'/%3E%3C/svg%3E){kind=small}
သြဂုတ်-၃၊၂၀၂၅။ဇော်ရမ်း/People’s Spring
အာရက္ခတပ်တော်(AA)ထိန်းချုပ်ထားသည့်သံတွဲမြို့နယ်ကို ဩဂုတ်လ ၂ရက်နေ့တွင် စစ်ကောင်စီက လက်နက်ကြီးဖြင့် သုံးကြိမ်ထက်မနည်းပစ်ခတ်၍ ထိခိုက်ပျက်စီးမှုမှုများရှိခဲ့သည်။
သံတွဲမြို့နယ်၊ဂျိတ္တောရွာကို ဩဂုတ်လ ၂ရက်နေ့ ညနေ ၃နာရီခန့်မှ ၄နာရီခန့်အတွင်း စစ်ကောင်စီက လက်နက်ကြီးဖြင့်ပစ်ခတ်ခဲ့ခြင်းဖြစ်ကြောင်း ဒေသခံစစ်ဘေးရှောင်အချို့ကပြောသည်။
“စကစတပ်ကပင်လယ်ထဲကနေပစ်နေတာပါ။ ဇွန်လကလည်းပစ်တယ်။လက်နက်ကြီးရော လေကြောင်းရောသတိထားနေရပေမယ့် လွယ်တော့မနေဘူးလေ” ဟု သံတွဲမြို့မှစစ်ဘေးရှောင်တစ်ဦးကပြောသည်။
Public Service Announcement
သံတွဲမြို့နယ်သည် စစ်ကောင်စီ၏ မောင်ရွှေလေးရေတပ်ရှိသည့် မြို့ဖြစ်ပြီး ၂၀၂၄ ခုနှစ် စက်တင်ဘာလ ၅ရက်၌ AAက အပြီးသတ် သိမ်းပိုက်ခဲ့သည်။ ရခိုင်ပြည်နယ်မှမြို့သိမ်းတိုက်ပွဲများအနက်သံတွဲမြို့သိမ်းတိုက်ပွဲသည် အခက်အခဲဆုံးဖြစ်ကြောင်း AAက ထုတ်ပြန်ခဲ့သည်။ စစ်ကောင်စီ၏ မောင်ရွှေလေးရေတပ်စခန်း (ခေါ်)ရေတပ်ပင်မရေငုပ်နှင့် ဆယ်ယူရေးတပ် ကိုပါ AA ကသိမ်းပိုက်နိုင်ခဲ့ခြင်းဖြစ်ပြီး နွေဦးတော်လှန်ရေးကာလတွင်စစ်တပ်၏ ရေတပ်စခန်းတစ်ခုပထမဆုံးလက်လွှတ်ခဲ့ရခြင်းလည်းဖြစ်သည်။
စစ်ကောင်စီတပ်သည် သံတွဲမြို့အားလက်လွှတ်ရပြီးနောက် လေကြောင်းတိုက်ခိုက်မှုများ၊ လက်နက်ကြီးပစ်ခတ်မှုများ ဆက်တိုက်ပြုလုပ်ခဲ့ရာ အရပ်သား၈၀ဦးထက်မနည်း သေဆုံးခဲ့သည်။ လအနည်းငယ်အကြာ၌ ပစ်ခတ်မှုများငြိမ်သက်သွားပြီးနောက် ပြီးခဲ့သည့် ဇွန်လမှစတင်၍ လက်နက်ကြီးများဖြင့် မကြာခဏပစ်ခတ်ခဲ့ခြင်းဖြစ်သည်။
ဇွန်လ ၃ရက်က လက်နက်ကြီးများဖြင့်ပစ်ခတ်ခဲ့ပြီး ဇွန်လ ၇ရက် ညပိုင်းတွင် သံတွဲမြို့၊ ကျောက်ကြီးရွာစာသင်ကျောင်း၊ပုဇွန်ဖြေရွာစာသင်ကျောင်း နှင့် စစ်သားစုဆောင်းရေးတပ်ကို ဂျက်ဖိုက်တာဖြင့်ဗုံးကြဲခဲ့သည်။အဆိုပါဗုံးကြဲတိုက်ခိုက်မှု၌ စစ်ဘေးရှောင်ပြည်သူလေးဦး သေဆုံးပြီး ဆယ်ဦးဒဏ်ရာရခဲ့သည်။
