ဟန်နွေ/People’s Spring
ကိုးကန့်တပ်မတော်(MNDAA) သိမ်းပိုက်ထားသည့် လားရှိုးမြို့ကို စစ်ကောင်စီက တစ်လနီးပါးအတွင်း လေကြောင်း ဗုံးကြဲတိုက်ခိုက်မှု ၇ကြိမ်ပြုလုပ်ခဲ့ရာ အဆိုပါ တိုက်ခိုက်ခံရမှုများ အတွင်းဒေသခံပြည်သူ ၃ ဦးသေဆုံးကာ ၃၈ ဦး ဒဏ်ရာရခဲ့ကြောင်း MNDAAက ထုတ်ပြန်သည်။
စက်တင်ဘာ ၂၇ရက်၌ စစ်ကောင်စီက လားရှိုးမြို့ကို ဗုံးကြဲတိုက်ခိုက်ခဲ့၍ အရပ်သား ၂ ဦးသေဆုံးကာ ၆ဦး ဒဏ်ရာရသည့် အခြေအနေကို အသိပေးခဲ့သည်။ အဆိုပါတိုက်ခိုက်ခံရမှုကြောင့်လားရှိုးမြို့တွင် အကြီးဆုံးသော မြို့မဈေးကြီး၏ ဆိုင်ခန်းများ၊ အဆောက်အဦများ၏ ထက်ဝက်နီးပါး ပျက်စီးခဲ့သည်ဟုသိရသည်။ အဆိုပါ အခြေအနေသည် ပြည်သူလူထုတို့အတွက်ကြေကွဲဖွယ် အခြေအနေလည်း ဖြစ်ခဲ့ရဟု MNDAAက ထုတ်ပြန်သည်။
Public Service Announcement
လေကြောင်း တိုက်ခိုက်မှုအတွင်း မီးလောင်ကျွမ်းခဲ့ပြီး မီးများ အချိန်မီ ငြှိမ်းသက်ခဲ့ရသည်ဟုသိရသည်။
လားရှိုးမြို့တွင် ဩဂုတ်လကုန်မှ စက်တင်ဘာ ၂၇ ရက်နေ့အထိတိုက်ပွဲများဖြစ်ပွားခြင်းမရှိဘဲစစ်ကောင်စီက ဗုံးကြဲတိုက်ခိုက်မှု ၇ ပြုလုပ်ခဲ့သည်ဟုသိရသည်။ စစ်ကောင်စီက လေကြောင်းတိုက်ခိုက်မှုများကို စက်တင်ဘာလ နောက်ဆုံးပတ်တွင်ပိုလုပ်လာခဲ့ခြင်းဖြစ်သည်။
“ပြည်သူတို့၏ အသက်အိုးအိမ်များကို လုံးဝဂရုမစိုက်ကာ ရက်စက်ကြမ်းကြုတ်သော အပြုအမူများသည် ပြည်သူတို့၏ ကဲ့ရဲ့ ရှုတ်ချခြင်းကိုထပ်မံခံရကာ သမိုင်းတွင် ထာဝရ အရှက်ရစေမည့် မဏ္ဍိုင်အဖြစ် ရှုတ်ချခံရမည်” ဟုလည်း MNDAA က စစ်ကောင်စီ၏ အရပ်သားပြည်သူများကိုပါမရှောင် ဗုံးကြဲသတ်ဖြတ်နေမှုနှင့်ပတ်သက်၍ ပြောသည်။
စစ်ကောင်စီ၏ အရှေ့မြောက်တိုင်းစစ်ဌာနချုပ် (ရမခ) အပါအဝင် လားရှိုးကို ဩဂုတ် ၃ရက်တွင် MNDAAက အပြီးသတ်သိမ်းပိုက်နိုင်ခဲ့သည်။စစ်တပ်၏ တိုင်းစစ်ဌာနချုပ်တစ်ခုကို တိုင်းရင်းသားလက်နက်ကိုက်အဖွဲ့က သိမ်းပိုက်နိုင်မှုမှာ ပထမဆုံးအကြိမ်ဖြစ်သည်။
MNDAAက လားရှိုးမြို့ကိုသိမ်းပိုက်ပြီးနောက် မြို့ ပြန်လည်ထူထောင်ရေး လုပ်ကိုင်နေသည်။MNDAA သိမ်းပိုက်ထိန်းချုပ်ထားသည့် လားရှိုးမြို့ကို စစ်ကောင်စီက ဩဂုတ် ၃၀ရက်တွင် စတင်ဗုံးကြဲတိုက်ခိုက်ခဲ့ပြီး စက်တင်ဘာလတွင် ၆ကြိမ်ထက်မနည်း လေကြောင်း မှထပ်မံဗုံးကြဲခဲ့ခြင်းဖြစ်သည်။
