'/%3E%3C/svg%3E){kind=small}
အောက်တိုဘာ-၁၉၊ ၂၀၂၅။ ထားမြတ်/People’s Spring
ကချင်လွတ်လပ်ရေးအဖွဲ့(KIO/KIA) ဌာနချုပ်လိုင်ဇာကို စစ်ကောင်စီက အသေခံဒရုန်းနဲ့ ထပ်မံ တိုက်ခိုက်ခဲ့လို့ တရုတ်လင်မယား နှစ်ဦး ဒဏ်ရာရခဲ့တယ်လို့ KIO/KIA သတင်းပြန်ကြားရေးဌာနက အောက်တိုဘာ ၁၈ရက်ညပိုင်းမှာ သတင်းဖော်ပြပါတယ်။
အခု နှစ်အတွင်းမှာ စစ်ကောင်စီက လိုင်ဇာကို အသေခံဒရုန်းနဲ့ တိုက်ခိုက်တာ ၆ကြိမ်ရှိပြီလို့လည်း ဆိုပါတယ်။
အောက်တိုဘာ ၁၆ရက်ည ၁၁နာရီကျော်က လိုင်ဇာကို စစ်တပ်က ဒရုန်းနဲ့ ထပ်မံတိုက်ခိုက်ခဲ့တာပါ။
Public Service Announcement
အဲဒီလို တိုက်ခိုက်ခဲ့လို့ လိုင်ဇာမြို့စည်ပင်သာယာစျေးတန်းက ဟင်းသီးဟင်းရွက်ရောင်းတဲ့ တရုတ်လင်မယားနှစ်ဦး ဒဏ်ရာရရှိခဲ့ပြီး စျေးဆိုင်ခန်းတွေလည်း ပျက်စီးခဲ့တယ်လို့ ဆိုပါတယ်။
စစ်ကောင်စီဟာ မြစ်ကြီးနားအခြေစိုက် မြောက်ပိုင်းတိုင်း စစ်ဌာနချုပ်ကနေ လိုင်ဇာကို အသေခံဒရုန်းနဲ့ တိုက်ခိုက်တာ ဖြစ်နိုင်တယ်လို့ ကချင်စစ်ရေးသတင်းရင်းမြစ်တဦးက ပြောပါတယ်။
စစ်ကောင်စီတပ်ဟာ KIAနဲ့ တိုက်ပွဲတွေမှာ အထိနာရင် လိုင်ဇာဌာနချုပ်ကို လေကြောင်းနဲ့ တိုက်ခိုက်တာ၊ လက်နက်ကြီးနဲ့ ပစ်ခတ်တာ အရင်ကတည်းက လုပ်ဆောင်ခဲ့တာဖြစ်ပြီး ၂၀၂၄ နှစ်လယ်က စလို့ လိုင်ဇာအနီးက စစ်ကောင်စီစခန်းတွေ သိမ်းပိုက်ခံရပြီးနောက်မှာ လက်နက်ကြီးထက် ဒရုန်းအသုံးပြု တိုက်ခိုက်တာတာ တွေ့ရပါတယ်။
ဒါ့အပြင် စစ်ကောင်စီဟာ စာသင်ကျောင်းတွေကို ပစ်မှတ်ထား ဗုံးကြဲတိုက်ခိုက်တာတွေကြောင့် ကျောင်းသား၊ကျောင်းသူတွေ အသက်သေဆုံးမှုများပြားလာကြောင်း KIA သတင်းပြန်ကြားရေးဌာနက ပြီးခဲ့တဲ့ရက်ပိုင်းမှာ သတင်းဖော်ပြထားပါတယ်။
ကချင်ပြည်နယ်အပြင် ရှမ်းနဲ့ ချင်းပြည်နယ်တွေမှာလည်း စစ်ကောင်စီက စာသင်ကျောင်းတွေကို ဗုံးကြဲတိုက်ခိုက်ခဲ့လို့ ကျောင်းသားတွေ ထိခိုက်သေဆုံးခဲ့ရတာလို့ ဆိုပါတယ်။
စစ်ကောင်စီတပ်ဟာ တိုက်ပွဲမှာ အထိနာ စစ်ရှုံးနေတာကြောင့် လူနေထိုင်ရာနေရာ၊ စာသင်ကျောင်း၊ စျေး စတဲ့ ပြည်သူအများနေရာတွေကို ဗုံးကြဲတိုက်ခိုက်နေတာဖြစ်တယ်လို့လည်း KIA သတင်းပြန်ကြားရေးဌာနက သတင်းဖော်ပြထားပါတယ်။
စစ်ကောင်စီတပ်နဲ့ KIA တို့ဟာ အောက်တိုဘာလအတွင်း ဗန်းမော်၊ ၀ိုင်းမော်၊ ဖားကန့် ၊ မချမ်းဘော စတဲ့ မြို့နယ်တွေမှာ တိုက်ပွဲတွေဖြစ်ပွားခဲ့ပါတယ်။ စစ်ကောင်စီဟာ တိုက်ပွဲဖြစ်ပွားမှုမရှိတဲ့ နေရာတွေကိုပါ လေကြောင်း တိုက်ခိုက်တာ လက်နက်ကြီး ရမ်းသမ်းပစ်ခတ်တာတွေ လုပ်ဆောင်ခဲ့လို့ ပြည်သူသေဆုံးထိခိုက်မှုတွေရှိခဲ့ပါတယ်။
