အီဂျစ်နိုင်ငံ တောင်ပိုင်းမှာ ကင်းမြီးကောက်တွေ စူးနဲ့ထိုးတာ ခံရပြီး လူပေါင်း ၅၀၀ ကျော် ဆေးရုံရောက်ခဲ့ကြောင်း သိရပါတယ်။
ပြီးခဲ့တဲ့ သီတင်းပတ်ကုန်က အက်စ်ဝမ် ဒေသမှာ ကင်းမြီးကောက် အထိုးခံရလို့ လူ ၃ ဦး သေပြီး ၅၀၀ ကျော် ဆေးရုံတက်ခဲ့ရတယ်လို့ ဒေသခံ မီဒီယာတွေက ဖော်ပြပါတယ်။ အခုဆိုရင် ရာသီဥတု ဆိုးရွားမှုနဲ့ ကင်းမြီးကောက် အန္တရာယ်တွေကြောင့် ဒေသတွင်းမှာ ကျောင်းတွေကိုတောင် ယာယီ ပိတ်ထားလိုက်ရပြီ ဖြစ်ပါတယ်။
အက်စ်ဝမ်မှာ မိုးသည်းသည်းထန်ထန် ရွာသွန်းပြီး ရေကြီးမှုတွေ ဖြစ်ခဲ့ခြင်းက အဆိပ်ရှိတဲ့ တွင်းအောင်း အင်းဆက်ပိုးတွေကို မြေမျက်နှာပြင်ပေါ် ဒေါသတကြီး ထွက်လာစေခဲ့ပါတယ်။ မုန်တိုင်းဒဏ်က ပုန်းရှောင်ဖို့ ကြိုးစားတဲ့ ကင်းမြီးကောက်တွေဟာ လူနေအိမ်တွေထဲထိ ဝင်ရောက်လာရာက လူတွေကို တိုက်ခိုက်မိတာ ဖြစ်ပါတယ်။
အီဂျစ် နိုင်ငံဟာ အီဂျစ်မျိုးရင်း အမြီးတုတ် ကင်းမြီးကောက်တွေ အမြောက်အမြား ကျက်စားတဲ့ နိုင်ငံတစ်ခု ဖြစ်ပါတယ်။ အဲဒီမျိုးစိတ်ဟာ ကမ္ဘာပေါ်မှာ အဆိပ်အပြင်းဆုံး ကင်းမြီးကောက်တွေ စာရင်းမှာ ပါဝင်နေပါတယ်။ သူတို့ရဲ့ အမြီးက စူးနဲ့ ထိုးမိရင် လူတွေ၊ တိရစ္ဆာန်တွေ အကုန် အသက်ဆုံးရှုံးနိုင်တဲ့ အန္တရာယ်မျိုး ရှိနေပါတယ်။
အီဂျစ် ကျန်းမာရေးဝန်ကြီး ခါလစ်ဒ် အက်ဘ်ဒဲလ် ဂါဖာက ဒေသတွင်းမှာရှိတဲ့ ဆေးရုံ ဆေးခန်းတွေ အနေနဲ့ ကင်းမြီးကောက် အထိုးခံရတဲ့ လူနာတွေကို ကုသပေးဖို့ ဆေးဝါးပစ္စည်း စုံလင်အောင် ကြိုတင် စုဆောင်းထားသင့်ကြောင်း တိုက်တွန်းခဲ့ပါတယ်။
အက်စ်ဝမ်မှာ မိုးသည်းထန်ပြီး မိုးသီးတွေပါ ကျဆင်းနေတာကြောင့် နေအိမ် အဆောက်အအုံတွေ ထိခိုက် ပျက်စီးခဲ့သလို လျှပ်စစ်ဓာတ်အား ပြတ်တောက်မှုတွေပါ ဖြစ်ပေါ်ခဲ့ကြောင်း သိရပါတယ်။