ရဲခေါင်း/People’s Spring
၂၀၂၅တွင် တောင်တန်းဒေသမှသည် မြေပြန့်ဒေသများဆီသို့ တော်လှန်စစ်ကို ဝတ်မှုန်ကူး သယ်ဆောင်ရမည်ဆိုကာ မြန်မာပြည်အလယ်ပိုင်းအား ထိုးဖောက်ဝင်ရောက်နိုင်ရေး စစ်ရေးရည်မှန်းချက်အား ဖော်ဆောင်သွားမည်ဟု ကျောင်းသားလက်ရုံးတပ်တော်-SAF က ဇန်နဝါရီ ၁ရက်တွင် အသိပေး ထုတ်ပြန်သည်။
၂၀၂၅သည် တော်လှန်စစ် ပီပီပြင်ပြင် အကောင်အထည်ဖော်နိုင်ရေးအတွက် တော်လှန်ရေးတပ်ပေါင်း စုတစ်ရပ်ဖြစ်လာရန် နိုင်ငံရေး၊စစ်ရေးအရ ညှိနှိုင်းဆွေးနွေး လက်တွဲအကောင်အထည်ဖော်ရမည့် နှစ်ဟုလည်း SAF က ဆိုသည်။
လွန်ခဲ့သော (၂)နှစ်ခန့်ကစ၍ အညာဒေသနှင့် မြေလတ်ဒေသတွင် စစ်ဒေသများထားရှိပြီး ပြောက်ကျား စစ်၊လှုပ်ရှားစစ်များ ဆောင်ရွက်ခဲ့ပြီး ယခု ၂၀၂၅တွင် တောင်တန်းဒေသမှသည် မြေပြန့်ဒေသများဆီသို့ တော်လှန်စစ်ကို ဝတ်မှုန်ကူး သယ်ဆောင်ရမည်ဟုလည်း SAFက အသိပေးထားသည်။
Public Service Announcement
စစ်တပ်အာဏာသိမ်းပြီး လေးနှစ်တာကာလအတွင်း လူမျိုးစုလက်နက်ကိုင်တော်လှန်ရေးအဖွဲ့အစည်းများ (EROs)ထံမှ သင်ယူဆည်းပူးအတွေ့အကြုံယူခဲ့သည့် လေ့ကျင့်ရေး၊စစ်ရေး၊ထောက်လှမ်းရေး၊စစ်ဆင်ရေးနှင့် စည်းရုံးရေးဆိုင်ရာအတွေ့အကြုံများကို “မြန်မာပြည်အလယ်ပိုင်း ထိုးဖောက်ဝင်ရောက်နိုင်ရေး” စစ်ဆင်ရေးရည်မှန်းချက်ကို ဝတ်မှုန်ကူးသယ်ဆောင်မည်ဟု ထုတ်ပြန်ချက်တွင် ဖော်ပြထားသည်။
SAF တပ်ဖွဲ့သည် ရန်ကုန်အခြေစိုက် တက္ကသိုလ်ကျောင်းသားသမဂ္ဂများ(တကသများ-ရန်ကုန်)အဖွဲ့ဝင်များက ဦးဆောင်ပြီး အာရက္ခတပ်တော်(AA)ထံ လေ့ကျင့်သင်ကြားကာ ၂၀၂၁ ဧပြီ ၂၇ ရက်တွင် စတင် တပ်တည်ထောင်ခဲ့ခြင်းဖြစ်သည်။
SAF တပ်ဖွဲ့သည် ရခိုင်ပြည်နယ်အတွင်း မြို့သိမ်းတိုက်ပွဲများတွင် AAနှင့်အတူ ပါဝင်တိုက်ခိုက်နေသည့် တပ်ဖွဲ့တစ်ခုဖြစ်သည်။
ယခု ၂၀၂၅တွင် စစ်ကိုင်းတိုင်းအတွင်း တပ်မဟာအသစ်တစ်ခုဖွဲ့စည်း၍ စစ်ဆင်ရေးအရှိန်အဟုန်ကို တိုးမြှင့်ဖော်ဆောင်သွားမည်ဟုလည်း ပြည်သူ့ကာကွယ်ရေးတပ်မတော်(မန္တလေး)က ၂၀၂၄ ဒီဇင်ဘာ ၃၀ရက်တွင် အသိပေးထုတ်ပြန်ထားသည်။
ဖက်ဒရယ်ဒီမိုကရေစီရရှိရေးနှင့် စစ်အာဏာရှင်စနစ် အမြစ်ပြတ်ချေမှုန်းရေးအတွက် တစ်စိုက်မတ်မတ် တိုက်ပွဲဝင်နေသော တပ်ဖွဲ့ဖြစ်ကြောင်း၊ ၂၀၂၄တစ်နှစ်တာအတွင်း စစ်ကောင်စီအား အထိနာစေသည့် စစ်ဆင်ရေးကြီးများကို မိတ်ဖက်တော်လှန်ရေးတပ်ဖွဲ့များနှင့်အတူ စဉ်ဆက်မပြတ်ဖော်ဆောင်ခဲ့ပြီး ထိန်းချုပ်စိုးမိုးနယ်မြေ အမြောက်အမြားလည်း ရရှိခဲ့ကြောင်း အသိပေးထားသည်။
ထို့ကြောင့် လာမည့် ၂၀၂၅တွင် စစ်ကိုင်းတိုင်းအတွင်း တပ်မဟာအသစ် တစ်ခုဖွဲ့စည်း၍ စစ်ဆင်ရေးအရှိန်အဟုန်ကို တိုးမြှင့်ဖော်ဆောင် သွားမည်ဖြစ်ကြောင်း မန္တလေး PDFက ထပ်မံအသိပေးသည်။
အလားတူ ကရင်နှင့် ရှမ်းမြောက်၌ တိုင်းရင်းသားတော်လှန်ရေးတပ်ဖွဲ့များနှင့်အတူ တိုက်ပွဲဝင်နေသည့် ဗမာပြည်သူ့လွတ်မြောက်ရေးတပ်တော် (BPLA )ကလည်း အညာဒေသတွင် တိုက်ပွဲများဖော်ဆောင်နိုင်ရန် အညာစစ်ဒေသအတွက် တပ်သားသစ်များ ခေါ်ယူနေသည်။
