ကျွန်းလှမြို့နယ်တွင် နှစ်ရက်ဆက်လေကြောင်းတိုက်ခိုက်ရာ ပြည်သူတစ်ဦးသေဆုံး၊ နေအိမ်များ ပျက်စီး

ဇေအောင်/People’s Spring

စစ်ကိုင်းတိုင်း၊ ကျွန်းလှမြို့နယ်တွင် စစ်ကောင်စီတပ်က နှစ်ရက်ဆက် လေကြောင်းတိုက်ခိုက်ရာ ပြည်သူတစ်ဦးသေဆုံးပြီး နေအိမ်များပျက်စီးခဲ့ကြောင်း သတင်းရရှိသည်။

ယနေ့(နိုဝင်ဘာ ၁၇ရက်) ညနေ ၄ နာရီ မိနစ် ၂၀ခန့်က ကျွန်းလှမြို့နယ်၊လိပ်ဆင်းတောင်ကျေးရွာအား စစ်ကောင်စီတပ်က ဂျက်ဖိုက်တာဖြင့် လေကြောင်းတိုက်ခိုက်ရာ အမျိုးသားတစ်ဦးသေဆုံးပြီး ကားဝပ်ရှော့တစ်ခုရှိ ကားများနှင့် နေအိမ် သုံးလုံးပျက်စီးခဲ့ကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြောသည်။

” ဘာတိုက်ပွဲမှမရှိဘူး။ နှစ်ရက်ဆက်တိုက် လေယာဥ်ပစ်နေတာ။ ကျွန်းလှမီးအိမ်ရှင်ဆိုတဲ့ Page စကစ Pageပေါ့။ သူတို့ Pageက ပြောသမျှဟာတွေကို အကုန်လုံးကိုလိုက်ပြီး ပစ်နေတာ။ ဟိုနားPDF ရှိတယ်ပြော ဒီနား PDFရှိတယ်ပြော။ တကယ်တမ်း ရွာထဲတွေ။ ဒီတိုင်းနေနေတဲ့ စျေးဆိုင်တွေကော ဝပ်ရှော့တွေကော အကုန်ပစ်တာ။”ဟု အထက်ပါအဖွဲ့တာဝန်ရှိသူက ပြောသည်။

Public Service Announcement

အလားတူ ယမန်နေ့(နိုဝင်ဘာ ၁၆ ရက်) ညနေ ၅ နာရီခွဲခန့်နှင့် ၇ နာရီခွဲခန့်ကလည်း ကျွန်းလှမြို့နယ် အနောက်ခြမ်းရှိ ရွာကုန်းကြီးကျေးရွာအား ဂျက်ဖိုက်တာ၂စီးဖြင့် လေကြောင်းတိုက်ခိုက်ခဲ့ရာ ပြည်သူတစ်ဦး ဒဏ်ရာရပြီး နေအိမ်အချို့မီးလောင်ပျက်စီးကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြောသည်။

နိုဝင်ဘာ ၈ ရက်ကလည်း ကျွန်းလှမြို့နယ်၊ ဘအင်းသရက်တောကျေးရွာအား မီးရှို့ဖျက်ဆီးပြီး အမျိုးသား၂ဦးအား သတ်ဖြတ်ကာ သုံးဦးအား ဖမ်းဆီးသွားသည်။