ဒီဇင်ဘာ – ၁၉၊၂၀၂၅၊ မိုမို/People’s Spring
ကရင်နီပြည်နယ်မှာ ဒီကနေ့(ဒီဇင်ဘာ ၁၉ရက်)ကစပြီး အရေးကြီးကာလအဖြစ်သတ်မှတ်တယ်လို့ ကရင်နီပြည်တပ်မတော်(KA)က ထုတ်ပြန်ပါတယ်။
KA စစ်ဦးစီးချုပ် ဗိုလ်မှူးချုပ်အောင်မြတ်လက်မှတ်နဲ့ ထုတ်ပြန်စာအရ ဒီဇင်ဘာ ၁၉ ရက်ကစပြီး လာမယ့်နှစ် ဇန်နဝါရီ ၅ရက်အထိ အရေးကြီးကာလအဖြစ်သတ်မှတ်တယ်လို့ ဖော်ပြပါတယ်။
ထုတ်ပြန်ချက်ကိုလည်း ကရင်နီပြည်သူလူထု၊ကရင်နီပြည် တပ်ပေါင်းစုံတပ်ဖွဲ့ဝင်တွေနဲ့ လူမှုအသင်း အဖွဲ့တွေသိစေဖို့လို့လည်း တိုက်တွန်းထားပါတယ်။
Public Service Announcement
ခရစ္စမတ်ချိန်ခါ နှစ်သစ်ကူးကာလမှာ လူစုလူဝေးနဲ့ ဝတ်ပြုစုတောင်းတာ၊နေထိုင်သွားလာတာနဲ့ လူစုလူ ဝေးတွေမလုပ်ဖို့လည်း သတိပေးပါတယ်။
ရန်သူစစ်ကောင်စီကလည်း သူ့အလုပ်သူလုပ်နေသလို မိမိတို့လည်း သတိကြီးစွာနေထိုင်ရေးနဲ့ ကိုယ့်အလုပ်ကိုယ်လုပ်ကြဖို့ ဗိုလ်မှူးချုပ်အောင်မြတ်က တိုက်တွန်းပါတယ်။
စစ်ကောင်စီက တော်လှန်ရေးတပ်တွေရဲ့ အားနည်းချက်ကိုယူပြီး ၁၉၈၅ကနေ ဒီကနေ့အချိန်ထိ ခရစ္စမတ်နဲ့ နှစ်သစ်ကူးအချိန်ကာလတွေမှာ သတ်ဖြတ်တာ၊ရာဇဝတ်မှုကျူးလွန်တာနဲ့ ယုတ်မာမှုတွေကို ကြုံတွေ့ခံစားနေရဆဲလို့ သူက ဆိုပါတယ်။
တော်လှန်ရေးသက်တမ်း နှစ် ၅၀ကျော်ခရီးမှာလည်း နိုင်ငံရေးလိမ်လည်မှုတွေ ကြုံတွေ့ နေရပြီး ၁၉၇၄ ၊၁၉၉၀နဲ့ ၂၀၁၀တွေမှာ အာဏာရှင်အဆက်ဆက်က လိမ်လည်ခဲ့တယ်လို့ အသိပေးပါတယ်။
လာမယ့် ၂၀၂၅ ဒီဇင်ဘာ ၂၈ ရက် စစ်ကောင်စီပြုလုပ်မယ့်ရွေးကောက်ပွဲမှာလည်း နိုင်ငံရေးလိမ်လည်မှု ထပ်မံပြုလုပ်မှာဖြစ်တဲ့အတွက် နီးရာဓားကြောက်နေရတဲ့ လွိုင်ကော်၊မြို့တွင်း၊မြို့ပြင်က ကရင်နီလူထုအနေနဲ့ သတိထားဖို့ ဗိုလ်ချုပ်အောင်မြတ်က သတိပေးပါတယ်။
“ကရင်နီပြည်သူလူထုက ဒီတခါနဲ့ဆိုရင် မိအေး လေးခါနာသွားပြီ။အဆုံးစွန်ရောက်သွာပြီ။ဆင်လိုက်ရှာတယ်။အကောင်တွေ့ပြီဘဲ ဆင်ကောင်မမြင် မတွေ့ ယောင်ဆောင်ပြီး ဆင်ခြေရာလိုက်ရှာကြဦးမလား”လို့ သူက ဆက်ပြောပါတယ်။
အာဏာရှင်တွေကျဆုံးမှာ သေချာကြောင်းနဲ့ တော်လှန်ရေးကို ပါဝင်အားဖြည့်ကြဖို့ ကရင်နီပြည်တပ်မတော် စစ်ဦးစီးချုပ်က အသိပေးပါတယ်။
“KA ရဲ့ သတိပေးမှုက လုပ်ကိုလုပ်သင့်တယ်။စကစ က အခုတောင်နေ့တိုင်းတစ်နိုင်ငံလုံး ဗုံးပတ်ကြဲနေတာ”လို့ အသက်(၅၀)ကျော်အရွယ် ကရင်နီဒေသခံတစ်ဦးက ပြောပါတယ်။
ကရင်နီပြည်နယ်မှာ မယ်စဲ့၊ဖားဆောင်းနဲ့ ရှားတော မြို့နယ်ကလွဲလို့ ကျန်မြို့နယ်တွေမှာရွေးကောက်ပွဲလုပ်မယ်လို့ စစ်ကောင်စီက ကြေညာထားပါတယ်။ဒါပေမယ့် စစ်ကောင်စီလုပ်မယ့် ရွေးကောက်ပွဲကို အလုံးစုံကန့်ကွက်တာနဲ့ ကျင်းပခွင့်ပေးမှာမဟုတ်ဘူးလို့ ကရင်နီပြည်အင်အားစုတွေက တုံ့ပြန်ထားပါတယ်။
