တော်လှန်ရေးအစုအဖွဲ့တွေအားလုံး သဘောတူလက်ခံတဲ့ နိုင်ငံရေးဘုံရည်မှန်းချက်တစ်ခုကို ဆွေးနွေးဖော်ဆောင်ဖို့လိုအပ်တယ်လို့ ကျောင်းသားလက်ရုံးတပ်တော်အပါအဝင် အဖွဲ့(၄)ဖွဲ့က ပူးတွဲသဘောထားထုတ်ပြန်ထားပါတယ်။
အဲဒီလိုပဲ ကွပ်ကဲမှုစနစ်ပြတ်သားခိုင်မာတဲ့ မဟာမိတ်တပ်ပေါင်းစုတစ်ရပ်အဖြစ် ဟန်ချက်ညီညီတိုက်ပွဲဝင်နိုင်ဖို့လည်း အထူးအရေးကြီးတယ်လို့ ထုတ်ပြန်ချက်မှာပါဝင်ပါတယ်။
ဒီကနေ ကျရောက်တဲ့ 7July နေ့နဲပတ်သက်ပြီး တကသများ-ရန်ကုန် ကျောင်းသားလက်ရုံးတပ်တော်၊ ပြည်သူ့လွတ်လပ်ရေးအဖွဲ့/ပြည်သူ့လွတ်လပ်ရေးတပ်တော်၊ ပြည်သူ့လွတ်မြောက်ရေးအဖွဲ့နဲ့ ပြည်သူ့တော်လှန်ရေးအင်အားစု အနောက်ပိုင်းဒေသ အဖွဲ့တွေက ပူးတွဲသဘောထားထုတ်ပြန်ထားတာပါ။
ယနေ့ နွေဦးတော်လှန်ရေးရဲ့အရှိန်အဟုန်ဟာ ဟန်ချက်ညီအားကောင်းစွာ တိုးတက်ရွေ့လျားလျက်ရှိပြီး မိမိတို့ရင်ဆိုင်နေရတဲ့ရန်သူဟာ ရာစုနှစ်ထက်ဝက်ကျော် ပြည်သူကိုဖိနှိပ်အုပ်ချုပ်ဖို့ စနစ်ကျခိုင်မာစွာတည်ဆောက်ထားတဲ့ စစ်ယန္တရားတခုဖြစ်ကာ အဆိုပါရန်သူကို အမြစ်ပြတ်ချေမှုန်းဖို့ တော်လှန်ရေးအင်အားစုတွေအကြား ပိုမိုအားကောင်းခိုင်မာတဲ့ နိုင်ငံရေး၊ စစ်ရေးစုဖွဲ့မှုတရပ် ပေါ်ပေါက်လာမှသာ ဒီတိုက်ပွဲကိုအဆုံးသတ်အနိုင်ရမှာလို့ လက်ခံယုံကြည်ကြောင်း ထုတ်ပြန်ချက်မှာဖော်ပြထားပါတယ်။
Public Service Announcement
ဝေဝါးကွဲပြားတဲ့ ရည်မှန်းချက်တွေနဲ့ စုစည်းညီညာမှုမရှိတဲ့ လက်နက်ကိုင်တော်လှန်ရေးဟာ ဘုံရန်သူပြုတ်ကျသွားပြီးနောက် ပြည်တွင်းစစ်နဲ့ စစ်ဘုရင်ဝါဒကို ထပ်မံဦးတည်စေပြီး သမိုင်းတကျော့ပြန်ခြင်းကိုသာ ဖြစ်ပေါ်စေမည်ဟူတဲ့ အတိတ်ကဖြစ်ရပ်တွေကို သင်ခန်းစာယူကြရမှာဖြစ်တယ်လို့ ထုတ်ပြန်ချက်မှာပါရှိတာပါ။
ဒါ့အပြင် ကျွန်ုပ်တို့အဖွဲ့အနေနဲ့ စစ်အစိုးရ၊ စစ်အုပ်စု၊ စစ်ဗျူရိုကရက်ဟူတဲ့ စစ်သုံးစစ်တိုက်ဖျက်ရေးမှုအပေါ် မားမားမတ်မတ်ရပ်တည်ကာ လူမျိုးပေါင်းစုံ ဖိနှိပ်ခံပြည်သူလူထုရဲ့ ကိုယ့်ကြမ္မာကိုယ်တိုင်ဖန်တီးခွင့်ရရှိရေးအပေါ် ခိုင်မာစွာရပ်တည်ပြီး ပြည်သူလူထုအားလုံးအတွက် လွတ်လပ်တဲ့ တရားမျှတတဲ့ တန်းတူညီမျှတဲ့ နိုင်ငံတော်တရပ်ဖြစ်စေဖို့ ရပ်တည်တိုက်ပွဲဝင်သွားမှာဖြစ်တယ်လို့ ကျောင်းသားလက်ရုံးတပ်တော်အပါအဝင် အဖွဲ့(၄)ဖွဲ့က ပူးတွဲသဘောထားထုတ်ပြန်ထားတာဖြစ်ပါတယ်။
