ဂွေးချို-ဂွေးပင်လမ်းပိုင်း ညဘက်မဖြတ်သန်းဖို့ ချောက် ပကဖ အရေးပေါ်ကြေညာ

နိုဝင်ဘာ-၂၀၊ ၂၀၂၅။ ပုရစ်/People’s Spring

မကွေးတိုင်း၊ ချောက်မြို့နယ်က ဂွေးချိုနဲ့ ဂွေးပင်ကြား လမ်းပိုင်းကို ညဘက်ဖြတ်သန်းသွားလာတာမပြုဖို့ ချောက်မြို့နယ်ပြည်သူ့ကာကွယ်ရေးအဖွဲ့ ( ချောက်ပကဖ)က နိုဝင်ဘာ ၁၉ရက်မှာ အရေးပေါ် ကြေညာချက် ထုတ်ပြန်ပါတယ်။

ချောက်ပကဖ စိုးမိုးထိန်းချုပ်ထားတဲ့ ပြည်ထောင်စုအမှတ်(၃)လမ်းမကြီးပေါ်ရှိ ဂွေးချို – ဂွေးပင် လမ်းပိုင်းအား ပြည်သူလူထုအနေနဲ့ ည ၉ နာရီကနေ မနက် ၆နာရီအတွင်း ဖြတ်သန်းသွားလာတာ မပြု ဖို့ အသိပေးထားတာဖြစ်ပါတယ်။

အသိပေးချက်ကို မလိုက်နာရင် ဖြစ်လာမယ့်အကြောင်းအရာတွေ တာဝန်ယူမှာ မဟုတ်ကြောင်း ထုတ်ပြန်ချက်မှာဖော်ပြထားပြီး တွေ့ရှိရင် အရေးယူမယ်လို့လည်း ကြေညာပါတယ်။

Public Service Announcement

ဒါ့အပြင် လမ်းပိုင်းအသုံးပြုသူတွေ လိုက်နာရမယ့် စည်းကမ်းတွေကိုလည်း ထုတ်ပြန်ခဲ့ရာ ဂွေးချို-ဂွေးပင်လမ်းပိုင်းအား အသုံးပြုတဲ့ ယာဉ်တွေအနေနဲ့ မောင်းနေစဉ် မှန်ချထားဖို့၊ အရှိန်လျှော့ မောင်းနှင်ဖို့ ဖော်ပြထားပါတယ်။

ဒါ့အပြင် အဲဒီလမ်းပိုင်းမှာ တိုက်ပွဲတွေ ဖြစ်လာရင်တိုက်ပွဲအတွင်းဖြတ်သန်းသွားလာခြင်းမပြုဖို့ သတိပေးထားပြီး ပြည်သူ့ကာကွယ်ရေးတပ်ဖွဲ့ဝင်တွေရဲ့ လိုအပ်ချက်အရ စစ်ဆေးမှုတွေ ကို ပူးပေါင်းဆောင်ရွက်ပေးဖို့ ကြေညာပါတယ်။

ကျန်းမာရေး အခြေအနေရ ဖြန်သန်းသွားလာဖို့လိုအပ်ရင် မြို့နယ် ပကဖကို အသိပေး အကြောင်းကြား ဖြတ်သန်းသွားလာနိုင်ကြောင်းလည်း ချောက်ပကဖက ထုတ်ပြန်ထားပါတယ်။

ဂွေးချို-ဂွေးပင်လမ်းပိုင်းဟာ ချောက်မြို့နယ်နဲ့ ရေနံချောင်းမြို့နယ်အကြားမှာ ရှိတဲ့ လမ်းပိုင်းဖြစ်ပြီး အဲဒီ လမ်းပိုင်းမှာ စစ်ကောင်စီတပ် ထောက်ပို့ယာဉ်တွေ သွားလာလေ့ရှိတဲ့လမ်းပိုင်းလည်းဖြစ်ပါတယ်။