ဘင်္ဂလားဒေ့ရှ် နိုင်ငံမှာ ခရီးသည်တင် ရေယာဉ်နဲ့ ကုန်တင်ရေယာဉ် တိုက်မိပြီး လူပေါင်း ၂၁ ဦးထက်မနည်း သေဆုံးသွားကြောင်း သိရပါတယ်။
ဩဂုတ် ၂၇ ရက်က ဘီယွိုင်နာဂါ မြို့ထဲက ရေကန်တစ်ခုမှာ ဆိုးရွားတဲ့ မတော်တဆမှု ဖြစ်ခဲ့တာပါ။ ခရီးသည် ၆၀ လောက် တင်ဆောင်လာတဲ့ ရေယာဉ်ဟာ သဲတွေအပြည့် တင်ဆောင်လာတဲ့ ကုန်တင်စက်လှေနဲ့ တိုက်မိခဲ့တာလို့ အာဏာပိုင်တွေက ပြောပါတယ်။
ကုန်တင်ရေယာဉ်တွေရဲ့ သံမဏိ အစွန်းတွေက ခရီးသည်တင် ရေယာဉ် ကိုယ်ထည်ကို ဖောက်ဝင်သွားပြီး ခရီးသည်တင် ရေယာဉ်က လုံးဝ နစ်မြုပ်သွားခဲ့ပါတယ်။ ဩဂုတ် ၂၈ ရက်ထိ အလောင်း ၂၁ လောင်းကို ရှာတွေ့ထားပြီး အမျိုးသမီး ၉ ဦးနဲ့ ကလေး ၆ ဦး ပါဝင်ကြောင်း ဒေသခံ မီးသတ် တပ်ဖွဲ့က ထုတ်ပြန်ပါတယ်။
ဒေသခံတွေ စုပေါင်းကယ်ဆယ်ခဲ့ကြတဲ့ထဲက ၇ ဦးကို ဆေးရုံ ပို့ဆောင်ထားပြီး နောက်ထပ် ပျောက်ဆုံးနေသူတွေလည်း ရှိသေးတယ်လို့ သိရပါတယ်။ ရေကန်ထဲမှာတော့ ကယ်ဆယ်ရေး လုပ်ငန်းတွေ ဆက်လက်ဆောင်ရွက်နေဆဲပါ။
Public Service Announcement
အာဏာပိုင်တွေက ရေယာဉ်နှစ်စီး တိုက်မိခဲ့တဲ့ ဖြစ်စဉ်နဲ့ ပတ်သက်လို့ အသေးစိတ် ဆက်လက် စုံစမ်းနေပါတယ်။ ဘင်္ဂလားဒေ့ရှ်မှာတော့ ရေကြောင်း မတော်တဆမှု သတင်းတွေက မကြာခဏ ကြားနေ မြင်နေရကျ ကိစ္စမျိုးတွေလို့ ဆိုနိုင်ပါတယ်။
ဧပြီနဲ့ မေလတွေတုန်းက သီးခြားဖြစ်စဉ်တွေမှာ လှေနှစ်စီး နစ်မြုပ်ပြီး လူပေါင်း ၅၄ ဦး သေဆုံးခဲ့ဖူးပါတယ်။ မနှစ်က ဇွန်လမှာလည်း ကူးတို့ရေယာဉ်နှစ်စီး တိုက်မိရာက ၃၂ ဦး သေဆုံးခဲ့ပါတယ်။ ဘင်္ဂလားဒေ့ရှ်ရဲ့ ပြည်တွင်း သယ်ယူပို့ဆောင်ရေး ကဏ္ဍမှာ ရေလမ်းခရီးကို အတော်လေး တွင်တွင်ကျယ်ကျယ် အသုံးပြုနေပေမယ့် လုံခြုံရေး အစီအမံတွေ အားနည်းတာ၊ ပြုပြင်ထိန်းသိမ်းမှုတွေ ညံ့ဖျင်းတာ အပါအဝင် အကြောင်းအမျိုးမျိုးကြောင့် မတော်တဆမှုတွေ မကြာခဏ ကြုံနေရတာ ဖြစ်ပါတယ်။
