နိုဝင်ဘာ-၂၅၊၂၀၂၅။ပုရစ်/People’s Spring
တနင်္သာရီတိုင်း၊ ကျွန်းစုမြို့နယ်မှာ စစ်ကောင်စီ လက်အောက်ခံ ပျူစောထီးစခန်းအတွက် လက်နက်ခဲယမ်းသယ်လာတဲ့ကားကို ကျွန်းစုမြို့နယ် ပြည်သူ့ကာကွယ်ရေးအဖွဲ့ (ပကဖ)နဲ့ မြိတ်ခရိုင် ပကဖ ပူးပေါင်းအဖွဲ့က ကြားဖြတ် တိုက်ခိုက်ခဲ့ရာ သေဆုံးထိခိုက်မှုရှိပြီး လက်နက်ခဲယမ်းတွေ သိမ်းရတယ်လို့ ကျွန်းစုပကဖက ထုတ်ပြန်ပါတယ်။
ပကဖ ပူးပေါင်းတပ်ဖွဲ့က ကျွန်းစုမြို့နယ်ရဲ့ ကျွဲခရံကျေးရွာအုပ်စု၊ ပဲ့တိုင်ကျေးရွာ၊ယမုံကျေးရွာတွေကို နယ်မြေကွင်းဆင်းစဉ် ပဲ့တိုင်ကျေးရွာ ပျူစောထီးစခန်းကို လက်နက်ခဲယမ်းတွေ သယ်ဆောင်လာတဲ့ ပျူစောထီးကား ၂စီး ဝင်ရောက်လာတာ စုံစမ်းသိရလို့ နိုဝင်ဘာ ၂၃ရက် မနက် ၁၀နာရီ ခန့်မှာ ယမုံကျေးရွာအနီး လမ်းပိုင်းမှာ ကြားဖြတ်တိုက်ခိုက်ခဲ့တာလို့ အသိပေးပါတယ်။
တိုက်ပွဲမှာ ပျူစောထီးနဲ့ ရဲတွေ ကားပေါ်က ဆင်းပြေးစဉ် ပကဖ ပူးပေါင်းတပ်က ဝိုင်းဝန်းပိတ်ဆို့ ပစ်ခတ်ခဲ့လို့ ထိခိုက်မှုတွေရှိခဲ့တယ်လို့ ဆိုပါတယ်။
Public Service Announcement
ပျူစောထီးတွေ ထားခဲ့တဲ့ ကားကို စီးနင်းထိန်းသိမ်းခဲ့သလို နောက်ကလိုက်လာတဲ့ ကားကိုလည်း ပစ်ခတ်တိုက်ခိုက်ခဲ့ကြောင်း ဖော်ပြပါတယ်။ စစ်ဆင်ရေးအတွင်း ပျူစောထီးနဲ့ ရဲတွေ ၅ဦး သေဆုံးကာ ၂ဦး ဒဏ်ရာရခဲ့တာကို မြေပြင်တိုက်ခိုက်ရေးရဲဘော်တွေနဲ့ ပြည်သူတွေရဲ့ သတင်းပေးပို့ချက်အရ သိရကြောင်း ကျွန်းစုပကဖက ထုတ်ပြန်ပါတယ်။
” အခုလို တိုက်ပွဲဖြစ်တာတို့ အသံကြားရင် ပျူတွေ ရဲတွေနဲ့ ဝေးဝေးနေပေးပါ”လို့ ကျွန်းစုပကဖ တာဝန်ရှိသူ ရဲဘော်ငါးမန်းက ဒေသခံ ပြည်သူတွေကို ပြောပါတယ်။
ပျူစောထီးနဲ့ ရဲတွေဆီက သိမ်းရတဲ့ကားအတွင်းက လက်နက်ခဲယမ်းတွေ သိမ်းရခဲ့ကြောင်းကိုလည်း ဓာတ်ပုံမှတ်တမ်းတွေနဲ့အတူ ထုတ်ပြန်ပါတယ်။ သိမ်းရတာတွေက (၆၀)မမ မော်တာပြောင်း တစ်ခု၊ (၆၀)မမ ကျည် သီး ၅ လုံး ၊9မမ ကျည် (၃၈)တောင့်၊ နာနတ်သီးလက်ပစ်ဗုံး (၂ )လုံး၊ အူဇီကျည်ဘောက် ၂ ဘောက်၊ဓါးမြှောင် ၁ ချောင်း၊ဖုန်း ၁ လုံး၊ပျူစောထီးယူနီဖောင်း (၁) စုံ တို့ဖြစ်ကြောင်း အသိပေးပါတယ်။
ဒါ့အပြင် တိုက်ပွဲအတွင်း ဖမ်းမိခဲ့တဲ့ ကားမောင်းသူနဲ့ ပျူစောထီးအဖွဲ့ဝင်ဟောင်းဆိုသူ ၂ဦး ကို စစ်ဆေးလျက်ရှိကြောင်းလည်း ထုတ်ပြန်ပါတယ်။
ကျွန်းစု ပကဖ အနေနဲ့ စစ်ရေးသတင်းတွေကို လိုအပ်ရင် လိုအပ်သလို အသိပေးထုတ်ပြန်လျက်ရှိတယ်လို့လည်း ရဲဘော်ငါးမန်းက ပြောကြားပါတယ်။
