ပိတ်ဆို့ အရေးယူထားတဲ့ ဗင်နီဇွဲလား ရေနံတွေနဲ့ ဆက်စပ်တဲ့ နောက်ထပ် ရေနံတင် သင်္ဘောတစ်စီးကို ကြားဖြတ် ဖမ်းဆီးခဲ့ကြောင်း အမေရိကန် စစ်တပ်က အတည်ပြုခဲ့ပါတယ်။
ဇန်နဝါရီ ၂၀ ရက်နေ့က ကာရေဘီယန် ပင်လယ်ပြင်မှာ နောက်ထပ် ရေနံတင် သင်္ဘောတစ်စီးကို စီးနင်း ထိန်းချုပ်ခဲ့တယ်လို့ အမေရိကန် စစ်တပ်က ဆိုပါတယ်။ ဒါဟာ အမေရိကန် သမ္မတ ဒေါ်နယ်လ်ထရမ့်ရဲ့ တစ်လလောက် ကြာမြင့်လာပြီဖြစ်တဲ့ ဗင်နီဇွဲလား ရေနံတွေ ပိတ်ဆို့ အရေးယူမှု စစ်ဆင်ရေးမှာ ၇ စီးမြောက် ဖမ်းဆီးခံရတဲ့ ရေယာဉ်လည်း ဖြစ်လာပါတယ်။
ဗင်နီဇွဲလား ပိုင်နက်နားက ရေပြင်မှာ ဖြန့်ကျက်ထားတဲ့ စစ်သင်္ဘော တစ်ဒါဇင်နီးပါးနဲ့ တပ်ဖွဲ့ဝင် ထောင်ဂဏန်းလောက်ကို ကွပ်ကဲနေတဲ့ အမေရိကန် တောင်ပိုင်းတိုင်း စစ်ဌာနချုပ်ဟာ Motor Vassel Sagittaကို ဘာပြဿနာမှ မရှိဘဲ ကြားဖြတ် ဖမ်းဆီးနိုင်ခဲ့တယ်လို့ ထုတ်ပြန်ခဲ့ပါတယ်။
သမ္မတ ထရမ့်ရဲ့ အရေးယူ ပိတ်ဆို့မှု အမိန့်ကို ဖီဆန်ဖို့ ကြိုးစားခဲ့တဲ့ ရေယာဉ်တစ်စီးကို တားဆီးခဲ့ကြောင်း၊ ဒါဟာ ဗင်နီဇွဲလားရဲ့ တရားမဝင် ရေနံ တင်ပို့မှုတွေကို တားဆီးဖို့ အခိုင်အမာ ဆုံးဖြတ်ထားတဲ့ အမေရိကန်ရဲ့ သဘောထားကို ပြသခြင်းလည်း ဖြစ်ကြောင်း၊ ဗင်နီဇွဲလားဆီကနေ ထွက်ခွာလာတဲ့ ရေနံတွေဟာ မှန်ကန်ပြီး တရားနည်းလမ်းကျတဲ့ လမ်းကြောင်းမျိုးကဆိုတာ သေချာဖို့လိုကြောင်း စစ်ဌာနချုပ် ကြေညာချက်မှာ ဖော်ပြထားခဲ့ပါတယ်။
Public Service Announcement
ကမ္ဘာပေါ်မှာ ရေနံသိုက်တွေ အကြွယ်ဝဆုံး ပိုင်ဆိုင်ထားတဲ့ ဗင်နီဇွဲလားဟာ ထရမ့်ရဲ့ နိုင်ငံခြားရေး မူဝါဒ ဗဟိုချက်တစ်ခု ဖြစ်လာခဲ့ပါတယ်။ ထရမ့်ဟာ ဇန်နဝါရီ ၃ ရက်နေ့မှာ ဗင်နီဇွဲလား သမ္မတ နစ်ကိုလက်စ် မာဒူရိုကို နိုင်ငံပိုင်နက်ထဲထိ ဝင်ရောက် ဖမ်းဆီးစေခဲ့တဲ့နောက် အသစ်တက်လာတဲ့ ယာယီ အစိုးရဟာ အမေရိကန်ရဲ့ ဖိအားပေး တောင်းဆိုမှု အတော်များများကို လိုက်လျောခဲ့ရပါတယ်။
ထရမ့်က အမေရိကန်ဟာ ဗင်နီဇွဲလားရဲ့ ရေနံအရင်းအမြစ်တွေကို အကန့်အသတ်မရှိ ထိန်းချုပ် စီမံသွားမယ်လို့ ပြောကြားခဲ့ပါတယ်။ ဗင်နီဇွဲလားက ထွက်ခွာတဲ့ ရေနံတင် သင်္ဘောတွေကို ကြားဖြတ် ဖမ်းဆီးနေမှုကတော့ ပိတ်ပင်ထားတဲ့ ရေနံတွေကို ခိုးသယ်နေပြီး အရိပ်သင်္ဘောတွေလို့ ခေါ်ဝေါ်လေ့ရှိတဲ့ ရေယာဉ်တွေကို ဖြိုခွင်းဖို့ဖြစ်ကြောင်း ထရမ့်က အကြောင်းပြထားပါတယ်။ အဲဒီ သင်္ဘောတွေဟာ ပိတ်ဆို့ အရေးယူမှုတွေ ကြုံနေတဲ့ အီရန်၊ ရုရှားနဲ့ ဗင်နီဇွဲလားတို့လို နိုင်ငံတွေဆီက ရေနံတွေကို အဓိက ပုန်းလျှိုးကွယ်လျှိုး သယ်ဆောင်ပေးလေ့ ရှိပါတယ်။
ကိုးကား: Guardian
ဓာတ်ပုံ – Getty Images
