းဆီးခဲ့တာ ဖြစ်ပါတယ်။ ဒီစစ်ဆင်ရေးမှာ လူ ၆ ဦးကို ဖမ်းမိပြီး သေနတ် အလက် ၂၀ နဲ့ မူးယစ်ဆေးဝါးတွေ သိမ်းဆည်း ရမိခဲ့တယ်လို့ သိရပါတယ်။
စစ်ဆင်ရေးအတွင်း ရပ်ကွက် ဒေသခံတွေအပေါ် ရဲတပ်ဖွဲ့က အနိုင်အထက် ပြုမူတာတွေ ရှိခဲ့တယ်ဆိုတဲ့ စွပ်စွဲချက်တွေ ထွက်ပေါ်နေပြီး ဒီကိစ္စကိုတော့ အစိုးရအဖွဲ့က သီးခြား စုံစမ်း စစ်ဆေးသွားမယ်လို့ ကြေညာထားပါတယ်။