ဇွန်-၁၊၂၀၂၅။အိမ်သွင်/People’s Spring
နာဂဒေသအတွင်း မိုးသည်းထန်စွာရွာသွန်းနေပြီး အိန္ဒိယနိုင်ငံ-မဏိပူရ်ပြည်နယ်နှင့် နာဂဒေသဆက်သွယ်ရေးလမ်းပိုင်းပြတ်တောက်ကာ စားနပ်ရိက္ခာအခက်ခဲရင်ဆိုင်နေရကြောင်းဒေသခံများကပြောသည်။
နာဂဒေသ၌မေလ ၂၄ရက်မှစ၍ မိုးကောင်းနေပြီး ဒေသတွင်းအဓိကကုန်သွယ်ရေးလမ်းပိုင်းတွင် နေရာအများစုမြေပြိုကာမိုင်တိုင် ၁/၄ နှင့် ၁/၇ တွင် အဆိုးရွားဆုံးဖြစ်နေသည်ဟု ဒေသခံတဦးကပြောသည်။
“လမ်းတွေကို ပြင်ဖို့မလွယ်ပေမယ့်မပြင်လို့မရဘူး။ကုန်ဈေးနှုန်းတွေအရမ်းတက်နေပြီ။ မိုးကလည်း မရပ်ဘူး။ ရှေ့ရက်တွေအတွက် မစဉ်းစားတတ်အောင်ပဲ”ဟု နန်းယွန်းမြို့ခံတစ်ဦးကပြောသည်။
Public Service Announcement
https://www.facebook.com/LuduNwayOo/videos/1768316814123395
နာဂဒေသအတွင်း နန်းယွန်း၊ လေရှီး၊ ဆွမ္မရာမြို့တို့တွင် မြေပြိုကာ လမ်းပန်းဆက်သွယ်ရေးခက်ခဲနေပြီဟု ဒေသခံများကပြောသည်။နာဂဒေသ၊ ချင်းပြည်နယ်တို့နှင့်ဆက်စပ်နေသော အိန္ဒိယနိုင်ငံဘက်ခြမ်းတွင်လည်း မိုးများပြီး မြေပြိုမှုဘေး ရင်ဆိုင်နေရကြောင်း သတင်းရရှိသည်။
ပျက်စီးနေသော လမ်းပိုင်းသည် နာဂဒေသအတွက် အခြေခံ လူသုံးကုန်နှင့် အခြားကုန်ပစ္စည်းများသယ်ယူပို့ဆောင်ရေး အဓိကအသုံးပြုနေသောနယ်စပ်လမ်းဖြစ်ပြီး မေလ ၃၁ ရက် နောက်ပိုင်း ဆွမ္မရာ-လေရှီး-ထမံသီ- နယ်စပ်ကုန်ကားများ သွားလာခြင်း မရှိသေးကြောင်း ဒေသခံများကိုကိုးကား၍ Naga Newsက ဖော်ပြထားသည်။
မေလ ၂၉ရက်က ဘင်္ဂလားဒေ့ရှ်ကို ဝင်သွားသော မုန်တိုင်းသည် ကုန်းတွင်းလေဖိအားနည်းရပ်ဝန်းအဖြစ် မြန်မာ-အိန္ဒိယနယ်စပ်အနီးအထိ ဖြတ်နေ၍ နာဂဒေသတွင်လည်း မိုးကောင်းနေခြင်းဖြစ်သည်။
ကုန်းတွင်းလေဖိအားနည်းရပ်ဝန်းသည် ဆက်လက်ရှိနေသေးပြီး မိုးလည်းဆက်ရွာနေကြောင်း ဒေသခံတစ်ဦးကပြောသည်။
ချင်းပြည်နယ်၊ကချင်ပြည်နယ်၊ရခိုင်ပြည်နယ်၊ စစ်ကိုင်းတိုင်းနှင့်မကွေးတိုင်းတို့တွင် မိုးဆက်ရွာနိုင်သည်ဟုအမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က သတ်ိပေးထားသည်။
